Kɔgya 26 - Katɔti Ɔku Kedee

¹ Unwoti, tina ka lɛla lɛdi lɛɛɛda-mi na ete-mi ubo. Ɔsika lɛ́da lɛlɔ lídie likpidi ulu biala lɛlɔ na nsiku-ɔ kama siin na ntedeyi kesii bamba.

² Unwoti, duo-mi kayi ku kasusu kemmo nu, na akɔku-mi anu kalɛ na nse.

³ Ngyi ka ebo bɔyɔ bɔni na bulavumana na aadi ƒula litemi lɛlɔ uwi ndi uwi, anwuɔsu na nsiaku-ɔ kama.

⁴ Naaadiku ɔkɔ banyine ku anumi lɛlɔ bekyuli kɔkpana.

⁵ Nkisi alaekpidi bablane ku balalane na neeese liboku bana kudɔ.

⁶ Lídie mina enu katɔ mɔɔtina ka nse sɛɛn na mɔɔkpá-a taaka taamana ƒula lɛkpabi.

⁷ Na mɔɔtu linugya lɛnu teebo-ɔ kudu na mɔɔsu akɔla lidu lidu lɛni na eedie taatina.

⁸ O Unwoti, mɔɔyɔ́ ƒula kakpakɔ kamɛni geen, ɔsika mmɔ na ƒula ɔbu ku bukeye bɔkya.

⁹ Na uwi ɔni na adubɔyila alaekpidi bablane ku bekyuli badune udu ni, teti-mi tasalaku-ma.

¹⁰ Bebo kalala kɔkwɛ na baabɛ́ taaƒɔ sika taadi.

¹¹ Nsu ami ni, mɔɔbla ala ani na ese siin. Nu-mi kɔnyana na edie-mi na ɔgbankpi biala kemmo.

¹² Ɔƒaani ni, nnye kenyekɔ kabuni kani na lɛɛɛdubo bɔgbanta. Na uwi ɔni na ƒula bekyuli bása ni, ndubo-ɔ lɛnyi kudu bubo.