Litemi Batɛne 12 - Katɔti Ɔku Kedee

Bádi Eƒraimƒuɔ Lɛlɔ

¹ Eƒraimƒuɔ banana bálɔ bana bekpone básala na bávia Saƒon na bátásu Yeƒta banini, “Bi ɔsu na ésie na étékpoku Amonƒuɔ na átalɔ-bu na bubebunku-ɔ? Ɔmɛni ɔsu bɔdubo ƒula kaduli bɔkyula bɔsia-a lili.”

² Amu na Yeƒta údie kenye ɔnini, “Kadɔ kebendi kadi kébeduo Amonƒuɔ ku ami ku mina bekyuli ntɛ. Na ina ka liye-ɔ kebunku ni, átakpete-mi na aƒɔ-mi alɛku bana enu kemmo.

³ Na uwi ɔni lɛ́nu lɛ́ti ka aaadubo-mi bubunku ni, líti mina ngba lɛ́kpa na lɛ́vi lísie ńtékpoku Amonƒuɔ. Na Unwoti úti-ma ɔ́kya-mi enu kemmo. Na bi ɔsu na bíbo mɛni bibekpoku-mi?”

⁴ Mmɔ na Yeƒta ɔ́lɔ nwuna bekpone bani nkya Gilead ɔ́sala na bétékpoku Eƒraimƒuɔ. Na Gileadƒuɔ bádu-ma kaduɛ, ɔsika básu banii, “Amii Gileadƒuɔ, bɛ́mami lɛlɔ bɛ́lɛku Eƒraimƒuɔ ku Manaseƒuɔ lɛlɔ.”

⁵ Na kalɛ na Eƒraimƒuɔ békeli ɔsu ni, Gileadƒuɔ békpo báƒɔ kesii kani na baasia taavia Yordan Ketu. Na si Eƒraim ɔdi ɔɔwia ka ubavi na uvele kuƒi ni, na Gileadƒuɔ banana beeye-nwu banini, “Eƒraimni na adi?” Na ɔdubɔsu ɔnini, “Oowo.”

⁶ Mmɔ na baasu-nwu ka ɔlɔ “Shibolet.” Nsu ɔdubɔsu ɔnii, “Sibolet.” Ɔsika ulakana lɛnyi lɛmmɔ bɔlɔ kaduɛ. Mmɔ kani na beeƒie-nwu na badu-nwu na kesii kani baavia Yordan mmɔ. Na uwi ɔmmɔ kemmo ni, bádu Eƒraimƒuɔ bekyuli mpim aavlene-inyɔ.

⁷ Ɔmmɔ kama Yeƒta ɔ́tɔnku Israelƒuɔ akwa aku, asa na úkpi na báva-nwu na nwuna ɔma ɔni ndi Gilead.

Ibsan Ku Elon Ku Abdon Lɛlɔ Litemi

⁸ Yeƒta kukpi kama ni, Ibsan ɔni nási Betlehem úbatɔnku Israelƒuɔ.

⁹ Na ubo bebi banana avlaatɛ ku belekubi avlaatɛ. Na úti nwuna bebi belekubi úte ɔtɔ bamba bekyuli na béti-ma. Anwu úsie útéti ɔtɔ bekyuli bamba belekubi lɛnɔ úboku nwuna bebi bananabi avlaatɛ na béti-ma. Na Ibsan ɔ́tɔnku Israelƒuɔ akwa maatɛ.

¹⁰ Amu na Ibsan úkpi na báva-nwu na Betlehem.

¹¹ Ibsan kama ni, Sebulonni Elon ɔ́tɔnku Israelƒuɔ akwa leevu.

¹² Na ka úkpi ni, báva-nwu na Ayalon na Sebulon kalɔ lɛlɔ.

¹³ Ibsan kama ni, Hilel ubidi ɔni baalɔ banii Abdon na ɔdi Piratonni nátɔnku Israelƒuɔ.

¹⁴ Na úbo bebi bananabi aavlene ku bawɔ avlaatɛ. Na úbo bebuo ala betine liti ku aavlanyɔ bani kama na úteele. Na ɔ́tɔnku Israelƒuɔ akwa maane.

¹⁵ Na Abdon ɔni ndi Hilel ubi ɔmɛni úkpi na báva-nwu na Piraton na Eƒraim kalɔ kani nkya Amalekƒuɔ abi lɛlɔ.