Hiob 35 - Katɔti Ɔku Kedee

Elihu Úye Hiob Si Ɔmu Ɔɔnu Lɛlɔ Aani Ukyuli Ɔbuni

¹ Elihu úye Hiob ɔnini,

² “Hiob, aabu anii ese siin áwɔlɔ na Katɔti anumi, na lɛla lɛdi lɛɛɛda-a?

³ Na eeye anii bi kɔsia geen na ákɛ ɔni na ádi Katɔti ɔda bubo bɔmmɔ lɛlɔ.

⁴ “Ya na lidie litemi lɛmmɔ kenye lite-ɔ, na ƒula bakpana lɛnɔ benu.

⁵ Nwini nu liƒlukutu lɛni nƒa-a eli katɔ katɔ mmɔ kaduɛ.

⁶ Si ábla likpidi lɛdi ni, bi na aabu anii ébile na ala ani na aanu mɛni lɛlɔ? Na ina dɛ na ƒula ekpidi ammɔ emomo ni, bi na ɔmmɔ ɔ́bla Katɔti?

⁷ Na si bɔda na áda lɛlɔ siin na átabla likpidi lɛdi lɛnɔ ni, bi na éte Katɔti iye bi kɔsia na ɔ́kɛ ɔ́siku-ɔ kudɔ?

⁸ Ƒula ekpidi ku abuni ani na aabla ni, bekyuli kani na adanku.

⁹ “Ulikplu ala ani na bekyuli baabla bekyuli ni, anya mɔɔyá na bekyuli beewulo teevele ka Katɔti unu-ma bɔkpali, na udie-ma na bana lɛbibo kemmo ku balalane bammɔ lɛlɔ bɔdi kalɔ.

¹⁰ Nsu si uwi ɔni na Katɔti údie-ma ɔ́lɛku bana lɛbibo lɛmmɔ kemmo ɔ́wɔlɔ ni, basɔ belényimo teeye banii wɛ na bana Udiene ɔmmɔ ɔkya,

¹¹ ina ka anwu nábla-bu na bɔ́da anu butulo bebuo iye baasɛ.

¹² Katɔti ulákpete bekyuli bani mɔɔta teenye-nwu lɛlɔ, na bebo ulikplu na baatalaku lɛlɔ katɔ.

¹³ Kekeeke na beenye taakpali Katɔti, ɔsika ɔɔɔdubo-ma bɔkpete ku bana kenyekplu etemila ammɔ.

¹⁴ Na awɔ anii alánu Katɔti ɔmmɔ, nsu ƒula litemi lɛkya-nwu kudɔ na bɛdubo bunye bɔtɛ. Ɔɔɔdubo-ɔ bɔkpete, na bɛdubɔsa na litemi katɛkɔ.

¹⁵ Hiob, kenye kani na ásu anii Katɔti ulani likpidi kɔtu ni, naaabu nnii ɔdi sɔsɔ.

¹⁶ Anwuɔsu ala ani ƒui na ásu adi atɛ keeke.”