Lewiƒuɔ Ɔda Bubo 19 - Katɔti Ɔku Kedee

Ɔda Bubo Na Lɛƒiɔkpa Lɛlɔ

¹ Unwoti ɔsu Mose ɔnini,

² “Su Israel kadi bekyuli ƒui anini, ‘Bɛbla lɛlɔ kedee, ɔsika ami Unwoti bina Katɔti nse kedee.

³ “ ‘Ɔdi biala uti ɔbu ute ɔti ku uni. Na bɛdi mina Lɛnwunameyi lɛlɔ kaduɛ. Ami ndi Unwoti bina Katɔti.

⁴ “ ‘Ɔdi utesie utatákpa baƒiɔ badi iye ɔvɔ baƒiɔ badi use lɛlɔ. Ami ndi Unwoti bina Katɔti.

⁵ “ ‘Na si bina ɔdi ɔɔbla unwi bɔbla akpala ute-mi ni, ɔnu ka akpala ammɔ adubɔyɔ-mi kaƒɔ.

⁶ Bibo kuƒi ka bɛkun lɛna lɛni bíti bɛɛbla akpala ammɔ bite-mi limeyi lɛmmɔ ku kadi kégye. Nsu lɛna lɛni mebu limeyi lɛtɛdi lɛlɔ ni, bɛkyula-ni.

⁷ Si bɛ́kun lɛdi limeyi lɛtɛdi ni, ala ammɔ eeese sɛɛn, anwuɔsu lɛɛɛdubo akpala ammɔ bɔƒɔ bute-mii.

⁸ Na ukyuli ɔni makun lɛna lɛmmɔ ɔdubɔkɛ nwuna kɔtu bɔni. Ɔsika úbile Unwoti lɛla lɛni na ɔ́bla kedee. Na ɔlɛka bedie ukyuli ɔmmɔ udu bina akɔ.

⁹ “ ‘Ɔƒɛni si bísie bina mmo bɛnii bitáƒɛ bina edula ni, bitaƒɛ-nya ƒui kede kede. Mmomu bibu adi bɛkya bina mmo amadɔ iye bitaƒɛ edula wɛlɛ wɛlɛ ani nkya bina mmo mmɔ.

¹⁰ Ɔdi utasia kama utetéde nwuna adingyii ani na úude úbavi na utala ebi ani nánu ewi kalɔ. Mmomu ɔda-nya uwi bawabane ku baƒɔ. Ami ndi Unwoti bina Katɔti.

¹¹ “ ‘Ɔdi uteyu. “ ‘Na ɔdi utanyi ɔkɔ. “ ‘Na bitataanyi ɔkɔ taatɔlɔ lɛlɔ.

¹² “ ‘Ɔdi utakpali-mi lɛnyi keeke na ubile ami bina Katɔti lɛnyi. Ami ndi Unwoti.

¹³ “ ‘Ɔdi utanya nwuna ɔkpana utakya iye uyu-nwu na ulu ɔdi lɛlɔ. “ ‘Teni ƒula kabla ɔblane nwuna kayu bɔƒɔ na kadi kegye kasia egulabi ammɔ lɛlɔ.

¹⁴ “ ‘Ɔdi utewida ɔmumu iye eti lɛla lɛdi etile ɔnumbwɛne ulu mmomu bɛyia bina Katɔti. Ami ndi Unwoti.

¹⁵ “ ‘Bitatɛ litemi likpidi na bɛnya ɔwabane ɔdi bɛkya iye binye ɔlakɛne ɔdi kama mmomu bɛtɛ bina bakpana litemi ulu lɛlɔ.

¹⁶ “ ‘Bitataalɔ bina bakpana anyikpi taavi. “ ‘Na ɔdi utabla lɛla lɛni maya na nwuna ɔkpanadi ngba buduo ɔgbankpi kemmo. Ami ndi Unwoti.

¹⁷ “ ‘Ɔdi uteti ɔnwani litemi utakya kayi kemmo na uteekisi-nwu. Dɔnku ƒula ɔkpana ulu lɛlɔ nwaa kalɛ na nwuna likpidi lɛdi lilasia-a lɛlɔ.

¹⁸ “ ‘Tedie likpidi kasi iye ukyuli litemi litakya-a kayi kemmo ku kɔnyi. Mmomu yɔ ƒula ukyulikpana aani ƒula kalɛ.

¹⁹ “ ‘Bɛdi mina ɔda bubo lɛlɔ kaduɛ. “ ‘Bitaya na bebuo lidu bun bun inyɔ bakɔ lɛlɔ. “ ‘Bitava edula ebi lidu inyɔ bitasala na kemo kenwi kemmo. “ ‘Bitakya lɛwu lɛni na bédi ku unwo lɛbuli udu bun bun.

