Kɔgya 39 - Katɔti Ɔku Kedee

¹ Líbo lɛlɔ ɔda lɛ́su nnini, “Ndubɔnu kaduɛ na lɛda mina unyemi na enyekpi adi alálɛ-mi kenye. Na lɛɛɛdubo bɔtɛmi lɛnɔ uwi ɔni na bekyuli bekpidi báka bámana-mi mɛni.”

² Nsu ina ka líbo limu na naaatɛmi ina lɛbuni na lɛ́nu muedi ni, mina ɔlɛ ɔni muunú ni, katɔ kani na ɔɔkɔ́.

³ Kayi kaakpulu-mi geen. Na si nli mɔɔbla kasusu ni, na mina kayi keekpóku-mi. Anwuɔsu na lɛ́su na kawɔlɔkɔ nnini,

⁴ “O Unwoti, ya na lɛti mina emeyi ani nébu-mi. Na lɛti kalɛ na mina ngba búkeli búsela kawɔlɔkɔ.

⁵ Ati, ábla na mina ngba emeyi ese klukui. Na mina akwa ƒui aaadi lɛla lɛdi na ƒula anumi. Na ukyuli ɔyawine biala ngba buse aani ɔƒɛƒɛɛ ɔni mɔɔlɛ́ ukyuli enwu.

⁶ Geen ni, ukyuli ngba buuubo bɔyii taakya aani ukyuli kɔyu kɔni muuwi kalɔ. Na keeke na uutú lɛlɔ ɔnii ɔɔsála ala ute lɛlɔ. Nsu ɔɔɔgyi ukyuli ɔni ndubo ala ammɔ bɔdi.

⁷ “Unwoti, bi lɛnɔ na nsɔ nsia anu ɔƒɛni? Ƒula lɛlɔ kani na mina anu asia.

⁸ Die-mi na mina alaekpidi ƒui kemmo. Na taya na linwini ukyuli ɔni na badɔlɔdi bánu báwɔlɔ na bada-nwu lɛnyi.

⁹ Lɛ́bla kpoo na neeebimi kenye, ɔsika awɔ náya na úbo úte lɛni.

¹⁰ Muuvele-ɔ, da-mi kɔtu bɔni ya, ɔsika lɛlɔ líitu-mi lɛ́vili na kɔtu bɔni bɔmmɔ ɔsu.

¹¹ Aaní-bu kɔtu kpakplaa na bula ekpidi ɔsu. Na ala ani na bɔɔsia anu geen eebie aani kalɛ na kubweyi kuubile bula akɛla ani na áƒɔ kuye. Na sɔsɔ ukyuli use kpɛtɛ kpɛtɛ aani ɔƒɛƒɛɛ ɔni mɔɔlɛ́ ukyuli enwu kemmo.

¹² “Nu-mi buvele, O Unwoti, na abla ete-mi na keku kani muuwulo taakya-a ɔsu. Tetile atu na mina mmii pii bɔmɛni kama. Ɔsika nse aani ƒula ɔƒɔ ɔni nálɛlɛ-ɔ aani mina bati kuuku kalɛ kani.

¹³ Da kɔnyi buti na mina lɛlɔ ya, na aya na lɛsɔ lɛkɛ ebiti asa likpi lɛlɛ kayawi kamɛni kemmo.”