Lewiƒuɔ Ɔda Bubo 22 - Katɔti Ɔku Kedee

Kalɛ Akpala Ammɔ Ɔlɛka Abla Kedee

¹ Katɔti úbo Mose ɔda ɔnini,

² “Su Aaron ku nwuna bebi anii beti ɔbu geen bete ala kedee ani na Israelƒuɔ béboku na bábla-nya sɛsɛɛ béte-mi kalɛ na belebile-mi lɛnyi kedee. Ami ndi Unwoti.

³ “Su-ma anini, ‘Ɔ́si ɔƒɛni úsela ni, bina bawɔ bani na ɔdi ɔ́sɔ ɔsu na beeese kedee batani betede etela ani na Israelƒuɔ béboku-mi na bábla-nya sɛsɛɛ béte Unwoti si ɔɔɔdi lɛni badubɔyila ukyuli ɔmmɔ udu. Ami ndi Unwoti.

⁴ “ ‘Si ɔlɔna ɔlɛgyie uukpóku Aaron bawɔ ɔdi iye ɔdi ubo kanɔkɔ ɔlɛ ni, utalɛka ɔdi akpala adila adi útédu ka nwuna lɛlɔ lɛ́bla sɛɛn. Nwuna lɛlɔ lɛdubuse lɛlɔ lɛnɔ si útuku lɛla lɛni nétuku ukpine na liisé lɛlɔ iye si útuku ɔnana ɔni na lɛlɔ líbo-nwu,

⁵ iye útuku bebuo udu ɔni neeese sɛɛn ɔdi iye ukyuli ɔni neeese sɛɛn ɔ́ya na ɔkpane ɔmmɔ uusé lɛlɔ ni, ɔɔɔdi ka ɔdi adila ammɔ adi.

⁶ Ukyuli ɔni nétuku ala amɛni ɔdi ɔdubuse lɛlɔ utédu useyi uwi na útalɛka ɔdi adila kedee ammɔ adi útédu ka ɔ́kpi ntu.

⁷ Na ɔƒɛ bɔnu kama asa na ɔdubɔbla sɛɛn na ɔkana na ɔdi adila kedee ammɔ, ɔsika anwu ɔdi adidi na adi.

⁸ Utakun ebuo ukpine iye ebuo ɔni beƒiebuo nádu-nwu báva na ɔya na uteese lɛlɔ. Ami ndi Unwoti.

⁹ “ ‘Bakpane ƒui ɔlɛka badi ɔda bubo bɔni líti muute-ma mɛni lɛlɔ kalɛ na baláƒiɔ na bekpi si bátanu ala ammɔ bátabu. Ami ndi Unwoti ɔni nédie-ma úse sɛsɛɛ líte lɛlɔ ka bese kedee.

¹⁰ “ ‘Ɔƒɔ iye ukyuli ɔni naaadi ɔkpane ɔmmɔ ɔtɔ ukyuli iye ɔɔbla kabla teete ɔkpane ɔdi utadi adila kedee ammɔ.

¹¹ Nsu ukyuli uyedi ɔni na ɔkpane ɔmmɔ úti nwuna egulabi úye iye báwɔ-nwu na ɔkpane kaduli ɔkana na ɔdi nwuna adila.

¹² Ɔkpane ubi ulekubi ɔni nlieku ɔnana ɔni na útasi ɔkpane kaba kemmo utadi adila kedee ammɔ.

¹³ Nsu si ɔdi ukpinele iye ɔ́lɛ kɔgya na uuubo bebi badi na ɔ́sɔ únwini úsie ulie ɔti kesii aani nwuna ligblebi uwi ni, ubo kuƒi ka ɔdi adila ammɔ adi biala. Ukyuli keeke ɔdi biala uuubo kuƒi ka ɔdi adila ammɔ.

¹⁴ Si ukyuli ɔni nátasi ɔkpane kaba kemmo útati na ɔ́di adila ammɔ adi ni, ɔlɛka ɔƒɔ adila ani na ɔ́di mmɔ kayu na ɔ́sɔ uti adila ammɔ kuye bɔƒɔ lɛkpa lɛlɔndi ubunku kayu kammɔ lɛlɔ ute ɔkpane ɔmmɔ.

