Kɔgya 7 - Katɔti Ɔku Kedee

¹ O Unwoti, mina Katɔti, awɔ na líkeli líbo ḿbatamiku. Die-mi lɛku bekyuli bani nsiaku-mi na baawia ka bayila-mi ngba enu kemmo.

² Si ɔɔɔdi lɛni ni, badubo-mi buƒie bɔtɔlɔku aani gyata kalɛ na baduli-mi kɔkɛ kɔkɛ.

³ O Unwoti, mina Katɔti, aanu-mi enu sɛɛn na katɔ, ńtaƒiɔ ɔdi!

⁴ Mina ɔkpana ɔmani na lídie líte iye mina ukisine ɔmani lɛlɔ na lɛ́ta línye na ulu ukpidi ɔdi lɛlɔ?

⁵ Na si lɛ́bla ala amɛni adi ni, na aya na mina bekisine babi basiaku-mi na beƒie-mi, na banya-mi badu bava kalɔ.

⁶ O Unwoti, ta ku kɔnyi na enye ada mina bekisine bani nsiaku-mi ku kɔnyi geen! Ta na ebunku-mi! Ɔsika awɔ mɔɔtɛ litemi ulu lɛlɔ.

⁷ Anwuɔsu sala kadi bekyuli ƒui lisu na elie ƒula lɛgaboku lɛlɔ na katɔ na adi-ma lɛlɔ.

⁸ Awɔ ndi bayawine ƒui litemi ɔtɛne. Unwoti Katɔti, tɛ litemi lɛmɛni te-mi na lɛdi ubo. Ɔsika agyi ka ala amɛni ƒui adi aaada-mi.

⁹ Awɔ ndi Unwoti Katɔti ɔni nse siin na agyi bula lili kemmo kakali ku bula kayi kemmo ayɔla ƒui. Nye tile alaekpidi bablane ala bɔbla ulu! Na ada bekyuli bani nsiaku-ɔ kama siin na benye kpakplaa.

¹⁰ Unwoti Katɔti mɔɔgyumana-mi. Na bekyuli bani ƒui muunú-nwu litemi ni, ɔɔƒɔ́-ma ngba.

¹¹ Unwoti Katɔti ɔɔtɛ litemi siin na ɔɔdú bekyuli bekpidi kɔtɔ limeyi ndi limeyi.

¹² Si bekyuli bekpidi bátavumana udu ni, Katɔti ɔdubo nwuna kewii bɔdɔ buse bute-ma. Ɔ́ɔni nwuna kataminta úse unye kagyumana.

¹³ Ɔ́klibi nwuna ekpola ɔda unye. Na ɔda nwuna atula ani mɔɔda ogya unye ka ɔkyula-ma.

¹⁴ Bekyuli bekpidi baada likpidi kaƒɔ. Na baawɔ ɔkɔ bɔnyi ku lɛsɛ bɔkya ku kalala bɔbla.

¹⁵ Nsu kɔkpagyuɛ kɔni na baakywɛ bekyuli bammɔ ni, aku kani muudie-ma.

¹⁶ Ɔmmɔ ɔsu ni, ama alati bana ekpidi ndubo-ma kɔtu bɔni. Na bana likyulikpi kasusu keenwíni teebo-ma lɛlɔ.

¹⁷ Mɔɔgyá Unwoti Katɔti enu ka ɔɔtɛ litemi siin ɔsu. Na mɔɔtu enugya lɛnu teete Unwoti Katɔti ɔni ntulo ƒui.