Hosea 3 - Katɔti Ɔku Kedee

Katɔti Bɔyɔ Bɔdanku Lɛnunsia

¹ Katɔti ɔ́sɔ ɔ́tɛmiku-mi uwi bamba. Na uwi ɔmɛni kemmo ni, bɔsu na ɔ́su-mi ndi ɔnii, “Hosea, ya na ƒula bɔyɔ bɔsɔ bunwini butásia uleku ɔni nálɛ-ɔ kama lɛlɔ, na úudie ɔsɔnɔ ɔni ndi-nwu ɔyɔne. Bla ɔmɛni na eti atina ka mɔɔyɔ́ Israel kadi bekyuli, ina ka bakya baakpá baƒiɔ na adila ani na bábla béte-ma ku egyiibi mmɔ aada-ma ebiti.”

² Anwuɔsu lísie na ntáƒɔ kayu sika ɔƒualadi ebi leevu-alɔ ku edula ebi aƒo alɔ na uleku ɔmmɔ lili.

³ Ɔmmɔ kama lɛ́su-nwu nnini, “Ɔƒaani énwini ami ɔdi. Na ɔlɛka asia lɛlɔ anu na asɔ alálɛ-mi kama ina uwi ɔdubo butu asa na ami ku-ɔ bɔtɛ bɔsala.”

⁴ Lɛni kani na uwi ɔdubo butu asa na Israel kadi bekyuli basɔ bakɛ ɔga iye asa na basɔ babla akpala na Katɔti kakpakɔ iye Katɔti ɔtina-ma ulu ɔni lɛlɔ na basia babla lɛla lɛdi.

⁵ Nsu kama ƒui ni, Israel ɔdubɔsɔ unwini usie nwuna Unwoti Katɔti ku nwuna Ɔga Dawid kudɔ. Badubusie Unwoti kudɔ ku bɔyia ku ɔbu. Na emeyi ekplodi ammɔ kemmo ni, badubɔnu nwuna lɛƒɔndia.