Kɔgya 132 - Katɔti Ɔku Kedee

¹ Unwoti, nyimo Dawid lɛbibo lɛni kenye na unye kpakplaa.

² Na ɔ́kpali Katɔti úse kenye úte Unwoti ɔni ndi Yakob Katɔti Ɔyikune Ƒui ɔnini,

³ “Lɛɛɛdubo mina ɔtɔ buduo. Na lɛɛɛdubo busie butátɛ lɛnɔ.

⁴ Na lɛɛɛdubo mina anumi bubile nnii mɔɔlɛɛ iye libo mina anumi muedi,

⁵ úti útédu ka lɛ́ka kesii kadi bɔwia bute mina Unwoti ɔni ndi Yakob Katɔti Ɔyikune Ƒui.”

⁶ Búnu ka nwuna Bunyimi Adaka ɔkya Eƒrata na bɔ́nu-nwu na Yearim alakpi akɔ.

⁷ Na bɔ́su bɔnii bɛya na buteesie Unwoti kakpakɔ butákpa-nwu na katɔma kedee kammɔ kemmo na nwuna lɛgba akɔ.

⁸ O Unwoti, ta ku ƒula Bunyimi Adaka na atina ƒula ɔyikun. Na esie etélie ƒula keliekɔ.

⁹ Ya na ƒula bakpane bataabla ala ani nse siin uwi biala. Na aya na ƒula bekyuli kedee bebo kudu ku lɛlɔyɔ.

¹⁰ Ɔ́si ƒula kenye kani nése éte ƒula kabla ɔblane Dawid ɔsu ni, teni ƒula Ukyuli Ɔƒunadi ɔmmɔ.

¹¹ Ɔsika Unwoti úse kenye úte Dawid, na ulénwini kama ulakya nwuna linyese lɛmmɔ kudii. Ɔ́su-nwu ɔnini, “Ƒula kaba kemmo ubi ɔdi na ndubɔya na ɔdi lɛga na ƒula lɛga kadikɔ.

¹² Si ƒula bebi básia mina ɔda bubo anu kpakplaa na bábla básia ɔda ɔni líbo-ma lɛlɔ ni, bana bebi lɛnɔ badubo butaadi lɛga lɛmmɔ uwi biala.”

¹³ Ɔsika Unwoti ɔ́ƒuna Sion na ɔdi-nwu lɛyɔla ka uti mmɔ ɔbla nwuna keliekɔ.

¹⁴ Mɛni na ndubulie ntaadi lɛga ɔsi ɔƒɛni úsela ƒui. Na mɛni na ndubo bulie uwi ƒui, ɔsika mɛni kadia-mi.

¹⁵ Ndubute Sion lɛla biala baawia kaduɛ. Na ndubɔya na nwuna bawabane badi bemo.

¹⁶ Na ndubɔya nwuna bakpane bataabla ala ani nse siin uwi biala, na lɛya nwuna bekyuli kedee bebo kudu ku lɛlɔyɔ.

¹⁷ “Mɛni na ndubuse Dawid kaba kemmo ubi likpo na ɔdi lɛga linengudi. Na mina Ukyuli Ɔƒunadi ɔmɛni ni, lɛ́ɛklibi-nwu líse aani bukeye ute mina bekyuli.

¹⁸ Na nwuna bekisine ƒui ni, kɔƒa kɔdubɔƒɔ-ma lɛlɔ ƒui aani awu. Nsu anwu nwuna lɛga kadikɔ kagabwa kadubukeye busie ɔgyu.”