Litemi Batɛne 15 - Katɔti Ɔku Kedee

Simson Ɔ́ƒɔ Ƒilistiƒuɔ Likpidi Kayu

¹ Uwi ɔdi kama ɔni na Ƒilistiƒuɔ baaƒɛ edula ni, Simson úti ese ɔkɔdi ɔ́da na úsie ɔnii utásala ulekudi. Na ka údu kaduli ni, ɔ́su ɔnini, “Te-mi kuƒi na liduo ɔtɔ kemmo ntánu mina ulekudi.” Nsu ulekudi ɔti ɔ́su-nwu ɔnini, “Oowo! Kuƒi kuuubo.”

² Na ɔ́sɔ ɔ́su Simson ɔnini, “Lɛ́ɛƒɔ lɛ́di geen ka eekisi uleku ɔmmɔ, anwuɔsu líti-nwu líte ƒula ɔkpana. Nsu ɔnamudi ɔkya, na ɔɔdia bɔnu teetulo-nwu ƒui. Anwuɔsu akana eti anwu mmomu.”

³ Amu na Simson ɔ́su ɔnini, “Ɔƒɛni ukyuli biala ɔsɔ uládu-mi kɔtɔ na lɛla lɛni ndubo Ƒilistiƒuɔ bamɛni bɔbla lɛlɔ.”

⁴ Anwuɔsu Simson úsie na útéƒie beƒukutu eti aku na úbo bana lɛka likpo ɔda lɛlɔ inyɔ inyɔ. Na ɔ́tu likpo lɛdi ɔ́da lɛka ekpo ammɔ ƒui lɛlɔ.

⁵ Na úti beƒukutu bammɔ anumi ɔ́tina Ƒilistiƒuɔ edula mmo na ɔ́nyonu-ma. Na békeli bétéduo-mu kemmo. Na ogya úduo mmo bɔmmɔ ƒui na bɔ́kywi. Na ogya ɔmmɔ ɔ́vi útákyula bana adingyii ku bana nnɔ egyii mmo lɛnɔ.

⁶ Amu na Ƒilistiƒuɔ béye banii, “Ɔma nábla udu ɔmɛni?” Na básu-ma ka Simson ɔni ndi Timnani ɔmmɔ ubidi ɔgyani nábla udu ɔmmɔ. Ɔsika békpeli ulekudi báƒɔ béte nwuna ɔkpana ɔsu. Anwuɔsu Ƒilistiƒuɔ bésie na bátákyula uleku ɔmmɔ ku ɔti lɛnɔ.

⁷ Na Simson ɔ́su-ma ɔnini, “Ɔ́si lɛla lɛni na bɛ́bla mɛni ɔsu ni, lɛɛɛdubo-mii bɔda bukpoku bɔya úti útédu ka bɛ́ƒɔ-mi kayu ƒui.”

⁸ Na úkpoku-ma kaduɛ na ɔ́du-ma pii. Amu na úsie útélie atakpɛ ubu ɔdi kemmo na Etan.

Simson Úkpo Ɔ́di Ƒilistiƒuɔ Lɛlɔ

⁹ Amu na Ƒilistiƒuɔ báta bétékpoku Yudaƒuɔ na kesii kani nde Lehi. Na Yuda bekyuli béye-ma banini, “Bi ɔsu na bɛ́ta bíbekpoku-bu?”

¹⁰ Na bédie kenye banini, “Búbo ka bubeƒie Simson bɔtɔlɔku na bɔbla-nwu kalala kani na ɔ́bla-bu bɔsia.”

¹¹ Mmɔ na nkyuli mpim ɛtɛ bási Yuda na bésie Etan na bátánu Simson na atakpɛ ubu ɔni kemmo ɔ́ƒɔ lɛlɔ ɔkya mmɔ. Na básu-nwu banini, “Aaagyi ka Ƒilistiƒuɔ kalɔ na bɔkya na ama mɔɔdi-bu lɛlɔ yoo? Na bi ɔsu na ábla-bu lɛni?” Na ɔ́su-ma ɔnini, “Lɛla lɛni bábla-mi ni, ani kani na ami lɛnɔ lɛ́bla-ma.”

¹² Mmɔ na básu-nwu banini, “Búbo ka bubenyimi-ɔ na buti-ɔ butákya Ƒilistiƒuɔ enu kemmo.” Amu na Simson ɔ́su-ma ɔnii, “Bise kenye ka amii alati biládu-mi.”

¹³ Amu na bekyuli bammɔ básu-nwu banini, “Búnu, buládu-ɔ. Mmomu bɔdubunyimi-ɔ na buti-ɔ bɔkya-ma enu kemmo.” Anwuɔsu béti lɛbuli lɛwɔdi inyɔ, na bényimi-nwu. Na bákpanku-nwu bálɛku atakpɛ ubu ɔmmɔ kemmo.

¹⁴ Na uwi ɔni na badaku Lehi budu ni, Ƒilistiƒuɔ bálɛ bébo ku kɔvanu. Mmɔ na Unwoti Kɔyu kɔ́ƒɔ Simson lɛlɔ kemmo ku ɔyikun. Na kɔbuli kɔni béti bényimi-nwu enu mmɔ kɔ́bla aani kɔbuli kɔni ogya ɔ́kyula-ku. Na kɔ́lɛ-nwu enu kemmo kúwi kalɔ.

¹⁵ Na ka ɔ́nu ebuo ala utine ɔnungla likubi lɛdi ni, úti-ni na ɔ́du bekyuli apim unwi.

¹⁶ Amu na Simson ɔ́su ɔnini, “Ka líti ebuo ala utine likubi linwi ni, lɛ́kɛ ekubi ammɔ pii. Na ka líti ebuo ala utine ɔnungla likubi linwi ni, lɛ́du nkyuli apim unwi.”

¹⁷ Na ka ɔ́tɛmi ɔ́wɔlɔ ni, úbo ebuo ala utine likubi lɛmmɔ úvaakun. Na kesii kani na ala ammɔ álɛ mmɔ baalɔ banii Ramat-Lehi.

¹⁸ Na ka utukwɛ úbo ɔɔda Simson ɔsu ni, úwulo ɔ́kpali Unwoti ɔnini, “Awɔ náya na ƒula kabla ɔblane úkpo ɔ́di lɛlɔ. Anwuɔsu bunye na adubunye anu na utukwɛ ɔdu-mi na anyonu-mi akya bekyuli bani neeekulo ago mɛni enu kemmo?”

¹⁹ Amu na Unwoti ɔ́ya na kalɔ kébimi na Lehi mmɔ, na ntu bɔ́bwɛ bɔlɛ mmɔ. Na Simson ɔ́ni ntu bɔmmɔ na úse kalɔ ɔɔkɛ́ lɛlɔkplu. Ɔmɛni ɔsu básia libiɔ lɛmmɔ lɛnyi banii En-Hakore. Na libiɔ lɛmmɔ lɛmu lɛkya Lehi mmɔ úbedu ɔmwi kadi.

²⁰ Simson ɔ́tɔnku Israelƒuɔ akwa aavlanyɔ na Ƒilistiƒuɔ uwi ɔmmɔ.