Lewiƒuɔ Ɔda Bubo 20 - Katɔti Ɔku Kedee

Ɔda Bubo Na Bekyuli Buti Bɔkpa Bute Baƒiɔ Ku Lɛyalɛ Ala Lɛlɔ

¹ Amu na Unwoti ɔ́su Mose ɔnii,

² “Su Israel kadi bekyuli ƒui anini, ‘Ɔnana biala na ɔdi Israelni iye baƒɔ bani nkya-mii akɔ na ɔdi úti ubidi ɔdi úte ɔnii bakpa bete Molek baƒiɔ ni, ɔlɛka bebo-nwu atabi badu.

³ Ndubuti mina lɛnumi lɛlɛ ukyuli ɔmmɔ lɛlɔ na likulo-nwu lidie nwuna badi akɔ, ɔsika ubidi ɔni úti úte Molek mmɔ ɔ́ya na mina Adi Kevo keesé lɛlɔ na úbile-mi lɛnyi kedee.

⁴ Na si úbebo úte ka bíni na bítadu ukyuli ɔni néti ubidi ɔ́kpa úte Molek baƒiɔ bammɔ ni,

⁵ na ami Unwoti ɔlati ndubuti mina lɛnumi lɛlɛ ukyuli ɔmmɔ ku nwuna kaduli bekyuli lɛlɔ na likulo-ma lidie bina akɔ. Ndubukulo ukyuli ɔmmɔ lidie-mii akɔ ku bani ƒui nsiaku-nwu na béti lɛlɔ bénwini aani bayalɛ na básiaku Molek baƒiɔ bammɔ.

⁶ “ ‘Ukyuli ɔni ndubusie bekyuli bani muubó like iye baakpali bekpine teeye ala teenu kudɔ na ama ku bekyuli bammɔ baabla lɛyalɛ ala ni, ndubo mina anumi budie bɔlɛ ukyuli ɔmmɔ. Na ndubɔda-nwu lidie nwuna badi akɔ.

⁷ “ ‘Bidie lɛlɔ sɛsɛɛ na bɛbla lɛlɔ kedee, ɔsika ami ndi Unwoti bina Katɔti

⁸ Bɛdi mina ɔda bubo ƒui lɛlɔ na bɛbla bɛsiaku-mu lɛlɔ, ɔsika ami ndi Unwoti ɔni mɔɔbla-mii kedee.

⁹ “ ‘Si ukyuli ɔdi úwida uni iye ɔti ɔlɛka badu ukyuli ɔmmɔ. Na nwuna ubugya ɔdubɔsia anwu ɔlati lili ka úwida ɔti iye uni ɔsu.

¹⁰ “ ‘Si ukyuli ɔdi ku nwuna ɔkpana ulekudi bátɛ ni, ɔlɛka badu bana inyɔ ƒui.

¹¹ “ ‘Si ɔnana ɔdi ku ɔti ulekudi bátɛ ni, ɔlɛka badu bana inyɔ bani nátɛ mmɔ, ɔsika ubi ɔmmɔ údie ɔbu na ɔti lɛlɔ. Na bana ubugya ɔdubɔsia ama alati lili.

¹² “ ‘Si ukyuli ɔdi ku ubidi ule bátɛ ni, ɔlɛka badu-ma na bana ubugya ɔdubɔsia-ma lili, ɔsika bábla likisila.

¹³ “ ‘Si ɔnana ku ɔnana batɛ aani kalɛ na uleku ku ɔnana baatɛ ni, ɔlɛka badu-ma na bana ubugya ɔdubɔsia-ma lili.

¹⁴ “ ‘Si ɔnana ɔdi úti ubi ku uni ni, ɔlɛka bakyula-ma na likpidi lɛmmɔ udu lɛyii udu na lilakya-mii akɔ.

¹⁵ “ ‘Si ɔnana ɔdi ku ebuo bátɛ ni, ɔlɛka badu ɔnana ɔmmɔ ku ebuo ɔmmɔ ƒui.

