Hiob 18 - Katɔti Ɔku Kedee

Bildad Ɔ́dɔnku Hiob Ɔnii Ɔɔtɛmi Taagya

¹ Amu na Bildad ɔni nási Suhi mmɔ údie Hiob kenye ɔnini,

² “Uwi ɛlɛ sɔɔn na adubunye ataaka ala ani udu na aaká mɛni butálɛ? Ɛbɔ ka ásɔku kasusu ábla na bɔ́bla kasusu bɔ́sala.

³ Na tabu anii abu bani nlie-ɔ kudɔ mɛni ni, buse aani bebuo bani neeebo kasusu.

⁴ Nu kalɛ na éti kɔnyi, na aayɔ́ ka ani lɛlɔ abwɛ. Bɔgyu na kalɔ kamɛni kadubo bɔgyu kesii kani na kenye? Munuu atakpɛ ndubo bɔta kesii kani na alɛ na ala ani mɔɔlɛ́ku-ɔ mɛni ɔsu?

⁵ “Bunine na Unwoti uunine balalane asogya ɔni na bátu bada, na ɔsɔ ulédie unyemi na ukeye.

⁶ Lɛdisa lɛɛƒɔ́-nwu kaduli, na nwuna kevo kemmo kaabla suu.

⁷ Na lɛgba lɛni na nka úteetu kalɔ ni, ɔƒɛni amu akɔnkɔ ammɔ áyɔ. Na kɔkwɛ kɔni na anwu ɔlati ɔ́kya úse ni, aku na ɔdubo butulo bubuli.

⁸ Na anwu ɔlati ɔɔnya teetéduo kakpagyuɛ kemmo.

⁹ Keedie-nwu na kebo-nwu lɛkpu na lɛlɔ bunwini bɔdi bɔsɔ bulakya-nwu.

¹⁰ Ɔsika kɔkpagyuɛ kɔmmɔ kɔ́bɛ kɔkya-nwu ulu lɛlɔ na ulánu-ku.

¹¹ “Na ulákɛ bɔnwuna na liƒu ala ani ndubo-nwu butaayila na ataabɔku-nwu lɛnɔ ɔsu.

¹² Kɔka kɔdubo-nwu butaada uwi ndi uwi, na ɔgbankpi ɔni na unye ɔgya-nwu kemmo kani na ɔdubukeli butéduo.

¹³ Kukpi kɔdubo-nwu buteeti buɛɛ buɛɛ na ɔlɛ ɔni ndubo-nwu bubo ɔsu, na nwuna ɔlɔna ɔyii udu aani kalɛ na lɛla lɛɛduli ukyuli ɔlɔna taakun.

¹⁴ Na badubo-nwu bɔkpɛ bɔlɛku nwuna kevo kani kemmo na nka uli ƒaa kudeedi mmɔ, na betiku-nwu na utásiaku kukpi liƒu ala ƒui unengu.

¹⁵ “Ɔmmɔ kama na bakyula nwuna kevo ku ala ani ƒui na ɔ́da úse mmɔ, na enwini ntɔ.

¹⁶ Ɔdubukpi ku lidu ku lidu, na ɔkwii unye aani kugyii kɔkwiidi ku kɔgba.

¹⁷ Na nwuna lɛnyi lɛdubɔyii ƒui, na ɔdi ɔsɔ ulenyimo-ni munu munu na kalɔ kammɔ lɛlɔ.

¹⁸ Badubo-nwu bɔbɔku bɔlɛku bukeye kemmo butákya kasuudikɔ, na bayila-nwu udu kede kede na kayawi.

¹⁹ Na ubi iye uwɔ ɔdi ulakya-nwu kama na wakɔliku nwuna lɛnyi katɔ.

²⁰ Lɛla lɛni ndubo bɔlɛku ukyuli ɔmɛni ni, lɛdubɔbla liƒu ku bɔyia geen ute bekyuli bani nkya ɔƒɛ katukɔ ku kanukɔ.

²¹ Na ukyuli ɔni na naaayia Katɔti ni, kakyakɔ kammɔ ndu kani námanku-nwu.”