Litemi Batɛne 18 - Katɔti Ɔku Kedee

Mika Ku Dan Kaba Bekyuli Lɛlɔ Litemi

¹ Uwi ɔmmɔ kemmo Israelƒuɔ beeebo ɔga ɔdi tɔ. Na emeyi amɛni kemmo kani na Dan kɔdua bekyuli lɛnɔ báta na bakɛ baaví taawia kesii kani bada bana keliekɔ. Ɔsika kɔnu kútetuku-ma tɔ bana kadikɔ na Israelƒuɔ adua kemmo.

² Anwuɔsu Dan kɔdua bekyuli bamɛni bédie bekpone ɛlɔ básiku bana kaduli kemmo na bási Sore ku Estaol lɛma kemmo. Na bébo-ma ɔda ka besie na betéyu bana kalɔ kammɔ banu. Bekyuli bamɛni benye béte kaba kammɔ ɔtɔ bekyuli ƒui. Ka bétéduo ɔma ɔni nwi Eƒraim abi eli ni, bátálɛlɛ Mika kaduli.

³ Uwi ɔni na bakya mmɔ ni, bábanu Lewini okloƒu ɔdi báti. Ɔmɛni ɔsu bákpɛ béde-nwu na béye-nwu banini, “Bi na aabla mɛni? Na ɔma lɛnɔ néti-ɔ úboku mɛni?”

⁴ Na údie kenye ɔnini, “Ami ku Mika nátɛmi na línu kalɔ ka mabla ɔkpane mete-nwu na utaaƒɔ-mi kayu.”

⁵ Na batu bammɔ bévele ɔkpane ɔmmɔ banini, “Ye siku Katɔti kudɔ si bula ulu busie ɔdubɔdia ute-bu?”

⁶ Amu na ɔkpane ɔmmɔ údie kenye ɔnini, “Lɛla biala liiibo na lɛdubukpoku-mii. Ɔsika Unwoti ɔkya ɔɔgyumana-mii na bina ulu busie bɔmɛni kemmo.”

⁷ Anwuɔsu nkyuli ɛlɔ bamɛni bátɔlɔ na béduo ɔma ɔni baalɔ banii Lais. Na bánu kalɛ na bekyuli bammɔ belie ƒaa aani Sidonƒuɔ, na bese buɛɛ na beli ku atubɔyɔ. Na ɔdi ulákyaku ɔkpanadi unyeƒi. Na bébo lɛla biala baawia. Na ama ku Sidonƒuɔ bágyunku lɛlɔ, na ama ku bekyuli biala beeebo kɔna kɔdi.

⁸ Ka nkyuli ɛlɔ bamɛni bénwini bésie Sore ku Estaol ni, bana banwani béye-ma banini, “Dɛ na bɛ́nu ala ammɔ bɛ́vinku?”

⁹ Amu na básu-ma banini, “Bɛta na butékpoku Laisƒuɔ. Ka bɔ́nu kalɔ kammɔ ni, kadia. Na bitaya na bubile uwi. Bɛta na butékpoku-ma na bɔƒɔ kalɔ kammɔ.

¹⁰ Na si bísie bítéduo mmɔ ni, bɛdubɔnu ka bekyuli bammɔ baaadaku lɛla lɛdi. Na ɔma ubendi lɛnɔ na ɔdi. Na bebo lɛla biala na ukyuli ɔɔwia. Na bɔɔsu-mii bɔnii Katɔti úuti bekyuli bammɔ ɔ́kya-mii enu kemmo kukuuku.”

¹¹ Amu na Dan kɔdua bekyuli nkyuli eti leevu-anyɔ bátu akpagya na báta bási Sore ku Estaol ka betékpoku-ma.

¹² Ka bésela ni, bétédi benye Kiriat-Yearim na Yuda kalɔ lɛlɔ. Ɔmmɔ ɔsu na Kiriat-Yearim kada kakɛ baalɔ banii Dan Kalɛlɛkɔ úti úbedu ɔmwi kadi.

¹³ Na ka bási mmɔ ni, bávi bátásia Eƒraim abi eli na bétédu Mika kaduli.

¹⁴ Amu ka nkyuli ɛlɔ bani nétéyu Lais ɔma bánu mmɔ ni, básu bana banwani banini, “Bɛgyi ka kaduli kadi kakya mɛni kani na bánwi baƒiɔ badi na béti sika ɔƒualadi bákwa-nwu, na baƒiɔ bamba lɛnɔ ku ɔkpane awu gyɔlɔɔ lɛnɔ bese mmɔ? Bi ndi bina kasusu na lɛla lɛni na ɔlɛka bɔbla lɛlɔ?”

¹⁵ Ɔmmɔ ɔsu bésie Mika kaduli kesii kani na Lewini okloƒu ɔmmɔ ulie. Na béye Lewini ɔmmɔ banii, “Dɛ na uwi-nwu lɛlɔ?”

¹⁶ Uwi ɔmmɔ kemmo ƒui na Dan kɔdua bekyuli eti leevu-anyɔ bani nátu akpagya bésela kekpo mmɔ benye kaduli kammɔ kayakun.

