Hiob 3 - Katɔti Ɔku Kedee

Lɛbibo Lítulo Hiob Na Ɔ́tɛmi

¹ Kawɔlɔkɔ na emeyi ammɔ kama ni, Hiob ɔ́kpali Unwoti na úwida limeyi lɛni na báwɔ-nwu.

² Na ɔ́su ɔnini,

³ “Unwoti, nine limeyi lɛni na báwɔ-mi die emeyi ƒui kemmo, ku usien ɔni na básu ka mina bawɔne báwɔ ɔnanabi.

⁴ Ya na limeyi lɛmmɔ linwini lɛbla suu. Na awɔ Unwoti ayiƒala-ni. Na limeyi lɛmmɔ lɛsɔ litanu bukeye bɔdi.

⁵ Ya na lɛdisa bonwu lɛƒɔ limeyi lɛmmɔ, na lɛbla suu geen na liƒlukutu lɛƒɔ-ni lɛlɔ ƒui. Na ɔƒɛ ɔdi ɔsɔ utatu na limeyi lɛmmɔ lɛnu bukeye bɔdi.

⁶ Liƒlukutu suu lɛƒɔ limeyi lɛmmɔ, na basɔ bataka-ni batakya lɛkwa emeyi kemmo, iye kɔbuli kɔdi emeyi akɔ.

⁷ Limeyi lɛmmɔ lɛsɔ litanu ubi ɔdi, iye bete mmo na bebo lɛlɔyɔ kudu kɔdi lɛnɔ kudii.

⁸ Ya na bevone ƒui bakanti bakya limeyi lɛmmɔ ku ewida.

⁹ Ayabi ani mɔɔtu limeyi lɛmmɔ ɔtanta ƒui abla suu, na lɛla lɛla litatina ka bukeye bɔdi bɔkya limeyi lɛmmɔ kemmo.

¹⁰ Ɔsika ani néti-mi líboku lɛbibo ngba bɔmɛni kemmo.

¹¹ “Si bukpi na líkpi na kawɔkɔ mmɔ, iye kaƒɔ kemmo mmɔ muedi nka ɔdia utulo. Na lɛɛɛgyi lɛla lɛni ɔsu na bemonku-mi bɔwɔ bɔkya ngba bɔmɛni kemmo.

¹² Bi ɔsu na bágyu-mi básia lɛgba na ɔɔbla ku ɔni na bete-mi lɛnyii?

¹³ Kesii kani na lídu ɔƒɛni amu ni, ndubo bɔyu butéduo kubiɔ na lɛtɛ kpoo ntaanwuna.

¹⁴ Na ndubusie ntátɛ baga ku bana benengu bani nátu baga kɔkyakɔ bonwu bonwu na kɔ́bwɛ kudɔ,

¹⁵ iye bagabi bani nákɛ sika ugyiedi na básala sika ɔƒualadi béyile bana lɛtɔ dii kudɔ.

¹⁶ Bi ɔsu na ńtekpi na ntu kemmo mmɔ uwi ɔni na báwɔ-mi, na nsɔ muumónku ngba bulie na lɛnu ɔƒɛ kadi bukeye?

¹⁷ Na kekpine mmɔ ni, balalane basɔ belekpoku bekyuli. Na bekyuli bani muususu lɛlɔ basɔ beletu lɛlɔ, na baakɛ́ bɔnwuna.

¹⁸ Na batɔntɛne muedi baakɛ́ atu bɔyɔ na basɔ belenu bekyuli bɔbɔku kɔvanu.

¹⁹ Mmɔ kadi ukyuli biala kesiekɔ na bekyuli babune bani kabla na baabla ku bani mɔɔbla-ma kabla ƒui baakɛ́ bɔnwuna.

²⁰ “Bi ɔsu na muulie ntaanu bukeye na mina lɛbibo kemmo, na use aani si ngba ala abuni eebo teete bani naaadaku ngba lɛda?

²¹ Na nli mɔɔwia kukpi aani kalɛ na ukyuli ɔɔwia lɛkɛ taanɔ na kúbulo kɔnii kulebo na kubeeti-mi?

²² Ɔsika lɛla biala lɛsɔ liiibo na lɛdubute-mi lɛlɔyɔ butulo kaƒiɔtɔ kemmo.

²³ Mina ngba bɔsɔ bulie ɔƒɛni kalɔ ndi bi, ka Unwoti ɔ́ya na ala áka-mi ákya na nsɔ naaanu ulu nwaa ɔdi lɛlɔ naaasia?

²⁴ Edumo ku lɛnwuna bubo sɔɔn nénwini-mi adila ɔƒɛni amu.

²⁵ Na lɛla lɛni geen na mɔɔyia nálɛku-mi. Na lɛla lɛni mɔɔgyú-mi ɔtɔtɔ ni, ani nébo-mi lɛlɔ.

²⁶ Liiibo atu bɔyɔ iye lɛlɔ buwi bɔdi. Na lɛbibo ku lɛƒɛda kani náƒɔ-mi keliela kemmo uwi ƒui.”