Kɔgya 35 - Katɔti Ɔku Kedee

¹ Unwoti, muuvele-ɔ geen nnii bekyuli bani muunye teetile-mi ni, awɔ lɛnɔ nye tile-ma. Na bani nsiaku-mi muukpóku-mi ni, awɔ lɛnɔ kpoku-ma.

² Ti ƒula likpola ku lɛgyumanala na enye ete-mi.

³ Na edie ƒula atula gyɔlɔɔ keyi na enye etile bani ƒui nékeli badubo-mi lɛlɔ. Na ese-mi kayi ka adubɔƒɔ-mi na ekpo ete-mi.

⁴ Ya na kɔƒa kukpo bekyuli bani na bana anumi égyie na mina lɛlɔ. Na aya na bani nábla kɔkwɛ ƒui na mina lɛlɔ kasusu keƒu.

⁵ Ya na benwini aƒaƒaa ani na ɔƒɛƒɛɛ uubó taavinku. Na ƒula ɔtu ubabɔku-ma usienku kama.

⁶ Ya na bana kɔvinkɔ ƒui kɔbla suu na kuteegyiile uwi ɔni na ƒula batu beekpóku-ma na baabɔku-ma.

⁷ Ńtabla-ma lɛla lɛdi, nsu baabɛ́ taakywɛ-mi kɔkpagyuɛ ka bedie-mi. Na béku libu bonwu bonwu bése-mi ka lɛnu liduo-ni kemmo.

⁸ Ya na ɔgbankpi uyu-ma ɔtu ɔni na baaagyi beeese. Na aya na kɔkpagyuɛ kɔni na bákywɛ-mi kudie-ma. Na banu beduo libu lɛni na ama alati béku bése-mi kemmo na bayii udu na mmɔ.

⁹ Na mina lɛlɔ kemmo ƒui kayɔ ku ebiti na mina Unwoti Katɔti lɛlɔ ka ɔ́ƒɔ-mi ɔsu.

¹⁰ Na ndubɔsu ku mina kayi ƒui nnini, “Ukyuli ɔdi uuuse aani Unwoti kalɛ.” Ɔsika anwu muudie bekyuli bani nse kpɛtɛ kpɛtɛ taalɛku bayikune bani ntulo-ma enu kemmo. Na uudie bawabane taalɛku bayikune bani ntulo-ma na baanya-ma taakya enu kemmo.

¹¹ Ɔkɔ banyine báta na bánwi etemila ani lɛlɔ na lɛɛɛgyi básia-mi ka ami nábla-nya.

¹² Na béti likpidi báƒɔ-mi na lɛbuni lɛni na lɛ́bla kayu kalɛ na bedie-mi lɛti ku kɔnyana.

¹³ Nsu uwi ɔni na ama beeƒi ni, línyimi kenye na líti kɔnyana adala lɛ́da na lɛ́kpali katɔ lívele líte-ma. Nsu mina buvele ƒui bɔ́sɔ búnwini búbo-mi lɛgba akɔ.

¹⁴ Kaƒɔ kákywi-mi aani si mina ɔnwani iye ɔkpana geen ɔdi nékpi. Na nkɛ mɔɔví ku kɔnyana kemmo teewulo aani si mina uni nékpi.

¹⁵ Nsu ka líduo ɔgbankpi kemmo ni, lɛlɔ mɔɔyɔ́-ma. Na bása lili mina lɛlɔ na baabla-mi kalala ɔni na lɛɛɛgyi-ma muedi.

¹⁶ Na anumi lɛlɔ bekyuli béese kalɔ baakun lɛmɛnɛ na baadu anyi na ami ɔsu teedumi-mi.

¹⁷ Unwoti Katɔti, buvele tenye tanu ɔmɛni gyɔlɔɔ. Die-mi lɛku bekyuli bani nsiaku-mi beekpóku-mi kpakplaa aani bagyata mɛni enu kemmo.

¹⁸ Ndubɔgya-a enu uwi ɔni na ƒula kadi bekyuli bása. Na limwi-ɔ lɛnyi na bana anumi.

¹⁹ Unwoti Katɔti, taya na bekyuli bani muukisi-mi keeke mɛni bakɛ ebiti na mina lɛbibo ɔsu. Na taya na bataamana bana anumi taakya-mi ka bákɛ lɛla lɛni na baawia ɔsu. Nsu ɔɔɔdi lɛla lɛdi na lɛ́bla-ma.

²⁰ Ɔsika bekyuli bamɛni balátina keyi buɛɛ lɛla lɛdi na bana atɛ kemmo. Mmomu ɔkɔ ala kani na baanwí taasia bekyuli bani nse buɛɛ na kalɔ kammɔ kemmo.

²¹ Na baadú-mi kɔtɔ teebo kɔnu kenye taasu banini, “Abu alati bɔ́nu lɛla lɛni na ɔ́bla.”

²² O Unwoti, ala amɛni ƒui adi biala átabɛ-ɔ. Anwuɔsu buvele tagyunku-mi na asɔ elie kpoo ataanu.

²³ Mina Unwoti Katɔti, buvele ta na ekpo aƒɔ-mi.

²⁴ Ka ese sin ɔsu ni, tɛ litemi lɛmɛni na ete-mi ubo. Na taya na bakɛ ebiti ekpludi adi na mina lɛlɔ.

²⁵ Taya na basu na bana kayi kemmo banini, “Lɛni geen na bɔɔwia ka ɔlɛku-nwu. Na ɔƒɛni amu bɔ́wɔlɔ-nwu.”

²⁶ Mmomu ya na kɔƒa kukpo bani ƒui mɔɔkun lɛmɛnɛ na mina lɛlɔ na mina ɔgbankpi ɔsu. Na aya beƒu na bana ablala kemmo. Na kɔƒa kunwini awu na bakya na bana anumi ewi kalɔ.

²⁷ Bekyuli bani ƒui na lɛlɔ lɛɛyɔ́ ka éte-mi ubo ni, bava momoomo ku ebiti. Na bataasu uwi biala banini, “Unwoti Katɔti ɔni mɔɔwia nwuna kabla ɔblane kadia ni, nwuna lɛnyi lɛkɔ katɔ kesii biala.”

²⁸ Na ndububo-ɔ kudu na nteemwi-ɔ limeyi limodi ɔ́si kalɛ na ese siin ɔsu.