Hiob 38 - Katɔti Ɔku Kedee

Katɔti Ɔ́tɛmi Ɔ́siku Ɔƒɛƒɛɛ Kpakplaa Kemmo

¹ Katɔti ɔ́tɛmiku Hiob ɔ́siku ɔƒɛƒɛɛ kpakplaa kemmo ɔnini,

² “Bi ɔsu na aatɛmi pii lɛni ka ɔɔɔdi lɛla lɛdi na agyi?

³ Ɔƒaani ni, klibi lɛlɔ na ami ku-ɔ bɔsa! Áƒɔ ádi ka adubɔkana ala ani na ndubo-ɔ buye kenye budie?

⁴ “Dɛ na lɛ́kya kayawi awodu ɔka kalɔ? Na wɛ na akya uwi ɔmmɔ?

⁵ Ngyi ka agyi ukyuli ɔni nákɔku kayawi kammɔ bɔbɛbɛ ku bune na ati asu-mi!

⁶ Kayawi kammɔ kalɔ ɔka ni, akpa amani nda-nwu? Na ɔma nékpo awodu ammɔ atu,

⁷ asa na únwini lɛlɔyɔ lɛnu na ɔtanta lɛyabi ku katɔ batu beete yiiduu?

⁸ “Uwi ɔni na ɛpu ɔ́bwɛ ɔ́lɛ kalɔ kemmo ni, ɔma nágyi ɔban ɔ́kya-nwu na ɔ́bala-nwu kayakun use liku linwi?

⁹ Ɔma néti liƒlukutu bonwu lɛni nse aani kuntu ɔtondi ɔ́ka ɔ́mana-nwu?

¹⁰ Ɔma násia ubili úte-nwu aani kalɛ na baakalɛ lɛla lɛdi taakya ɔban kemmo?

¹¹ Ɔma nátina-nwu kesii kani na uyi ɔwɔ, na ɔ́su-nwu ɔnii nwuna ɔvɔlɔvɔ ani mɔɔta teebo atavia mmɔ?

¹² “Hiob, na ƒula ngba emeyi kemmo ni, éebo ɔda éte limeyi lɛdi dii anii kadi kegye na ɔƒɛ ɔtu?

¹³ Na áaya na bukeye bɔmmɔ búsie bútéwi kayawi kammɔ ekpo ƒui, na ábɔku bekyuli bekpidi bani naaawia bukeye na békeli bátɔlɔ?

¹⁴ Kadi nwaa bukeye bɔɔyá na abi ƒui lɛlɔ aatina ku ala ani nkya-nya lɛlɔ.

¹⁵ Na ka balalane balayɔ bukeye bɔmmɔ ɔsu ni, basɔ balakana na bataabla bana likyulikpi ala.

¹⁶ “Éeduo ésie ɛpu kalɔ ntukpa bɔni muute-nwu ntu kemmo dii? Na éeduo ésie ɛpu kalɔ kesii kani nágyu na kábɛ mmɔ dii?

¹⁷ Ɔban kayakun kani nákalɛ kekpine ni, ukyuli ɔdi ɔ́ɔtina-a kayakun kammɔ dii?

¹⁸ Agyi kalɛ na kayawi kammɔ kébomo, na asu-mi?

¹⁹ “Agyi bukeye kaduli, na agyi kesii kani na lɛdisa lɛnɔ lilie?

²⁰ Adubɔti-ma kɔkyakɔ na akpanku-ma etése?

²¹ Lɛ́ƒɔ lɛ́di ka adubɔti ɔmɛni ƒui asu-mi, ɔsika báwɔ-ɔ uwi útu, na áabi lɛlɔ geen, na akya muedi asa na bédie kayawi kammɔ.

²² “Éesie kesii kani na lɛ́klibi etubankɛ atunkuli ku ani mɔɔna na ɔnantu kemmo líse?

²³ Lɛ́da-nya líse mmɔ líte ɔgbankpi limeyi kalɛ na liti lɛni bekyuli kɔtu na kekpokɔ.

²⁴ Agyi kesii kani na ɔƒɛ bukeye bɔɔsí asa na buugyingya teesie kayawi ekpo ƒui? Na agyi kesii kani na ɔƒɛƒɛɛ ɔni mɔɔsí ɔƒɛ katukɔ uli, asa na uubo teebekpo na kalɔ kammɔ ƒui lɛlɔ?

²⁵ Ɔma námɛnɛ kuƒi úse úte ɔnantu ɔni mɔɔna ku ɔƒɛƒɛɛ kpakplaa ɔni muukpó ku kudu,

²⁶ na uubo teebewi kalɔ kakwiidi kani lɛlɔ na ukyuli ɔdi uuulie lɛlɔ?

²⁷ Na ɔma muute kalɔ kammɔ udu ntu na kaayɔ́ lɛlɔ, na livo lɛɛsɔ taakwɛ?

²⁸ Bubo na ɔnantu ku amii ani mɔɔna bebo ɔti ɔni mɔɔtɔnku-ma?

²⁹ Ɔma ndi ubi uni ɔni mɔɔwɔ kɔyɔ uwi ntu bɔni mɔɔba taavili na ɔɔbla etubankɛ,

³⁰ na ɔɔyá na ntukpa ku ɛpu ntu ƒui buunyími taabla atabi atabi?

³¹ “Ayabi esu esu ani na akya kayaa ni, adubɔkana na akya-nya ɔbuli na ebo-nya lɛkpu? Munuu ani na use aani bunyimi na bényimi-nya básala na adubɔkana bɔƒɛnimi?

³² Na adubɔkana na atɔnku ayabi esu ku ani mɔɔtina aani akɔkɔ ku bebi na alɛ ana uwi lɛlɔ?

³³ Ɔda bubo bɔni ndanku kayaa katɔ ala ni, adubɔkana na eti ɔda bubo bɔmmɔ eboku na badi-mu lɛlɔ na kalɔ kamɛni lɛlɔ?

³⁴ “Adubɔkana na ebo liƒlukutu ɔda anii uboku ɔnantu na aya na ɔna?

³⁵ Munuu kayaa na adubɔkana bɔya na kabwɛ ogya si édie lɛdi ákya-ka?

³⁶ Na awɔ ndubo baasɛ bɔtina uwi ɔni na ketudi kadubo iye ntukpa bɔdubo buyi?

³⁷ Adubɔkana na ati liƒlukutu bumomo na ada-ni aani ntu libui na ewilimi ntu bɔmmɔ

³⁸ ewi kalɔ kani nákwii na kaƒɔ ntu?

³⁹ “Awɔ muubunku bagyata na baabwi teeƒie bebuo taakun? Munuu awɔ muute bagyata bebi adila ani na baawia na badi bemo,

⁴⁰ uwi ɔni na batɛ bana atakpɛ libu kemmo iye bebi baatú lɛla lɛdi beƒie?

⁴¹ Na baasɛ bani nkɛ kayaa mɔɔví ni, awɔ muute-ma bebi adila si beewulo kɔka taakya-mi?”