Lewiƒuɔ Ɔda Bubo 18 - Katɔti Ɔku Kedee

Ɔda Bubo Na Ɔnana Ku Uleku Bɔtɛ Lɛlɔ

¹ Amu na Unwoti ɔ́su Mose ɔnini,

² “Kɔ lɛsa te Israelƒuɔ na ásu-ma anini, ‘Ami ndi Unwoti bina Katɔti.

³ Ɔdi biala ɔda udu na bitabla likyulikpi ala ani udu na baabla na Egyipte kalɔ lɛlɔ uwi ɔni bɛ́kya mmɔ na bɛ́nu. Na bitabla likyulikpi ala ani na baabla na Kanaan kalɔ kani lɛlɔ na bísela bitélie mmɔ. Na ɔdi lɛnɔ utasiaku bana ɔbladu kama.

⁴ Ɔlɛka bɛsia mina bunyimi ƒui anu na bɛdi mina ɔda bubo ƒui lɛlɔ. Ami ndi Unwoti bina Katɔti.

⁵ Bɛsia mina bunyimi ƒui anu kaduɛ na bɛdi mina ɔda bubo lɛlɔ, ɔsika ukyuli biala ɔni mɔɔdi ɔda bubo bɔmmɔ lɛlɔ ni, ɔda bubo ulu ɔmmɔ ɔdubute-nwu ngba. Ami ndi Unwoti.

⁶ “ ‘Ukyuli ɔdi ku uleku ɔni na bede na kɔnwa kemmo batatɛnku lɛlɔ. Ami ndi Unwoti.

⁷ “ ‘Tedie ɔbu na ƒ'ɔti lɛlɔ na awɔ ku ƒ'ini bitaatɛnku lɛlɔ. Ƒ'ini na ɔdi, awɔ ku-nwu bitasala lɛlɔ ɔnana ku uleku.

⁸ “ ‘Tatɛnku ƒ'ɔti ulekudi ɔdi, ɔmmɔ ɔdubudie ɔbu na nwuna lɛlɔ.

⁹ “ ‘Útalɛka ukyuli ɔdi ku ɔnwani ulekubi bani nási bawɔne benwi kudɔ batɛ ina kaduli mmɔ na báwɔ-nwu iye kesii bamba.

¹⁰ “ ‘Útalɛka ukyuli ɔdi ku nwuna uwɔ batɛ, ɔsika kɔƒa na kɔdi-ɔ.

¹¹ “ ‘Útalɛka ukyuli ɔdi ku ɔti ulekudi ubidi ulekubi batɛ, ɔsika ƒula ɔnwani na ɔdi.

¹² “ ‘Útalɛka ukyuli ɔdi ku ɔti ɔnwani ulekubi batɛ, ɔsika ƒula ɔti ɔnwani geen na ɔdi.

¹³ “ ‘Útalɛka ukyuli ɔdi ku uni ɔnwani batɛ, ɔsika ƒula uni kani na ɔdi.

¹⁴ “ ‘Tedie ɔbu na ƒ'ɔti ɔnwani ɔnanabi lɛlɔ na awɔ ku ulekudi bɛtɛ, ɔsika úlieku ƒ'ɔti ulekudi kani na ɔdi.

¹⁵ “ ‘Útalɛka ukyuli ɔdi ku nwuna ubi ule batɛ, ɔsika ƒula ubidi ɔnanabi ulekudi na ɔdi.

¹⁶ “ ‘Útalɛka ukyuli ɔdi ku ɔnwani ulekudi batɛ, ɔsika adubudie ɔbu ƒ'ɔnwani lɛlɔ.

¹⁷ “ ‘Útalɛka ukyuli ɔdi ɔtɛnku ubi ku uni iye ɔtɛnku uleku ɔmmɔ uwɔ ulekubi ɔdi, ɔsika nwuna lɛlɔ bekyuli geen na badi. Na ɔmmɔ ɔdi likyulikpi ala bɔbla.

¹⁸ “ ‘Útalɛka ukyuli ɔdi uti ulekudi ɔnwani ulekubi na ɔtɛnku-nwu na benwini bagyulo uwi ɔni na ɔnwani udeedi ɔni na uti mmɔ uli ngba.

¹⁹ “ ‘Útalɛka ukyuli ɔdi ku uleku ɔni náƒɛ kɔnu batɛ uwi ɔni na ubugya ɔmmɔ útekulo tɔ na uuuse sɛɛn mmɔ.

²⁰ “ ‘Útalɛka ukyuli ɔdi ɔtɛnku nwuna ukyulikpana ulekudi na ubile lɛlɔ na ɔmmɔ ɔsu.

²¹ “ ‘Útalɛka ukyuli ɔdi uti ubidi iye uwɔ ute na beti bakpa bete Molek baƒiɔ na ɔya na balabu Katɔti lɛnyi na liteese lɛlɔ, ɔsika ami ndi Unwoti.

²² “ ‘Útalɛka ɔnana ku ɔnana batɛ aani kalɛ na uleku ku ɔnana baatɛ. Ɔmɛni ɔdi lɛla lɛni muusé Unwoti lɛlɔ.

²³ “ ‘Útalɛka ukyuli ɔdi ku ebuo batɛ na ɔya na nwuna lɛlɔ liteese lɛlɔ. Na útalɛka uleku ɔnyonu lɛlɔ ute ebuo na ɔtɛnku-nwu, ɔsika ɔdi kekuma lɛla lɛni bekisi geen.

²⁴ “ ‘Na ɔdi biala utabla ala ani muusé lɛlɔ mɛni udu, ɔsika ana udu na kadi bekyuli bani na ndubo bɔbɔku budie bina anumi bábla bébile lɛlɔ na beesé lɛlɔ.

²⁵ Kalɔ kammɔ muedi bébile-ka, anwuɔsu mina lɛtuni líbo-ka lɛlɔ na lɛ́bɔku lɛla biala lídie aani kalɛ na ukyuli ɔɔdala lɛla biala teedie.

²⁶ Nsu amii amu ni, bɛdi mina ɔda bubo ku bunyimi ƒui lɛlɔ amii ku baƒɔ bani ƒui nkya-mii akɔ na bitabla ala ani muusé lɛlɔ mɛni udu.

²⁷ “ ‘Ala amɛni udu na bekyuli bani nágyu batɔ bélie kalɔ kamɛni kemmo bábla na bébile kalɔ kammɔ na keesé lɛlɔ.

²⁸ Anwuɔsu si amii lɛnɔ bíbile kalɔ kammɔ ni, ndubo-mii bɔbɔku budie kalɛ na lɛ́bɔku-ma aani kalɛ na ukyuli ɔɔdala lɛla biala teedie kaƒɔ kemmo.

²⁹ “ ‘Na ukyuli ɔni mabla ala ani muusé lɛlɔ mɛni udu ni, ɔlɛka bada-nwu bedie nwuna badi akɔ.

³⁰ Ɔmɛni ɔsu bɛnu ka bɛ́di mina litemi lɛlɔ kalɛ na ɔdi ulabla ala ani bekyuli bani nélie mɛni bátaabla na beesé lɛlɔ mmɔ na bitasiaku bana ɔdi ala bɔbla kama na bibile lɛlɔ na biteese lɛlɔ bana kalɛ. Ami ndi Unwoti bina Katɔti.’ ”