Kɔgya 145 - Katɔti Ɔku Kedee

¹ Ndububo-ɔ lɛnyi kudu lɛkɔliku-ɔ katɔ. Na nteemwi-ɔ lɛnyi kedee úti úsela uwi ƒui.

² Limeyi ndi limeyi ndubumwi-ɔ lɛnyi na lɛtalaku ƒula lɛnyi katɔ uwi ndi uwi.

³ Unwoti Katɔti úbomo geen, na ɔ́manku bumwi. Na nwuna ɔyikun ni, ukyuli ɔdi ulénu-nwu kalɔ kudii.

⁴ Ƒula ablala ɔsu ni, badubo-ɔ bumwi ɔ́si kaba útédu kaba. Na badubo ƒula ala enengudi lidu lidu ani na ábla lɛsa bɔkɔ.

⁵ Badubɔsu kalɛ na ƒula lɛgadi liikeye, na ndubulie kalɔ na liduo lɛlɔ kemmo lɛnu ƒula akɔla ala budie taatina lidu lidu lɛni na aabla.

⁶ Na bekyuli badubɔsu ala enengudi ani na ábla, na lidie ƒula ɔyikun bonwu keyi lɛtina.

⁷ Badubo lɛbuni bonwu lɛni na ábla-bu butaasu ku lɛlɔyɔ, na bedie agya basu kalɛ na ese siin na ebo lɛƒɔndia.

⁸ Unwoti ubo lɛƒɔndia na ɔɔnu kɔnyana na uléti kɔnyi pla pla, na ɔɔyɔ́ bekyuli uwi ndi uwi.

⁹ Unwoti Katɔti ɔdia ute ukyuli biala. Na ala ani ƒui na údie ni, ɔɔnu ana ƒui kɔnyana.

¹⁰ O Unwoti, ala ani ƒui na édie adubumwi ƒula lɛnyi. Na ƒula bekyuli kedee ƒui badubo-ɔ lɛnyi katɔ bɔtalaku.

¹¹ Badubɔsu kalɛ na ƒula lɛga kadikɔ keekeye ku kalɛ na ebo ɔyikun.

¹² Na ɔmɛni ɔdubɔya na ukyuli biala ɔnu ƒula ablala bonwu ɔti ku kalɛ na ƒula Katɔ Ɔga Ɔma lɛgadi liikeye.

¹³ Na ƒula lɛga kadikɔ kammɔ keeebo kawɔlɔkɔ na awɔ kani ndubɔdi lɛga buteesie uwi ƒui. Unwoti ɔɔdi nwuna linyese lɛlɔ na ubo lɛƒɔndia na nwuna ablala ƒui kemmo.

¹⁴ Na bekyuli bani ƒui mɔɔbla kpɛtɛ kpɛtɛ ni, Unwoti ɔɔda-ma na ɔɔkya-ma ɔyikun. Na bani na bakya lɛbibo kemmo ni, uukpó teete-ma.

¹⁵ Ƒula ala ediedi ƒui aanu-ɔ anumi. Na awɔ muute-ma bana lɛdila na uwi lɛlɔ.

¹⁶ Awɔ muubimi ƒula enu na lɛla biala nli ngba lɛɛkɛ́ nina lɛla lɛni na ɔɔwia.

¹⁷ Unwoti use siin na ulu biala lɛlɔ, na ubo lɛƒɔndia na nwuna ablala ƒui kemmo.

¹⁸ Unwoti ude bekyuli bani mɔɔkpali-nwu ulu lɛlɔ ku ɔbu geen.

¹⁹ Bekyuli bani ƒui mɔɔyia-nwu ku ɔbu ni, ɔɔbla bana lɛyɔla teete-ma. Na uunú bana kɔvanu na uubo taabaƒɔ-ma si bévele-nwu.

²⁰ Na bani ƒui mɔɔyɔ́-nwu ni, ɔɔgyumana-ma. Nsu balalane ama ni, ɔdubɔyila-ma udu.

²¹ Ndubumwi Unwoti uwi biala. Amii nwuna ala ediedi ƒui bimwi-nwu lɛnyi kedee ɔ́si ɔƒɛni úsela uwi ƒui.