Hosea 2 - Katɔti Ɔku Kedee

¹ “Anwuɔsu ƒula banwani bananabi ni, ya na balɔ-ma banii, ‘Mina badi,’ na aya na balɔ ƒula banwani belekubi banii, ‘Kɔnyana bɔnu.’

Unwoti Ɔ́su Úse Ka Ɔdubɔni Israel Kɔtu

² “Bɛtɛmiku bina uni! Bɛlɛ-nwu kaduɛ! Ina ka ɔsɔ ɔɔɔdi mina ulekudi, na ami Unwoti lɛnɔ nsɔ lɛɛɛdi ɔgyani. Bivele-nwu na ɔda lɛyalɛ ku lɛsɔnɔdi lɛmmɔ ɔya na ɔda-mi kama bɔlɛ ɔya.

³ Si ɔɔɔdi lɛni ni, ndubudie-nwu lɛlɔ ala na ɔsɔ ɔkɛ utaavi aani kalɛ na báwɔ-nwu ku kasɔngya. Na ndubɔya na ɔta ɔbla aani kalɔ kakwiidi kani na ntu bɔ́sa-ka kemmo ƒui kede kede na ukpi na utukwɛ ɔsu.

⁴ Na lɛɛɛdubo amii nwuna bebi lɛnɔ kɔnyana bɔnu, ɔsika nwuna lɛsɔnɔdi lɛmmɔ kemmo na ɔ́wɔ-mii.

⁵ Bina uni útada udu buni. Útaalɛ-mi kama, na ɔ́su ɔnini, ‘Ndubɔsiaku mina basɔnɔ kama, ɔsika ama muute-mi adila ku ntu ku adala abuni ku ana lidu bamba lɛnɔ ku nnɔmii ƒɛƒɛɛ ku ntɛ buni.’

⁶ Ami Unwoti ndubuti liyu lɛti lɛti lɛgyi ɔban lɛkya-nwu na litile-nwu ulu kɔsiakɔ ƒui na ɔsɔ ulákɛ kuƒi kɔdi.

⁷ Na ɔdubo usi bukeli bɔsiaku nwuna bayɔne, nsu ulásiaku-ma. Na ɔdubɔwia-ma ɔnɔ na ulanu-ma. Ɔmmɔ kama ɔdubɔsu ɔnini, ‘Ndubɔsɔ linwini lisie mina ɔgyani ɔkukudi kudɔ, ɔsika ala ádianku-mi uwi ɔmmɔ kemmo étulo kalɛ na use-mi ɔƒaani.’

⁸ Nsu útati ɔnii antabi ku kamu ku ntɛ buni bɔmmɔ ƒui ni, adi etela ani nási-mi kudɔ. Na nwuna sika ugyiedi ku ɔƒualadi ƒui ni, ami néte-nwu na anwu na ɔda uuyé ala taakpa Baal baƒiɔ.

⁹ Anwuɔsu ndubo ala ammɔ ƒui buƒie bɔƒɔ edula ku egyiibi ammɔ ƒui ɔsɔ ulanu-nya uléde. Na liƒie mina adala abuni ku ana lidu bamba lɛmmɔ lɛƒɔ, adala ani na uubi lɛlɔ mmɔ.

¹⁰ Na ndubudie-nwu kasɔngya na nwuna bayɔne anumi. Na ɔdi ulakana-nwu bɔƒɔ.

¹¹ Na ndubukulo Israel emeyi buni bɔdi kenye. Kɔbuli kɔwɔdi bɔlɛ o-o, Lɛnwunameyi o-o, ku emeyi buni abambadi ƒui kenye kadubo buklo.

¹² Uleku ɔmɛni ɔ́su ɔnini, ‘Mina basɔnɔ néte-mi adingyii mmo bɔni na mbo ka lɛ́ya na ami ku-ma bɔ́tɛ ɔsu.’ Nsu ni, ami Unwoti ndubo-mu bubile ƒui na lɛya na bɔta bunwini lɛku na bebuo bakun ala ammɔ bebile ƒui.

¹³ Na ndubo-nwu kɔtu bɔni na uwi ɔni na úti ɔ́kpa Baal baƒiɔ na ɔ́kyula oloƒui úte-nwu kenye. Na ndubo-nwu kɔtu bɔni na uwi ɔni kemmo na údie-mi atu na ɔ́yiƒala-mi na úye kɔkwɛnimi ku asɛɛ lidu ɔ́kya atu ku limɔ ka ɔɔwia ka nwuna basɔnɔ bataayɔ-nwu ɔsu. Ami Unwoti nébimi kenye lɛ́su, na ndubo bɔbla bɔsiaku lɛni!

¹⁴ “Anwuɔsu ɔƒaani ni, ndubo-nwu bɔtɔlɔ buɛɛ buɛɛ butákya kalɔ kakwiidi kemmo na lɛdɔdɔ-nwu.

¹⁵ Na ndubɔsɔku nwuna adingyii mmo lite-nwu. Na lɛbibo ɔkwalɛ ɔni kemmo na ala ékpoku-nwu ɔdubo bunwini Lɛnunsia Ɔkwalɛ. Na ɔdubɔtuna ute-mi ɔnii, ‘Ɛɛn,’ aani kalɛ na ɔ́bla uwi ɔni na ɔdi ugblebi na ɔ́si ɔɔlɛ́ Egyipte kalɔ lɛlɔ.

¹⁶ “Líse-nwu kenye ɔ́si limeyi lɛmmɔ lɛlɔ ka ɔdubɔlɔ-mi nwuna ɔgya na ɔɔɔdi Ati.

¹⁷ Na nsɔ lɛɛɛdubo bɔya na ɔkpali Baal ɔni kalɔ ndi Ati.

¹⁸ Na ndubɔtuna na ulie ku keyi buɛɛ. Na beƒiebuo ku baasɛ bekpidi basɔ baaadubo-nwu bukpoku iye badi basɔ bata ku ekpola bebekpoku-nwu lɛnɔ.

¹⁹ Ndubɔƒɔ-nwu aani mina uleku utidi ɔ́si ɔƒɛni úsela uwi ƒui. Na nwuna buti kayu kani na ndubɔƒɔ ndi ka lɛbla lɛla biala siin lite-nwu na lɛdi mina litemi lɛlɔ ulu lɛlɔ, na mina bɔyɔ bɔsɔ bulavumana na ntaabla-nwu lɛƒɔndia.

²⁰ Na lɛɛɛdubo mina litemi kama bɔlɛ kudii. Na ɔmmɔ ɔdubɔya na ɔnu ami nwuna Unwoti ɔti.

²¹ “Ndubɔtuna lite-nwu limeyi lɛmmɔ lɛlɔ na lɛlɛmi kayaa na kayaa lɛnɔ kenu-mi lɛdi na kete ntu na kalɔ kayɔ.

²² Na si Yesreel ɔ́kpali-mi ni, ndubɔya na antabi ku egyiibi lidu adia na ɔkwalɛ ɔmmɔ kemmo.

²³ Na ndubɔnu-nwu kɔnyana anwu ɔni na nka lɛ́lɔ nnii kɔnyana tanu. Na ama banii na nka nnii baaadi mina badi ni, badubunwini mina badi. Na ama lɛnɔ badubɔsu banii, ‘Awɔ ndi bula Katɔti.’ ”