Kɔgya 44 - Katɔti Ɔku Kedee

¹ O Katɔti, bula bati básu-bu na búnu ku bula atu ala ani udu na ábla na bana kuuku uwi.

² Ékpoku kadi bamba bekyuli ku ƒula ɔyikun na ábɔku-ma édie bana kalɔ lɛlɔ na áyila-ma udu. Áya na bula bati bétélie mmɔ na ala átɛ éte-ma.

³ Na ɔɔɔdi bula bati bamɛni nékpo ku bana kuwii asa báƒɔ kalɔ kamɛni bése iye bana enu kabla kadi na béti badi-ma lɛlɔ. Mmomu awɔ nnye mmɔ na ábla ala ebendi ku ƒula ɔyikun na átina ka aayɔ́-ma.

⁴ Awɔ ndi mina Katɔti ku mina ɔga ɔni mɔɔyá na ƒula bekyuli baadi lɛlɔ.

⁵ Ƒula lɛlɔ na bɔ́sia na búdi bula bekisine búsienku kama. Na ɔkɛnku ƒula lɛnyi lɛlɔ na buususu-ma taakya bula lɛgba kalɔ.

⁶ Ɔsika neeeti mina anu taasia mina kataminta lɛlɔ. Na ɔɔɔdi mina kewii lɛnɔ muukpó teete-mi na mɔɔdi lɛlɔ.

⁷ Nsu awɔ mɔɔyá na bɔɔdi bula bekisine lɛlɔ. Na áya na kɔƒa kúkpo ama bani ƒui muukisi-bu kpakplaa mmɔ.

⁸ Bula Unwoti Katɔti lɛlɔ na bɔɔkun lɛmɛnɛ limeyi limodi na bɔdubumwi-nwu lɛnyi uwi ƒui.

⁹ Nsu ɔƒɛni ni, éni-bu na ákya-bu kɔƒa. Na asɔ alásiaku bula bekpone na kekpokɔ.

¹⁰ Na áya na abu mmomu násɔ búnwini buukeli bula bekisine. Na ama bani muukisi-bu mmomu néƒie-bu ala báƒɔ.

¹¹ Na ányonu-bu éte-ma aani baƒonu na báduli-bu kɔkɛ kɔkɛ bébweli. Na búgyingya bɔkya kadi bamba bekyuli akɔ.

¹² Na éti-bu éye éte bekyuli bamba ku kuye blii kani na átakɛ kɔsia kɔdi na kuye bɔdi bɔmmɔ kemmo.

¹³ Áya na bula liku bekyuli baatɛmi teewi-bu na beedumi-bu lɛnɔ ɔni na bɔ́sɔ bútaƒɔ kuye kɔdi na bana anumi.

¹⁴ Búnwini lɛmala búte baƒɔ na bapii-bu.

¹⁵ Ɔmɛni ɔsu kɔƒa kɔsiaku-mi uwi biala na kɔƒa kúnwini lɛdiku libi-mi anumi.

¹⁶ Na mina bekisine beedumi-mi na béti-mi bénwini lɛmala aani kalɛ beedie ukyuli kasi.

¹⁷ Ala amɛni ƒui ébo-bu lɛlɔ lɛni ina ka bútayiƒala-a iye búnwini ƒula bunyimi kama.

¹⁸ Bútalɛ-ɔ kama. Na bula kanyakɔ lɛnɔ kasia ƒula ulu lɛlɔ.

¹⁹ Nsu áya na búbo kalɔ na búduo lɛdisa bonwu kemmo na kesii kani na beƒiebuo bakya.

²⁰ Na si bɔ́yiƒala bula Katɔti lɛnyi iye búnwini kama búsie bɔɔkpá kadi bamba baƒiɔ badi ni,

²¹ awɔ Katɔti adubɔnu ati. Ɔsika agyi abɛla ani nkya bekyuli kayi kemmo.

²² Sɔsɔ na awɔ ɔsu ni, bɔkya kukpi ɔgbankpi kemmo limeyi ndi limeyi. Na baabla-bu aani kalɛ na baabla baƒonu bani na béti-ma bésela batádu.

²³ Unwoti, buuvele-ɔ, ta na ebo ebebunku-bu. Tedie-bu atu ƒui lɛni.

²⁴ Bi ɔsu na áda anumi édie-bu lɛlɔ lɛni na ƒula kasusu kálɛ bula lɛbibo ku budumo bɔni kemmo bɔkya lɛlɔ?

²⁵ Bɔ́ƒɛ buwi kalɔ ɔni na bɔtɛ ɔtumu akɔ.

²⁶ Buvele ta pla na ebebunku-bu na edie-bu, ɔsika ƒula bɔyɔ bulávumana kudii.