²⁰ “ ‘Si ɔnana ɔdi ɔ́tɛnku ulekubi kabla ɔblane ɔni na béevele béte ukyuli ɔdi, nsu útalɛ tɔ ɔkpa na kesii kani na ɔkya iye bátaƒɔ-nwu tɔ lili kayu ni, ɔlɛka bani-ma kɔtɔ kɔni námanku. Nsu batadu-ma, ɔsika bátaƒɔ-nwu tɔ lili kayu na ɔkɛ bɔnwuna.

²¹ Nsu ɔnana ɔmmɔ anwu ɔlɛka uti koƒonu kɔgyani ubabla kɔtɔ bukpi akpala ute Unwoti na Kasakɔ Kevo kayakun.

²² Na ɔkpane ɔdubuti kɔtɔ bukpi ebuo ɔmmɔ na ɔbla likpidi kɔtu bɔni budie akpala ute Unwoti na ɔnana ɔmmɔ likpidi lili. Na Unwoti ɔdubuti nwuna likpidi lɛni ɔ́bla mmɔ ɔ́kyiɛ-nwu.

²³ “ ‘Si bitéduo kalɔ kammɔ kemmo na bɛ́va egyiibi ni, ɔdi utede egyiibi ammɔ adi utadi na akwa atɛ edeedi kemmo si ése kalɔ ku bɔnwu. Na bɛnu egyiibi ammɔ aani lɛla lɛni baládi.

²⁴ Na lɛkwa linedi kemmo bɛnu egyiibi ammɔ aani egyiibi kedee. Na egyiibi ammɔ adubɔbla bumwi akpala ete Unwoti.

²⁵ Nsu lɛkwa lɛlɔndi bɛkana na bɛdi egyiibi ammɔ adi kalɛ na egyiibi ammɔ adubutaanwu ebi pii teete-mi. Ɔsika Ami ndi bina Unwoti Katɔti.

²⁶ “ ‘Ukyuli ɔdi biala utadi lɛna lɛni na ubugya ɔmu ɔkya-ni kemmo. “ ‘Bitebo like iye bɛbla evo ala.

²⁷ “ ‘Ukyuli ɔdi utekulo nwuna lili linwini iye nwuna ukwi na ɔdi ɔdi bɔbla ɔsu.

²⁸ “ ‘Ukyuli ɔdi utakpɛ nwuna lɛlɔ akpanabi na ukpine ɔdi ɔsu iye uti lɛla lɛdi use lɛlɔ likpo. Ami ndi Unwoti.

²⁹ “ ‘Ukyuli ɔdi utedie ɔbu ubidi ulekubi lɛlɔ na uti lɛlɔ ɔbla ɔyalɛ amu lɛyalɛ ala adubɔƒɔ kalɔ kammɔ lɛlɔ na uboku kɔnyi ku ulikplu ala bɔbla.

³⁰ “ ‘Na bɛdi mina lɛnwunameyi lɛlɔ na biti ɔbu bite mina Kevo Kasakɔ. Ami ndi Unwoti.

³¹ “ ‘Ɔdi utatálɔ ayu iye bekpine badi uteye lɛla lɛdi utenu ɔmmɔ ɔdububile-mii na biteese lɛlɔ. Ami ndi Unwoti bina Katɔti.

³² “ ‘Si bɛ́nu benengu bani náabi lɛlɔ ni, bɛta binye na bite bina batɔnkune ɔbu na biti ɔbu geen bite ami bina Katɔti. Ami ndi Unwoti.

³³ “ ‘Si ɔƒɔ ɔdi ulie-ɔ kudɔ na ƒula kalɔ lɛlɔ ni, tabla-nwu ukpidi ɔdi.

³⁴ “ ‘Ɔƒɔ ɔni nkya-a kudɔ ni, nu-nwu aani ƒula lɛlɔ ukyuli kani na ayɔ-nwu aani ƒula lɛlɔ kalɛ, ɔsika amii lɛnɔ bɛ́bla baƒɔ na Egyipte kalɔ dii. Ami ndi Unwoti bina Katɔti.

³⁵ “ ‘Bɛkɔku ala bune ku bɔbɛbɛ ku bɔkuku ku bumomo ƒui ku akɔkula ani na bálɛ ugyii bése na ámanku.

³⁶ “ ‘Biti akyami akɔkula ku unu akɔkula ani námanku bitaakɔku ala. Ami ndi Unwoti bina Katɔti ɔni nákpanku-mii ɔ́lɛku Egyipte kalɔ lɛlɔ.

³⁷ “ ‘Na bɛdi mina ɔda bubo ku ala ani ƒui na línyimi líte-mii lɛlɔ kaduɛ. Ami ndi Unwoti.’ ”