Hosea 10 - Katɔti Ɔku Kedee

¹ Nka ntɛ kugyii kɔbuni kɔni mɔɔnwu ebi na adi. Nsu kalɛ kani na aanwu ebi pii ni, lɛni kani na aatú akpabi pii teete lɛlɔ. Na kalɛ kani na keyi kaadianku-ɔ ni, lɛni kani na aatú aƒiodu ani mɔɔdia-a bɔnu teete ƒula baƒiɔ.

² Ɔkɔ ɔnyine bonwu na adi na aládi litemi lɛmmɔ lɛlɔ. Anwuɔsu adubo ƒula ekpidi lili kayu bɔƒɔ, ɔsika Unwoti ɔdubo ƒula akpabi ku baƒiɔ bani na ávɔ mmɔ bɔbwɛ na ɔyila-ma udu.

³ Bɛdubo bɔsu bɛnini, “Buuubo ɔga ɔdi na bɔɔɔdaku Unwoti ɔmmɔ lɛnɔ lɛda. Na ina bubo baga muedi ni, bi kɔsia na bɔdubɔkɛ?”

⁴ Israelƒuɔ, biinyimi ala ani neeebo kɔsia na biládi bina linyese biala lɛlɔ, na biinwíni litemi geen taatɛ na ulu ukpidi lɛlɔ aani kalɛ na livo likpidi lɛɛkwɛ́ taaƒɔ kemo kani kemmo na ɔlɛka edula enye.

⁵ Na liƒu bonwu lɛdubo bekyuli bani nkya Samaria ƒui buƒie na bewulo kɔnyana na baƒiɔ bani na bátu bényene Bet-Awen. Baƒiɔ bammɔ na bana bakpane baabu na baakun lɛmɛnɛ ka baanu kalɛ na uukeye ku sika ugyiedi ɔsu. Nsu kekpo kadubo-ma buƒie na beti-ma bɔtɔlɔku na unwini-ma kɔƒa na ukyuli biala uteewulo.

⁶ Badubo-ma buti busienku Asiria kalɔ lɛlɔ aani ɔga unengudi ɔmmɔ litela. Na kɔƒa kukpo Israelƒuɔ ka bákya bátaakpa baƒiɔ bammɔ udu ɔsu.

⁷ Na badubuti Samaria kadi bekyuli ku bana ɔga batɔlɔku aani kalɛ na ketu keetiku kegyiimi na ɔɔgbála-nwu taatɔlɔku na ntu anumi.

⁸ Na akpabi ani na abi eli mmɔ ƒui adubɔyii udu ka ɔkɛnku bana lɛlɔ ɔsu na Israel ɔ́bla likpidi. Na liyu alakpi ku livo bamba ndubo bɔkwɛ na mmɔ ƒui. Na liƒu ɔsu ni, bekyuli bammɔ badubɔkpali basu abi ammɔ banini, “Bɛbɛla-bu!” Na badubɔsu abinkpo lɛnɔ banini, “Bibebi-bu lɛlɔ!”

⁹ Unwoti ɔnini, “Israelƒuɔ, bítada bina ekpidi ani na bɛ́bla na Gibea mmɔ dii bɔbla bítaya tɔ? Ɔmmɔ ɔsu na ala adubo-mii bukpoku na Gibea mmɔ.

¹⁰ Bina ekpidi bɔbla ásɔ ásia kama ébu, anwuɔsu lɛ́lɛ ugyii ka ndubo bɔya na kadi bamba bekyuli bebékpo-mii na bakya-mii abuli batɔlɔku.

¹¹ “Uwi ɔdi kemmo ni, na nka Israelƒuɔ bese aani ɔmantɛ akɔ ɔkɔdi ɔni nse buɛɛ na uunú kalɔ taabla mina kabla kpɛtɛ kpɛtɛ. Nsu ɔƒɛni amu ndubo anwu ku Yudaƒuɔ ƒui amɔ bunyimi bɔda anwami bonwu lɛlɔ na bataabla kabla kpakplaa.

¹² Anwuɔsu lɛ́su-ma nnii, ‘Biteegulu kalɔ na bɛgya edula buni ulu lɛlɔ siin na bɛƒɛ kɔnyana bɔnu ebi. Ɔsika uwi údu ka bɛkya lili kalɔ bite ami, bina Unwoti. Na ndubɔya na bɛnu kalɛ na mbo ɔyikun na mɔɔƒɔ́ bekyuli aani kalɛ na ɔnantu ɔɔna teewi kalɔ lɛlɔ.’

¹³ “Nsu bɛ́va likpidi bɔbla ebi na bɛ́ƒɛ ala ani naaakɛ ulu siin lɛlɔ. Na bɛdubɔdi bina ɔkɔ bɔnyi ebi. Ɔsika bɛ́sia amii alati ɔyikun anu ɔni na bɛ́nu ka amii ku bina bekpone nkya ɔsu.

¹⁴ Kekpo kadubo bɔlɛ, na bina lɛma kɔgyumanakɔ kɔni na bɛ́tu ƒui kɔdubo bɔbwɛ. Na bina bekisine badubo-mii lɛla lɛni na Ɔga Salman ɔ́bla Bet-Arbel bɔbla. Na badubuti bebi ku bana beni ƒui baƒiɛmi atakpɛ lɛlɔ badu.

¹⁵ Betel ƒula lilikpi ku lilidia lɛni nse nte-ɔ na lɛdi mɛni na ƒula ekpidi ɔsu. Na ɔtanta tutuutu ni, badubo ƒula ɔga bɔdu.”