Kɔnyana Buwulo 4 - Katɔti Ɔku Kedee

Unwoti Ɔ́ni Yerusalem Kɔtu

¹ Bébile sika ugyiedi ɔni náƒɔ kuye útulo ƒui na ɔsɔ ulékeye kalɛ na uukeye. Na bégyingya Katɔti kakpakɔ asɛɛ ebi ani náƒɔ kuye mmɔ béwi kuyeya na lɛblɔnu lɛlɔ.

² Na Sion bebi bani na nka báƒɔ kuye betulo sika ugyiedi ni, bekyuli baanu-ma aani lɛvɔti akyami ani naaadi ku lɛla.

³ Beƒiebuo muedi baanyuɛ bana bebi, nsu mina bekyuli bese aani aasɛ bonwu ɔdi ɔni muudie nwuna bebi atu.

⁴ Utukwɛ ɔ́du bebiwɔ ɔni na bana linyemi lɛ́du lɛ́ma bana kenye kemmo. Na banamu bakɛ beevele adila, nsu ukyuli ɔdi ulete-ma.

⁵ Na bani mɔɔdi balakɛne adila ku lɛmwi ku lɛmwi muedi ni, batɛ beekpi ku kɔka na lɛblɔnu lɛlɔ. Na bani nási bákɔ na kɔduli kɔbuni kemmo na baaagyi ayaki adi ni, ɔƒɛni amu beli kɔwaba kemmo.

⁶ Unwoti ɔ́ni mina kalɔ bekyuli kɔtu útulo kalɛ na ɔ́ni Sodom ɔma unengudi ɔmmɔ bekyuli kɔtu, na ɔ́ya na bábwɛ-ma ɔma uwi klukwii ɔdi kemmo kani, na ɔdi uuubo na ubunku-nwu.

⁷ Yerusalem batɔnkune bétebie na beekeye aani etubankɛ iye aani si nnɔmii báwɛɛ. Na bebo ɔlɔkplu na baadia bɔnu aani asɛɛ ebi ani náƒɔ kuye na aatu anumi.

⁸ Nsu ɔƒaani ni, bana ɔlɔgyii ɔ́nwu tonto aani kɔma nnɔ batondi bɔni na beewi ulu. Na ukyuli biala ulánu-ma taati. Ɔsika bana ɔlɔna ɔ́kwii ɔma-ma ekubi lɛlɔ, na ɔ́kwii útulo kekyweni.

⁹ Si bádu ukyuli ku kewii ni, ɔdia utulo ka kɔka kutaada-a na ukpi.

¹⁰ Ngba bulie na ɔma unegudi kemmo bubo ɔkplu geen, na ɔni na bebi beni béƒulo ama alati bebi bákun.

¹¹ Unwoti úti kɔnyi kpakplaa ɔ́kya Sion geen ɔni na ɔ́ya na bekisine bákyula ɔma ɔmmɔ béwi kalɔ kpɛtɛ kpɛtɛ.

¹² Na ɔga ɔdi uuubo kalɔ kamɛni lɛlɔ iye kadi badi bátati banii bekisine badi badubɔkana na babwɛ beduo ɔma ɔmɛni lɛban kayakun kemmo kudii.

¹³ Yerusalem Katɔti kenye bediene ku bakpane bábla ekpidi bonwu bonwu geen ɔni náya na bekyuli bani nátabla lɛla lɛdi muedi békpi, anwuɔsu na Unwoti ɔ́ni ɔma ɔmmɔ kɔtu lɛni.

¹⁴ Sɔsɔ geen na ɔdi ka bekyuli ubugya ɔ́ƒɔ kenye bediene bammɔ ku bakpane bammɔ enu. Na ukyuli biala ɔsɔ ulayɔ ka ɔni ude-ma uwi ɔni na bakɛ beesié taasɔ na lɛblɔnu ƒui lɛlɔ.

¹⁵ Mmomu bekyuli ƒui baava taabɔku-ma banini, “Bɛgyu-bu lɛlɔ mɛni biteesie, na bitetuku-bu! Ɔsika biisé lɛlɔ, na bítamanku ka amii lɛnɔ bɛbla Katɔti bekyuli akɔ badi.” Ɔmmɔ ɔsu ɔlɛka batɔlɔ mmɔ na beténwini baƒɔ na kalɔ bamba. Nsu mmɔ lɛnɔ ni, kalɔ kammɔ bekyuli básu-ma banini, “Bilakana bula kalɔ mɛni lɛnɔ bulie!”

¹⁶ Unwoti ɔlati nábɔku úgyingya-ma lɛni, na ɔ́da-ma údie nwuna kasusu. Na ukyuli ɔdi ɔsɔ uleboku lili kalɔ ulete-ma na babla bakpane ku kenye bediene bammɔ lɛƒɔndia lɛdi.

¹⁷ Anumi kani mɔɔkpulu-bu ka bɔ́ɔnu ulu bɔ́nɔ ka nka kadi kadi kebebunku-bu na bekpo bula bekisine ku-bu, nsu bétebo.

¹⁸ Bekisine báka-bu bákya na lɛblɔnu linengudi ƒui lɛlɔ, na bɔsɔ buuubo kasiakɔ. Bula uwi údu ka bɔyii udu.

¹⁹ Bátu bási bébo-bu lɛlɔ ku usi ɔni ntulo kalɛ na kɔdigbo aasɛ ɔɔyu teebo kalɔ. Na bábwi-bu bási abi lɛlɔ, na bákywɛ-bu kɔkpagyuɛ bése ka beƒie-bu na kalɔ kakwiidi kemmo.

²⁰ Ɔtɔnkune ɔni na Unwoti ɔ́ƒuna úte-bu kani nsɔ ndi-bu lɛnunsia ka anwu ndubɔƒɔ ute-bu na bɔkɛ keliekɔ kadi na kadi bamba bekyuli bammɔ akɔ, nsu anwu muedi bana kɔkpagyuɛ kɔmmɔ kɔdi kani nédie anwu lɛnɔ.

²¹ Amii Edomƒuɔ, bɛkana na bɛdi limeyi na bɛkɛ ebiti ɔƒɛni amu ƒaa. Nsu amii lɛnɔ bɛdubo bibebo abi na bɛkɛ bitaagbanta taavi ku kasɔngya.

²² Sion kadi bekyuli báaƒɔ bana ekpidi ani na bábla kayu, na badubo bɔsɔ bunwini buteesie bana ɔma. Nsu amii Edomƒuɔ ni, Unwoti ɔdubo-mii kɔtu bɔni na udie bina alaekpidi keyi.