Hiob 26 - Katɔti Ɔku Kedee

Hiob Ɔ́pii Bildad Ku Nwuna Kebunku

¹ Hiob ɔ́su Bildad ɔnini,

² “Lɛ́nu kalɛ na agyi ukyuli ɔni na lɛla lɛdi lítulo-nwu na ɔ́nɔ bubunku geen, na ɔ́lɛ-mi kɔsia sɔsɔ.

³ Na ƒula kasusu kenengudi ku lɛnunda lɛni na éte ami ɔni nse aani ɔdɔlɔdi ni, lɛ́nu-ka lɛ́ti geen!

⁴ Wɛ na ákɛ lɛlati lɛmɛni ásiku? Na ɔma néte-ɔ kasusu bonwu kamɛni udu?

⁵ “Nsu tayiƒala ɔlɛ bunu ku lɛlɔ lɛni mɔɔtɔ́ bekyuli bani ntɛ kekpine ku ɛpu kalɔ.

⁶ Lɛla biala lítabɛ Katɔti na mmɔ, kesii kani na ala ƒui aayii udu.

⁷ Anwu nli nwuna keliekɔ kakaaka na úbimi kayaa ɔ́ƒala katɔ, na ɔ́ya na kalɔ kammɔ ƒui lɛnɔ kaƒa na lɛla lɛdi lɛɛɛda-ka.

⁸ Katɔti ɔ́sala ntu ɔ́kya liƒlukutu kemmo aani obo, nsu bulábwɛ na buwiakun.

⁹ Na ɔ́bɛla kɔbuli ɔ́kya liƒlukutu lɛmmɔ kama.

¹⁰ Ɔ́sia ɔmii na ɛpu kawɔkɔ úte usien ku kadi nwaa kasakɔ.

¹¹ Na si údie lɛdi ni, kayaa ala ƒui aakunku.

¹² Nwuna ɔyikun ɔɔtu ɛpu teenwini ku liƒu kebweyi kekpidi kani nkya-mu kemmo.

¹³ Ɔƒɛƒɛɛ ɔni mɔɔlɛ́-nwu enwu kemmo mɔɔyá na kayawi kammɔ ƒui keekeye nwaa. Na anwu ɔlati néti nwuna kɔnu úƒie kɔlakpi bonwu kɔni muukeli mmɔ.

¹⁴ Katɔti ɔyikun ɔni na údie keyi mɛni ƒui ni, buse kani na use aani kalɛ na ɔƒɛƒɛɛ ɔɔnwuna. Na si uwi ɔni na údie nwuna ɔyikun bonwu keyi ku katɔ budu ni, ɔma ndubo-nwu kalɔ bunu?”