Lewiƒuɔ Ɔda Bubo 12 - Katɔti Ɔku Kedee

Ɔlɛka Uleku Ɔbla Lɛlɔ Sɛɛn Na Kɔwɔ Kama

¹ Amu na Unwoti ɔ́su Mose ɔnini,

² “Su Israelƒuɔ anini, ‘Si uleku ɔ́da kaƒɔ na ɔ́wɔ ubi ɔnanabi ni, uwele ɔmmɔ uuuse sɛɛn wetédu emeyi maatɛ. Na úlieku kalɛ kani na si ɔ́ƒɛ kɔnu na uusé sɛɛn wetédu emeyi maatɛ.

³ Na limeyi maanedi lɛlɔ ni, ɔlɛka bekulo ubiwɔ ɔmmɔ lego.

⁴ Na ɔmmɔ kama uwele ɔmmɔ ɔlɛka ulie emeyi avlaatɛ asa na wabla sɛɛn ɔsiku nwuna ubugya buwi kemmo. Na utalɛka uwele ɔmmɔ utuku lɛla lɛni na bábla-ni kedee iye usie Katɔti kakpakɔ utédu ka nwuna lɛlɔ bɔbla sɛɛn emeyi ammɔ édu.

⁵ Na si ulekubi na uleku ɔmmɔ ɔ́wɔ ni, uwele ɔmmɔ uuuse sɛɛn wetédu kwasida inyɔ. Na ɔlɛka ulie emeyi liti ku leevu-ɛku na ɔbla sɛɛn ɔsiku nwuna ubugya buwi kemmo.

⁶ “ ‘Na si lɛlɔ bɔbla sɛɛn emeyi ammɔ édu na ubi ɔnanabi iye ulekubi bɔwɔ kama ni, ɔlɛka uwele ɔmmɔ ɔwia koƒonu ubi ɔni náakɛ lɛkwa uboku ɔkpane na Unwoti Adi Kevo kammɔ kayakun na uti ɔbla akpala bɔkyula ku mangbɛ iye abloduma na uti ɔbla likpidi lili buvele akpala ute Unwoti.

⁷ Na ɔlɛka uti ala ammɔ ƒui usienku Unwoti anumi mmɔ na babla lɛlɔ bɔbla sɛɛn ɔdi ɔmmɔ bete-nwu. Na ɔmmɔ kama ɔdubɔbla sɛɛn na ɔlɛ ɔsiku nwuna ubugya buwi kemmo. Na amɛni ndi ɔda bubo bute uleku ɔni na ɔ́wɔ ɔnanabi iye ulekubi.

⁸ “ ‘Na si uleku ɔmmɔ ulakana koƒonu ubi bute ni, ɔkana na ɔwia bamangbɛ inyɔ iye babloduma inyɔ na uti unwi ɔbla akpala bɔkyula. Na uti unyɔdi ɔbla likpidi lili buvele akpala Na ulu ɔmɛni lɛlɔ na ɔkpane ɔdubɔbla lɛlɔ bɔbla sɛɛn ɔdi ɔmmɔ ute-nwu na ɔbla sɛɛn.’ ”