¹⁵ Akpala etela ani na Israelƒuɔ bammɔ béboku Unwoti ni, bakpane bammɔ batabla na eteese lɛlɔ

¹⁶ na baya na ukyuli ɔni na útalɛka ɔdi adila ammɔ adi ɔdi nya na ɔƒiɔ na uti kɔtu bɔni uboku lɛlɔ. Ami ndi Unwoti ɔni nábla akpala ammɔ kedee.’ ”

Akpala Ani Nátamanku

¹⁷ Amu na Unwoti ɔ́su Mose ɔnini,

¹⁸ “Bo Aaron ku nwuna bebi bananabi ku Israelƒuɔ bammɔ ƒui ɔda anini, ‘Si Israelni ɔdi iye ɔƒɔ ɔni nli Israelƒuɔ akɔ úti etela adi úboku ka babla akpala bɔkyula ƒui ɔdi uti udie lili na kenye kani na úse ɔsu iye kaƒɔ ƒaa akpala ni,

¹⁹ ɔlɛka uti koƒonu kɔgyani iye ketukpa kani nátasɔ ɔsiku nwuna bebuo akɔ uboku kalɛ na Unwoti ɔƒɔ akpala ammɔ ka ámanku na nwuna lili.

²⁰ Ɔdi uteboku ebuo ɔni násɔ, ɔsika Unwoti ɔɔɔdubo-nwu bɔƒɔ bute-nwu.

²¹ “ ‘Si ɔdi úti ebuo ɔ́siku nwuna bebuo akɔ ɔduboku ubabla unwi bɔbla akpala na kenye kani na úse ka udie lili iye kaƒɔ ƒaa akpala ni, uboku ebuo ɔni nátasɔ kalɛ na Unwoti ɔƒɔ ute-nwu.

²² Ɔdi uteboku ebuo ɔni na anumi ábwɛ-nwu iye ulesie kaduɛ iye ebuo ɔlɛne udu biala ɔnii beti basia lɛkpabi lɛlɔ bakyula bete Unwoti.

²³ Si ɔdi ɔnii ɔɔbla kaƒɔ ƒaa akpala ni, ɔkana na uboku ɔmantɛ akɔ ɔgyani iye uledi iye koƒonu kɔni na ɔ́si-nwu bɔwɔ kemmo na kesii kadi kásɔ, nsu ɔɔɔdia uuute lili budie na kenye kani na ɔdi úse ɔsu.

²⁴ Ɔdi uteti ebuo ɔni na nwuna agobɛɛ ábwɛ iye ása iye békulo-nya bédie uteboku ɔnii ubakpa ute Unwoti. Kuƒi kuuubo na ƒula kalɔ lɛlɔ mɛni ka abla lɛni,

²⁵ na bitaƒɔ ɔmmɔ udu bitasiku ɔƒɔ ɔdi lɛnɔ kudɔ ka biti bɛkpa aani lɛdila bite Katɔti. Unwoti ɔɔɔdubo-ma bɔƒɔ, ɔsika bétedu na bɔsɔ bɔkya-ma lɛlɔ.’ ”

²⁶ Unwoti ɔ́su Mose ɔnini,

²⁷ “Si ebuo ɔdi ɔ́wɔ ɔmantɛ akɔ ubi iye koƒonu ubi ni, ɔlɛka ɔkya uni kudɔ emeyi maatɛ na ɔmmɔ kama ɔ́si limeyi maanedi úsela ni, Unwoti ɔdubɔƒɔ-nwu aani akpala bɔkyula ebuo.

²⁸ Ɔdi utadu ɔmantɛ akɔ iye koƒonu ku ubidi limeyi linwi lɛlɔ.

²⁹ “Si ɔdi ébo ka ababla linugya akpala ni, bla akpala ammɔ kalɛ na Unwoti ɔƒɔ-nya ute-ɔ.

³⁰ Ɔlɛka badi adila ammɔ limeyi lɛmmɔ kani na lɛla lɛdi litebu utédu kadi bugye. Ami ndi Unwoti.

³¹ “Bɛda mina ɔda bubo kaduɛ na bɛsiaku-mu kama. Ami ndi Unwoti.

³² Bitebile-mi lɛnyi kedee. Ɔlɛka amii Israelƒuɔ bɛnu-mi bɛti ka nse kedee. Ami ndi Unwoti ɔni náƒuna-mii sɛsɛɛ ka bise-mi kedee,

³³ na lɛ́kpanku-mii lɛ́siku Egyipte líboku ka lɛbla bina Katɔti. Ami ndi Unwoti.”