Kɔgya 37 - Katɔti Ɔku Kedee

¹ Kayi ketekpoku-ɔ si ala aatɛku ukyuli ukpidi. Na anumi étegyie-ɔ na nwuna kabla lɛlɔ.

² Ɔsika uwi klukui ɔdi kama ni, Unwoti Katɔti ɔdubɔya na bamɛnɛ-ma bewi kalɔ aani livo na bakwii aani alakpi.

³ Ti ƒula anu sia Unwoti lɛlɔ na ataabla lɛbuni na adubulie ngba ku kubiti na kalɔ lɛlɔ na lɛla lɛdi lilékpoku-ɔ.

⁴ Ya na ebiti ataada-a na Unwoti lɛlɔ na ɔdubɔbla ƒula kayi ayɔla ute-ɔ.

⁵ Ti ƒula ala ƒui siaku Unwoti Katɔti lɛlɔ na aƒɔ-nwu adi, na ɔdubɔbla lɛla lɛni námanku ute-ɔ.

⁶ Ɔdubɔya na ƒula ala ani na aabla siin eteekeye aani lɛdigye. Na ɔtɛ ƒula litemi na ɔbla nwaa aani ɔƒiiwi.

⁷ Kɛ bɔnwuna na Unwoti lɛlɔ na akɛ kayi na enye ataanu-nwu anumi. Kayi ketekpoku-ɔ na ala ani mɔɔtɛku ukyuli ɔdi ɔsu, iye ka ukyuli ukpidi kɔkwɛ kɔni na ɔɔkya kɔɔtɛ-nwu ɔsu.

⁸ Da kɔnyi buti ya. Na ada livoƒi ala aya. Taya na anumi egyie-ɔ. Si ɔɔɔdi lɛni ni, ɔdubuti-ɔ butákya likpidi bɔbla kemmo.

⁹ Ɔsika likpidi bablane ƒui ni, Unwoti Katɔti ɔdubo-ma ngba udu bɔyila. Nsu bekyuli bani néti bana anu básia Unwoti lɛlɔ ni, ama ndubo kalɔ kammɔ ala bɔdi.

¹⁰ Kébu blii kani na balalane udu ɔdubo bɔyii. Na adubɔsia-ma anu na bekyuli akɔ, nsu asɔ alanu-ma.

¹¹ Nsu bekyuli bani néboku lɛlɔ kalɔ ama badubɔdi kalɔ kammɔ lɛlɔ ala na bana keyi kayɔ buɛɛ.

¹² Bekyuli bekpidi beeti kasusu kekpidi na bekyuli babuni lɛlɔ na baadu anyi kpakplaa na bana lɛlɔ.

¹³ Nsu Unwoti Katɔti ɔɔmá bekyuli bekpidi bammɔ. Ɔsika ɔgyi ka bana emeyi asia ulu adubo na badubo-ma udu bɔyila.

¹⁴ Balalane bédie bana kuwii bada na báni bana kɔtaminta benye ka bebo bawabane ku bani mɔɔyaki ala ku bani ƒui na bana lilu lise siin badu.

¹⁵ Nsu ama alati bana kuwii na badubuti badu-ma na bana kɔtaminta lɛnɔ kɔƒɛ kuwi kalɔ.

¹⁶ Lɛla blii suɛ lɛni na ukyuli ɔni nse siin ubo ni, ɔdia utulo balalane akɛla pii ani na bebo.

¹⁷ Ɔsika Unwoti ɔdubɔya na balalane ɔyikun ɔyii udu. Na bekyuli bani nse siin bakɛ ɔyikun.

¹⁸ Bekyuli bani na lɛla lɛdi lɛɛɛda-ma ni, Unwoti Katɔti ɔdubɔnu-ma lɛlɔ bana ngba emeyi ƒui. Na bana kadikɔ kadubuse úsela uwi ƒui.

¹⁹ Si uwi ɔni na ɔgbankpi ɔdi úbo ni, ɔtɔtɔ ɔɔɔdubo-ma bɔgyu. Lɛni kani na si kɔka lɛnɔ kúbo ni, ama badubɔkɛ badi na bemo.

²⁰ Na bekyuli bekpidi ama ni, badi Unwoti Katɔti bekisine. Anwuɔsu badubɔyii aani kalɛ kugyii anwula aanu taayii udu. Na badubɔyii ku udu aani kalɛ uyɔ ɔyii takya kayaa kemmo.

