Hiob 15 - Katɔti Ɔku Kedee

Eliƒas Ɔ́sɔ Útemiku Hiob Kunyɔdi

¹ Eliƒas ɔni nási Teman mmɔ ɔ́sɔ ɔ́su ɔnini,

² “Ɔnundane ɔdi ulátɛmi lɛni aani kalɛ na enye aatɛmi kɔtɛ keeke mɛni.

³ Etemila ani neeebo kalɔ kani na enye aaká.

⁴ Geen ni, ala ani mɔɔlɛ́-ɔ kenye ni, bɔsu na ada bekyuli anii basɔ batabu Unwoti na bakya-nwu lili kalɔ.

⁵ Na ƒula ekpidi pii ani na aabla ni, anya náya na éti kasusu kani ɔsu na aasu kenye kamɛni udu.

⁶ Awɔ ɔlati ƒula kenye mɔɔdú-ɔ kɔtɔ, na ɔɔɔdi mina kadi. Na ƒula unyemi muudie-ɔ keyi.

⁷ “Awɔ ndi ukyuli udeedi ɔni na báka bɔwɔ? Munuu awɔ ntɔ abi ani nnye mɛni na bɔɔnu?

⁸ Éenye Katɔti kasusu kadi ketikɔ dii, munuu aanu lɛlɔ aani ɔnundane unengudi utulo ƒui na bekyuli akɔ?

⁹ Bɔbu na aabu anii agyi lɛla lɛdi na abu bɔɔɔgyi-ni? Na bi na áanu dii na abu bútanu tɔ?

¹⁰ Benengu eli ƒuala geen bakya-bu akɔ bani mɔɔkya-bu kasusu, na bábi lɛlɔ betulo ƒ'ɔti ƒui.

¹¹ Bi ɔsu na Unwoti litemi lilaƒɔ-ɔ anu na kaƒɔ kayɔ-ɔ, ka ani na búti bɔɔsia-a kɔnu?

¹² Bi ɔsu na ƒula kayi kaatɔ́lɔ-ɔ, na éƒu eli ku kɔnyi,

¹³ na livo liiƒí-ɔ na Katɔti lɛlɔ, na aatɛmiku-nwu kalɛ kalɛ na aayɔ́?

¹⁴ “Bi na aabu anii ukyuli ɔdi na ɔdubɔkana na use kedee ɔwɔlɔ? Munuu aabu anii nwuna ablala adubɔbla siin bɔwɔlɔ?

¹⁵ Katɔti batu muedi beeese sɛɛn na Unwoti anumi na katɔ kesii kani na bakya mmɔ.

¹⁶ Na dɛ na ukyuli anwu ɔdubɔbla sɛɛn? Likpidi lɛ́ƒɔ-nwu lɛlɔ kemmo, na lɛɛda-nwu ɔkwɛ aani utukwɛ kalɛ.

¹⁷ “Hiob, se atu na enu lɛla lɛni na lɛ́ɛnu na línu lɛnɔ dii.

¹⁸ Na enu sɔsɔ etemila ani na banundane bátɛmi. Ala ani na bénu básiku bati kuuku kudɔ na bátabɛla ɔdi.

¹⁹ Baƒɔ badi bátakya-ma akɔ, anwuɔsu ukyuli ɔdi uuubo na ɔdubunwini-ma kasusu na Katɔti lɛlɔ.

²⁰ Balalane bani mɔɔbla bana bakpana ulikplu ni, abi kani na beelie teebo bana ngba emeyi ƒui kemmo.

²¹ Badubo kɔku kɔni mɔɔda liƒu buteenu uwi ndi uwi na bataayia. Na uwi ɔni na baakali banii lɛla biala lise kaduɛ ni, uwi ɔmmɔ geen na beyune badubo bebéyu-ma batu.

²² Na liƒu kemmo sɔɔn na beeti teelie ngba na beeebo lɛnunsia lɛdi, ɔsika use-ma aani ɔgbankpi ɔdi ɔ́bɛ unye kasuudikɔ, na balakana bukeli.

²³ Na baasia kesi kesii taavi taawia bana lɛdila na beeye lɛlɔ kesii kani na badubɔkɛ-nya. Na begbini ndubo-ma ɔlɔna bɔkun si békpi.

²⁴ Ɔgbankpi ɔ́bɛla lɛlɔ unye ɔgya-ma, na liƒu bonwu líƒie-ma aani ɔga ɔyikune ɔdi ndubo ubekpoku-ma.

²⁵ Na bekyuli bani muunene enu taakya Katɔti na baadi lɛmɛnɛ taakya-nwu ni, lɛni na ɔɔbla-ma.

²⁶ Báta ku usi ku lɛla tabu, na béti agyumanala ka betékpoku Katɔti.

²⁷ “Ina dɛ na bebo akɛla na bélie lɛmwi muedi ni,

²⁸ lɛtɔ ɔgbɔnɔ kemmo na badubo bebelie na lɛma lɛni nábwɛ kemmo.

²⁹ Na bana akɛla adububo kalɔ na ayii udu.

³⁰ Ɔƒɛ ɔdubɔsa ɔkya-ma, na ogya ɔdubɔkyula-ma. Na ɔƒɛƒɛɛ ɔni mɔɔlɛ́ taasi Katɔti kenye kemmo ɔdubɔkpala-ma ɔtɔlɔku.

³¹ Na si bana kɔdɔlɔ kɔ́ya na béti anu básia ala keeke lɛlɔ ni, lɛla lɛni neeebo kɔsia na badubo bɔkɛ.

³² Baaadubo bulie budu bana uwi asa na badubɔƒɔ bana lɛyuƒɔla, ɔsika badubo bɔyɛyɛ aani kugyii evete kalɛ.

³³ Badubo bɔbla aani egyii ani néwiile ana ebi ekuni na étegyie asa na ánu. Badubo buse aani anwula ani na átakya ebi asa na ánu.

³⁴ Bekyuli bekpidi bamɛni udu ni, bedinkɔ kani na badubo bunwini. Na ogya ndubo-ma kɔduli bɔkyula.

³⁵ Ɔsika likpidi kasusu kani na beelie teeti, na likpidi lɛmmɔ kani na badubo bɔwɔ ka nina kaƒɔ na bada ɔsu.”