Kɔgya 4 - Katɔti Ɔku Kedee

¹ Mina Unwoti Katɔti ɔni muunye-mi kama, si mɔɔkpali-ɔ ni, nu te-mi! Uwi ɔni na ala ékpoku-mi ni, awɔ nédie-mi. Bla-mi lɛƒɔndia na enu ala ani muuvele-ɔ!

² Amii bekyuli, uwi ɛlɛ sɔɔn na bɛdubo-mi lɛnyi bubile butálɛ? Na uwi ɛlɛ na bɛdubɔyɔ adɔlɔla ku ala ani neeebo kɔsia?

³ Bitayiƒala ka Unwoti Katɔti ɔɔda bekyuli bani nsiaku-nwu kama siin aani anwu badi. Uunú-mi bɔkpali si muuvele-nwu lɛla lɛdi.

⁴ Si bíti kɔnyi ni, bitaya na bina kɔnyi kɔya na bɛbla likpidi. Na si bɛ́yu bɛ́tɛ ni, na biduo lɛlɔ ku ala amɛni kemmo bɛnu kaduɛ na bɛbla kpoo.

⁵ Bɛbla akpala ani na Unwoti Katɔti ɔɔyɔ́ bite-nwu. Na biti bina kayi bɛsia-nwu lɛlɔ.

⁶ Bekyuli pii bakya baasu banini, “Bɔɔyɔ́ ka ukyuli ɔdi ɔbla-bu lɛbuni lɛdi. Unwoti, ya na ƒula lɛƒɔndia limomo-bu lɛlɔ libu!”

⁷ Áya na mina kayi kéyi ku ebiti geen útulo bana ebiti ani baakɛ́ si bákɛ edula pii aani antabi ku egyiibi ntɛ bɔwɔdi.

⁸ Si lɛ́yu lɛ́tɛ ni, mɔɔlɛɛ ƒaa, ɔsika awɔ kani ndi mina Unwoti ɔni mɔɔgyumana-mi.