¹⁶ “ ‘Si uleku ɔdi ɔ́ni úde ebuo ɔdi ku kasusu ka batɛ ni, ɔlɛka badu uleku ɔmmɔ ku ebuo ɔmmɔ ƒui na bana ubugya ɔdubɔsia-ma lili.

¹⁷ “ ‘Si ɔnana ɔdi úti ɔnwani ulekubi, ɔti ubidi na ɔdi o-o, uni ubidi na ɔdi o-o ni, ɔdi kɔƒa ala bɔbla na ɔlɛka bedie-ma bana badi akɔ.

¹⁸ “ ‘Si ɔnana ɔdi ku uleku ɔni náƒɛ kɔnu iye ɔ́lɛ ɔtɔ bátɛ ni, údie-nwu kasɔngya na ɔ́nu-nwu uwi ɔni na uuuse sɛɛn, anwuɔsu ɔlɛka bedie-ma bana badi akɔ.

¹⁹ “ ‘Ukyuli ɔdi ku uni ɔnwani ulekubi iye ɔti ɔnwani ulekubi batatɛ, ɔsika ɔmmɔ ɔdubudie ɔbu na ƒula ɔtɔ iye kaduli bekyuli lɛlɔ na ɔlɛka bani bana inyɔ ƒui kɔtu.

²⁰ “ ‘Si ɔnana ɔdi ku ɔti ɔnwani uleku bátɛ ni, údie ɔbu na ɔti ɔnwani lɛlɔ na bana inyɔ bebo lɛtuni, na bɔdubukpi na bana kaba kadi kelelie-ma kama.

²¹ “ ‘Si ɔnana ɔdi úƒie ɔnwani ulekudi ɔƒɔ úti ni, bábla lɛla lɛni muusé lɛlɔ, na badubulie tawɔ tawɔ.

²² “ ‘Anwuɔsu bɛnu ka bɛ́di mina ɔda bubo lɛlɔ na bɛsiaku-mu siin kalɛ na kalɔ kani na líte-mii na bísela bulie keletuo-mii keledie aani kalɛ na ukyuli ɔɔdala teedie lɛla biala.

²³ Kadi bani bekyuli na ndubo bɔbɔku bɔlɛku kalɔ kani kemmo na bísela bulie mɛni ni, bitasiaku bana ɔbladu ukpidi kama, ɔsika ala ani muusé-mi lɛlɔ na nkisi mɛni udu na bátaabla.

²⁴ Nsu lɛ́su-mii nnini, “Bɛdubuti bekyuli bammɔ kalɔ, na ami ndubo-ka buti bute-mii na kenwini bina kadikɔ. Kalɔ kani egyiibi ntu mɔɔyu emini aani uwɔ na kana lɛlɔ bebuo baayu anyi ntu pii.” Ami ndi Unwoti bina Katɔti ɔni nédie-mii úse sɛsɛɛ úte lɛlɔ ɔ́siku kadi bamba bekyuli kudɔ.

²⁵ “ ‘Anwuɔsu bɛnu kaduɛ na bise bebuo bani nse sɛɛn ku bani neeese sɛɛn likpo. Na ɔdi biala ɔnu kaduɛ na utakun ebuo iye aasɛ iye bebweyi bani mɔɔkpɛ́ kalɔ na lɛ́su ka beeese sɛɛn mmɔ ɔdi na ubile lɛlɔ.

²⁶ Bɛbla lɛlɔ kedee bite-mi, ɔsika ami Unwoti nse kedee na ami náƒuna-mii lɛ́lɛku kadi bamba bekyuli akɔ na líti-mii lɛ́bla mina bekyuli.

²⁷ “ ‘Si ɔnana iye uleku ɔdi ɔkya-mii akɔ na uubó like iye uuye bekpine ala teenu ni, ɔlɛka bibo-nwu atabi bɛdu. Na bana ubugya ɔdubɔsia ama alati lili.’ ”