Kɔgya 38 - Katɔti Ɔku Kedee

¹ O Unwoti, tadɔnku-mi na ƒula kɔnyi kemmo.

² Ɔsika ɔlɔna kemmo kaadu-mi aani si ƒula atula na ébo álɛ-mi. Na ƒula enusɛ lɛnɔ aayu-mi ɔlɛ geen.

³ Naaakɛ bɔnwuna bɔdi na mina ɔlɔna kemmo na ƒula kɔnyi ɔsu. Na muunú ɔlɛ teetéduo mina ekubi kemmo ɔ́si mina ekpidi ɔsu.

⁴ Ɔsika mina ekpidi énwini etila asia-mi lili. Na ebo-mi unu geen na étulo-mi muedi.

⁵ Na ɔkɛnku mina kɔdɔlɔ ɔsu ni, mina alɛbi ébun na eenwenyi.

⁶ Lɛ́goglo nkɛ na muunú ɔlɛ geen na muuwulo kɔnyana limeyi limodi ƒui.

⁷ Ɔlɛ ukpidi ɔ́ƒɔ-mi ɔlɔna kemmo ƒui na lɛlɔ kemmo káƒɔ-mi ogya.

⁸ Lɛ́bla kpɛtɛ kpɛtɛ aani ukyuli ɔni náƒɛ uwi kalɔ na edumo kani nda, na muubó abi na mina kayi kemmo.

⁹ Unwoti Katɔti, lɛla lɛni mɔɔwia lítabɛ-ɔ na eenú lɛnɔ kalɛ na muudumo.

¹⁰ Mina bɔnwuna buláyu-mi. Na ɔlɔkplu ɔdi ɔsɔ uuubo-mi. Na mina anumi asɔ alánu nwaa.

¹¹ Mina bakpana ku badukɛne ƒui békeli-mi na mina alɛbi ɔsu. Na bédie-mi atu.

¹² Bani mɔɔwia-mi ngba bayila lɛnɔ baakywɛ bana kɔkpagyuɛ uwi ndi uwi. Na bani mɔɔwia ka babla-mi kalala lɛnɔ benye kagyumana baasa lili likpidi mina lɛlɔ.

¹³ Nse aani ukyuli ɔni na atu éti-nwu ƒui na neeenu. Na unyemi lɛnɔ ɔ́ƒɛ ɔ́kya-nwu kenye kemmo na naaakana bɔtɛmi.

¹⁴ Atu ése éti-mi kpa na kenye lɛnɔ naaakana bubimi bɔsu lɛla lɛdi.

¹⁵ O mina Unwoti, ƒula lɛlɔ kani na mina anu asia. Na awɔ kani ndubunu ete-mi.

¹⁶ Ɔsika lívele-ɔ nnini, “Taya na mina bekisine bama-mi na bakun lɛmɛnɛ ka lígyile nnii muubuli ɔsu.”

¹⁷ Ɔsika ɔlɛ bunu bɔmmɔ bútulo-mi na buláƒana na mɔɔyɔ́ libuli.

¹⁸ Lídie mina alaekpidi kalɔ, ɔsika éduo-mi.

¹⁹ Nsu mina bekisine bákɛ lɛlɔ na bebo ɔyikun lɛnɔ. Na ama bani muukisi-mi kekeeke mmɔ bemomo.

²⁰ Beeti likpidi taaƒɔ-mi lɛbuni kayu na báta bénye-mi lɛlɔ ka mɔɔsia lɛbuni bɔbla kama ɔsu.

²¹ Unwoti, tada-mi tese. Mina Katɔti, tenwini kama takya-mi.

²² O mina Unwoti ku Ɔƒɔne, yile bubo na ebebunku-mi!