Kɔgya 57 - Katɔti Ɔku Kedee

¹ Nu-mi kɔnyana, O Katɔti, nu-mi kɔnyana, ɔsika awɔ na líkeli lɛ́tamiku. Na ƒula avwi ɔyuli kalɔ na ndubɔkɛ kabɛkɔ úti útédu uwi ɔni na ɔgbankpi kpakplaa ɔni mɔɔlɛ́ mmɔ kenye kadubɔvi.

² Katɔti ɔni ntulo ƒui na mɔɔkpali teevele. Ɔsika awɔ mɔɔbla lɛla biala teete-mi.

³ Na adubo-mi bubunku bɔsiku katɔ mmɔ. Na adubo bekyuli bani nábi basiaku-mi beekpóku-mi mmɔ bɔbɔku. Na atina ka aadi ƒula litemi lɛlɔ na aayɔ́-mi.

⁴ Mina bekisine báka bámana-mi aani bagyata bani muuƒie bekyuli taaduli-ma teebweli. Na bana anyi ese aani abuala ku ligyii atula. Na bana linyemi libo ɔbi aani kuwii.

⁵ O Katɔti, ya na bekyuli ƒui bakɔliku ƒula lɛnyi katɔ besienku ɔgyu kakaaka. Na banu kalɛ na eekeye na kesi kesii na kalɔ lɛlɔ.

⁶ Mina bekisine bákywɛ-mi kɔkpagyuɛ na bédie libu béwi-mi kalɛ na lɛnu liduo na mina ngba bɔkya ɔgbankpi kemmo, nsu ama alati bánu béduo-ni kemmo.

⁷ Mina kayi kélie-mi kalɔ na awɔ ɔsu, O Katɔti, na ndubudie kɔgya ku lɛdi mini mini limwi-ɔ.

⁸ Ndubɔta ku mina kayi ƒui na liti ɔbentaa ku agyala ɔtanta tutuutu ntágyila ɔƒɛ.

⁹ Unwoti, ndubɔgya-a enu na bekyuli ƒui benu. Na ndubudie lɛnu limwi-ɔ na kadi biala bekyuli akɔ.

¹⁰ Unwoti, kalɛ na aayɔ́ bekyuli uwi biala ku kalɛ na aadi ƒula litemi lɛlɔ úbomo geen aani kalɛ na bɔɔnu ka kayaa kébomo.

¹¹ O Katɔti, ya na bekyuli ƒui bakɔliku ƒula lɛnyi katɔ besienku ɔgyu kakaaka. Na banu kalɛ na eekeye na kesi kesii na kalɔ lɛlɔ.