Kɔgya 80 - Katɔti Ɔku Kedee

¹ O baƒonu ɔdane, awɔ ɔni mɔɔtɔnku Israel Yoseƒ kaba kemmo bebi aani baƒonu kalɛ. Eli ƒula lɛgaboku lɛlɔ na ƒula batu bani mbo avwi na baalɔ-ma Kerub eli. Buuvele-ɔ, ya na bɔnu kalɛ na eekeye.

² Bo abalɛmi Eƒraim ku Benyamin ku Manase adua kemmo bebi anumi, na atina-bu ƒula ɔyikun na aƒɔ-bu.

³ Sɔku-bu bése bula uwi ɔbuni ɔmmɔ kemmo. Na aƒɛnimi anumi akya-bu na bɔkɛ bɔƒɔ.

⁴ O Unwoti, kadi ƒui Katɔti, uwi ɛlɛ na adubuti kɔnyi akya-bu na eni-bu bɔkpali etédu?

⁵ Keku ndi adila ani na éte-bu. Na mmii ndi ntu bɔni na éte-bu na bɔ́ni na údu-bu ɔkwɛ.

⁶ Áya na búnwini bekyuli bani muuboku lɛsɛ na bula liku bekyuli akɔ na basɔ balánu-bu taakya lɛla lɛdi kemmo. Anwuɔsu bɔ́ta búnwini bana lɛmala.

⁷ O Ɔyikune Ƒui Katɔti, sɔku-bu bese bula uwi ɔbuni ɔmmɔ kemmo. Na aƒɛnimi anumi akya-bu na bɔkɛ bɔƒɔ.

⁸ Buse aani kɔdingyii kɔni na ágyu ásiku Egyipte kalɔ lɛlɔ. Na ábɔku kadi bamba bekyuli álɛku kalɔ kani nwi-bu anumi na éti-bu atálɛ bana kalɔ kammɔ kemmo.

⁹ Átuma kɔdingyii kɔmɛni kalɔ kalɛ na kɔbi lɛlɔ. Kuna ligyiitu líduo kalɔ kemmo lísie ɔgyu kakaaka na kúdie kɔgba kɔ́ƒɔ kalɔ lɛlɔ ƒui.

¹⁰ Na kɔdingyii kɔmmɔ ɔyuli ɔ́ƒɔ abi ammɔ lɛlɔ ƒui. Na kúbimi kúbi egyii enengudi kpakplaa bamba ƒui lɛlɔ.

¹¹ Kɔ́ta evete na kúdie kɔgba kútédu Mediterenia Ɛpu ku Euƒrate Ketu.

¹² Na bi ɔsu na ɔban ɔni na ágyi ámana-ku ni, ábwɛ-nwu, na ukyuli ndi ukyuli ɔni mɔɔsia mɛni uudie kɔnu na ude egyiibi ammɔ.

¹³ Na babɔtɔ ku beƒiebuo bamba lidu beebo teebesusu egyiibi kemmo kammɔ na baakun ebi ammɔ?

¹⁴ O kadi ƒui Katɔti, sɔ nwini nu-bu, siku ƒula keliekɔ kedee na katɔ mmɔ na anu ƒula kugyii kɔmɛni ku lɛƒɔndia.

¹⁵ Awɔ ɔlati éti ƒula kɔnu álɛ kugyii kɔmmɔ, na ánu-ku lɛlɔ na kɔ́lɛ lili.

¹⁶ Bekisine bámɛnɛ kugyii kɔmɛni béwi kalɔ na bátu ogya bákya-ku. Nsu buuvele-ɔ bɔnii kwanyiku-ma na ƒula kɔnyi kemmo na bayii udu.

¹⁷ Buuvele-ɔ bɔnii gyumana kadi bekyuli bani na áƒuna éte lɛlɔ na áya na bebo ɔyikun.

¹⁸ Bɔsɔ bulénwini kama bulakya-a lɛnɔ kudii. Ya na bulie ngba na butaakpa-a.

¹⁹ O Unwoti Katɔti Ɔyikune Ƒui, sɔku-bu beese bula uwi ɔbuni ɔmmɔ kemmo. Na aƒɛnimi anumi akya-bu na bɔkɛ bɔƒɔ.