Kɔgya 140 - Katɔti Ɔku Kedee

¹ O Unwoti, die-mi na bekyuli bekpidi enu kemmo. Na agyumana-mi na lɛlɛ kalala bablane enu kemmo.

² Likpidi bɔbla kakali kani na bekyuli bammɔ beeti. Na baakya kekpo uwi ndi uwi.

³ Bágyu bana inye beti yayaaya aani balakpi. Na bana inye bɔɔdú bekyuli aani kɔlakpi bɔdu kalɛ.

⁴ O Unwoti, da-mi die bekyuli bekpidi bamɛni enu kemmo. Na agyumana-mi na lɛlɛ balalane bani mɔɔwia ka bekpeli-mi lɛgba na bayila-mi udu mɛni kudɔ.

⁵ Ɔsika bekyuli bekpidi bákywɛ-mi kɔkpagyuɛ bése. Na béwi bana lɛsawu lɛnɔ bése-mi kɔvinkɔ.

⁶ O Unwoti, mɔɔkpali-ɔ, awɔ ndi mina Katɔti. Nu-mi bɔkpali.

⁷ O Unwoti Ɔyikune Ƒui, awɔ ndi mina ɔƒɔne ɔni mɔɔgyumana-mi kpakplaa. Na awɔ nékpo éte-mi na kekpokɔ.

⁸ O Unwoti, taya na kakali kani na mina bekisine bábla mina lɛlɔ ubo-nwu kemmo. Amu badubɔkɛ-mi lɛlɔ ɔyikun na benye beteekpoku-mi uwi ƒui.

⁹ Taya na bani náka-mi bákya na baawia-mi likpidi badi-mi lɛlɔ. Ya na ɔgbankpi ɔni baawia ka ubo-mi lɛlɔ unwini usie-ma kudɔ.

¹⁰ Na aya na agyabi ani náƒɔ ogya ewi-ma lɛlɔ. Na ebo-ma atákya lɛgyavonku kemmo na ubu voo kemmo kalɛ na basɔ balálɛ kudii!

¹¹ Taya na ukyuli ɔni muubile bekyuli anyi ɔkɛ bɔnwuna bɔdi na kalɔ kamɛni lɛlɔ. Ya na lɛbibo lɛsiaku bekyuli bani muuti kalala kasusu.

¹² Unwoti, ngyi nwaa ka eekpó teete bawabane na ɔgbankpi kemmo. Na aanu bani mɔɔyaki ala lɛlɔ.

¹³ Sɔsɔ geen ni, bekyuli bani nse siin badubo-ɔ enu bɔgya, ɔsika badubo bulie na ƒula anumi uwi biala.