Hiob 40 - Katɔti Ɔku Kedee

Unwoti Ɔ́tɛmiku Hiob

¹ Unwoti ɔ́su Hiob ɔnini,

² “Ami ndi Unwoti Ɔyikune Ƒui, nsu ákyaku-mi unyeƒi anii lɛla lɛni na ábla ndi lɛbuni. Na ɔƒaani ni, bo na ebedie kenye na linu.”

³ Mmɔ na Hiob údie kenye ɔnini,

⁴ “Ami ndi ɔma na muudie mina litemi kenye?

⁵ Lɛ́ɛtɛmi lɛsia kama kɔlɛ kɔlɛ na nsɔ liiibo lɛla lɛdi na mɔɔsu.”

⁶ Amu na Katɔti ɔ́tɛmiku Hiob ɔ́siku ɔƒɛƒɛɛ kpakplaa ɔmmɔ kemmo ɔnini,

⁷ “Ya na ami ku-ɔ butaanu lɛlɔ anumi, na edie etemila ani na ndubo-ɔ buye mɛni kenye!

⁸ “Bɔtina na ada-mi kalɛ na ese siin, na ami mmomu naaatɛ etemila siin na ulu lɛlɔ?

⁹ Bɔbla na ƒula kɔnu kɔɔbla ɔyikun ala, na ƒula lɛdi lɛnɔ libo ogya mina kalɛ?

¹⁰ Si lɛni na aasu bɔdi ni, ya na bukeye bɔni mɔɔtina ƒula lɛgadi bɔka bɔmana-a!

¹¹ Die ƒula kɔnyi keyi, na eboku bekyuli bani mɔɔtalaku lɛlɔ katɔ kalɔ.

¹² Sia bana ƒui anumi, na ayila balalane bammɔ ƒui udu.

¹³ Ya na benyimi-ma ku bekpine kɔvadi, na bava-ma basala na ɔtumu akɔ.

¹⁴ Bla ɔmɛni na lɛnu lɛti ka sɔsɔ ákyaku-mi unyeƒi na ádi ubo.

¹⁵ “Ami nédie awɔ ku ketu kemmo atu ɔni baalɔ etuntu, na ɔɔkun livo aani ɔmantɛ akɔ.

¹⁶ Na ubo ɔyikun geen ɔ́si nwuna lɛgba útédu nwuna kaƒɔna.

¹⁷ Nwuna ɔka ɔɔkunku aani kugyii kagba. Na nwuna ebuli lɛnɔ émini geen.

¹⁸ Na nwuna lɛgba ekubi ese aani abuala.

¹⁹ Lɛ́bla-nwu na ubo ɔkplu geen utulo bebuo bamba, nsu ami ɔni nédie-nwu kani ndubɔkana na lɛni lide-nwu ku mina kewii.

²⁰ Abi lɛlɔ na nwuna livo lɛkundi lɛkya, na uunye taadi mmɔ, na beƒiebuo bamba baaƒia taavi-nwu amadɔ na baabu-nwu.

²¹ Ketudɔ alakpi kalɔ ku lɛba livo lɛmmɔ akɔ na ɔɔbɛ́ taakya.

²² Na egyii ani nnye ketudɔ mmɔ mɔɔkya-nwu ɔyuli ka áka amana-nwu ɔsu.

²³ Si ina dɛ na Yordan Ketu kammɔ kéyi na kaagbá taasiaku-nwu na ɔ́kɔ úbedu-nwu anumi muedi ni, ɔtɔtɔ biala ulagyu-nwu.

²⁴ Na alakana ulu ɔdi lɛlɔ bɔsia na eƒie etuntu ku kakpagyuɛ na akya-nwu kakwɛnimi enwu na akpanku-nwu.”