²¹ Balalane beevó ala na balásɔku teesienku. Nsu bekyuli bani nse siin baanu kɔnyana na beete taasia kama.

²² Ɔsika bekyuli bani na Unwoti Katɔti úte kusɛ kusɛ ni, ama badubɔdi kalɔ kammɔ lɛlɔ ala. Na bani na úwida ama ni, ɔdubɔyila-ma udu na ngba bɔmmɔ kemmo.

²³ Ukyuli ɔni mɔɔbla Unwoti Katɔti lɛyɔla ni, Unwoti ɔɔtina-nwu nwuna kanyakɔ na nwuna ablala ƒui aayɔ́-nwu kaƒɔ.

²⁴ Na si ɔ́gbanta ni, ulebuli, ɔsika Unwoti ɔdubɔda-nwu na unye ligeen.

²⁵ Ɔ́si mina lɛnamu uwi úti úbedu ɔni na lɛ́ɛbi lɛlɔ mɛni ni, ńtanu ka Unwoti Katɔti údie ukyuli ɔni nse siin ɔdi atu kudii. Na ńtanu ka nwuna bebi bakɛ beteevele asa na badi.

²⁶ Ukyuli ɔmmɔ ɔɔnu kɔnyana uwi biala. Uute ala lɛnɔ na uuvó teete bekyuli na kusɛ kusɛ ɔɔsiaku nwuna bebi.

²⁷ Keli likpidi bɔbla na ataabla lɛbuni na ƒula bawɔ badubulie kalɔ kammɔ lɛlɔ uwi ƒui.

²⁸ Unwoti ɔɔyɔ́ ala ani na baabla ulu lɛlɔ. Na ulalɛ bekyuli bani mɔɔbla taasiaku nwuna litemi lɛlɔ kama kudii. Mmomu ɔɔgyumana-ma uwi ndi uwi. Nsu bekyuli bekpidi bebi ama ni, badubɔyii udu.

²⁹ Bekyuli bani nsiaku Unwoti kama siin badubulie kalɔ lɛlɔ na badi-ka ala uwi ƒui.

³⁰ Ukyuli ɔni nsiaku Unwoti kama siin ɔɔtɛmi lɛnunda ku etemila ani nse sɔsɔ.

³¹ Uunyimo Katɔti ɔda bubo bɔni náƒɔ-nwu kayi mmɔ uwi ndi uwi kalɛ na ulegyiile.

³² Ukyuli ukpidi ɔɔtú ukyuli ɔni nsiaku Unwoti kama siin taawia ulu biala kalɛ na ɔdu-nwu.

³³ Nsu Unwoti Katɔti ɔɔɔdubo-nwu bɔnyonu bɔkya-nwu enu kemmo na ɔɔɔdubo ukyuli ɔbuni ɔmmɔ lɛnɔ kɔtɔ bɔdu si ɔɔtɛku-nwu litemi.

³⁴ Taanu Unwoti anumi uwi ndi uwi na asia nwuna ulu lɛlɔ. Ɔdubɔkɔliku-ɔ katɔ na adi kalɔ kammɔ ala. Na uwi ɔni na baayila bekyuli bekpidi udu ni, adubunye anu.

³⁵ Lɛ́ɛnu dii kalɛ na ukyuli ukpidi ɔni mbo kalala ɔ́kɛ lɛlɔ aani kugyii kɔni nákɛ kenyekɔ buni na kalɔ buni lɛlɔ na kuudie kɔgba.

³⁶ Nsu uwi útetu asa na úkpi. Na báyiƒala-nwu. Ka lɛ́wia nnii mɔɔnu ukyuli ɔmɛni ni, nwuna lɛla ndi lɛla lítebu.

³⁷ Se ukyuli ɔbuni ɔni ablala nkɛ ulu lɛlɔ likpo kaduɛ. Ukyuli ɔmɛni keyi kadanku lɛlɔyɔ ku keyi buɛɛ.

³⁸ Nsu alaekpidi bablane badubɔyii udu, na bana keyi kadubɔda liku.

³⁹ Bekyuli bani nsiaku Unwoti kama siin ni, Unwoti Katɔti ɔlati mɔɔgyumana-ma na anwu kani na baatámiku si ala eekpóku-ma.

⁴⁰ Na Unwoti ɔdubo-ma bubunku na udie-ma na balɛ ukyuli ukpidi enu kemmo na bakɛ bɔnwuna. Ɔsika Unwoti ndi bana katamikukɔ.