¹⁷ Na bana ɛlɔ bani na bátala mmɔ ama amu ni, bésie siin na bétéduo kaduli kammɔ kemmo na béti baƒiɔ bani bánwi na béti sika ɔƒualadi bákwa-nwu ku baƒiɔ bamba bani nse mmɔ ku ɔkpane awu gyɔlɔɔ. Nsu ɔkpane ɔmmɔ ku bekpone eti leevu-anyɔ bani nátu akpagya mmɔ ama amu ni, benye kaduli kammɔ kayakun.

¹⁸ Ɔni na banana bammɔ bétéduo Mika kaduli na béti baƒiɔ bani bávɔ mmɔ ƒui ku ɔkpane awu ɔmmɔ ni, ɔkpane ɔmmɔ úye-ma ɔnini, “Bi na bɛɛbla mɛni?”

¹⁹ Na banana bammɔ bédie kenye banini, “Ba lɛsɛ na tasu ku lɛla. Mmomu siaku-bu kama na ababla bula ɔkpane ku bula ɔti. Na buuye-ɔ bɔnii ɔɔɔdia ka ataabla kaba ku ɔtɔ bekyuli kabla utulo ka ataabla ukyuli unwi kaduli bekyuli kabla?”

²⁰ Mmɔ na kubiti kɔ́da ɔkpane ɔmmɔ, na úti ɔkpane awu ku kaduli baƒiɔ ku ligyii lɛnwidi lɛmmɔ ɔ́da na ɔ́siaku-ma ɔ́tɔlɔ.

²¹ Na bénwini bátɔlɔ na báya na bana bebi ku bebuo ku bana akɛla ágyu atɔ-ma.

²² Ka bésie ulugyuɔ bási Mika kaduli ni, Mika ɔ́kpali nwuna liku bekyuli ɔ́sala ka bebebunku-nwu na betékpo. Na bésie bátáda bálɛ Dan kɔdua bekyuli lɛlɔ.

²³ Na bése kalɔ baakwanyiku Danƒuɔ. Na Danƒuɔ bamɛni bénwini na béye Mika banini, “Bi mɔɔlɛ́ku-ɔ ɔsu na éti bekpone bamɛni ka bebekpoku-bu?”

²⁴ Na Mika údie kenye ɔnini, “Bíti mina baƒiɔ bani lɛ́vɔ ku mina ɔkpane bɛ́tɔlɔku. Na ɔƒɛni ni, bi nsɔ mbo lite lɛlɔ? Na biiye-mi bɛnii, ‘Bi mɔɔlɛ́ku-mi?’ ”

²⁵ Na Danƒuɔ bamɛni básu Mika banini, “Takyaku-bu unyeƒi ɔdi. Si ɔɔɔdi lɛni ni, bekyuli badi badubo kɔnyi bɔkɛ na bekpoku-ɔ. Na ƒula kaduli bekyuli badubɔyila bana ngba.”

²⁶ Ɔmɛni ɔsu Danƒuɔ báwia ulu na bátɔlɔ. Na ka Mika ɔ́nu ɔ́ti ka Danƒuɔ bamɛni bebo ɔyikun bétulo-nwu ɔsu ni, únwini kama na ɔ́tɔlɔ úsie kaduli.

²⁷ Amu na béti ala ani Mika ɔ́vɔ ku nwuna ɔkpane na bávi bésie Lais. Na bétékpoku bekyuli bani naaagyi beeese na belie atu bɔyɔ kemmo mɛni. Na Danƒuɔ béti bana kuwii na békpoku-ma, na bákyula bana ɔma unengudi ɔmmɔ.

²⁸ Na ukyuli ɔdi uuubo na ukpo ɔƒɔ-ma, ɔsika ama ku Sidonƒuɔ bágyunku lɛlɔ. Na ama ku bekyuli badi lɛnɔ baládi kɔna. Na ɔma unengudi ɔmmɔ ude kɔwɛ kɔni nwi Bet-Rehob. Na Danƒuɔ bamɛni básɔku ɔma ɔni bákyula mmɔ bátu. Na béti mmɔ bábla bana keliekɔ.

²⁹ Na básia ɔma ɔmmɔ lɛnyi banii Dan ɔni ndi bana bati kuuku ɔti. Na Dan ɔmɛni ɔti ndi Yakob. Na nka ɔma ɔmmɔ na bátaalɔ banii Lais.

³⁰ Ɔma ɔmɛni na Danƒuɔ bamɛni bátu baƒiɔ bammɔ balɛ. Na Yonatan ɔni ndi Gerson ubidi na ɔdi Mose uwɔ ni, anwu ku nwuna bebi mɔɔdi bakpane teete Danƒuɔ bammɔ úti útédu ka béƒie-ma bésienku kalɔ bamba lɛlɔ.

³¹ Na bákya bátaakpa Mika baƒiɔ bammɔ ina ka Katɔti kakpakɔ kakya Silo uwi ɔmmɔ ƒui.