Hiob 14 - Katɔti Ɔku Kedee

Ngba Bulie Bɔdanku Lɛbibo

¹ “Ngba buse klukui bute ɔyawine biala, na nwuna ngba bɔmmɔ lɛnɔ bɔdanku lɛbibo.

² Uubimi aani kugyii anwula, na ɔɔnú na ɔmmɔ kama. Na use lɛnɔ aani ɔyuli ɔni mɔɔyii taakya.

³ Anwuɔsu na líye Katɔti si ami ɔmɛni udu na ɔlɛka uti anumi ɔlɛ na ɔtɛku-mi litemi kpakplaa lɛmɛni.

⁴ Ukyuli ɔɔɔdubo ulu ɔdi lɛlɔ bɔkana bɔsia na ɔbla lɛlɔ kedee ƒui ɔwɔlɔ.

⁵ Áakɔku bula ngba emeyi bumomo ése, na agyi abuli bumomo ani na bɔdubo bulie, ɔni na ɔdi ulébo ulávi kesii kani na éte-nwu áwɔ.

⁶ Anwuɔsu, da atu die ukyuli lɛlɔ, kalɛ na ɔdi lɛla lɛni na ɔdubɔkɛ aani kabla ɔblane kalɛ.

⁷ “Kugyii muedi si báda-ku ni, kubo lɛnunsia ka kɔdubo bɔsɔ bɔta ɔwɔdi.

⁸ Ina ka ligyukui lɛmmɔ lɛɛkwii na ligyiitu lɛmmɔ liitu uwi ni,

⁹ uwi ɔni na ɔnantu ɔ́nya úbo kebi úwi-nwu lɛlɔ ni, ɔɔta kɔgba kɔwɔdi.

¹⁰ Nsu bayawine ama ni, beeese lɛni. Si bɔnwuna bukplodi bɔ́lɛ-ma kemmo ni, na bana ɔdi ɔ́sa.

¹¹ Na baasɔ taatɛ ukpludi aani ketu iye lɛba lɛni na ntu bɔ́kwii-ni kemmo.

¹² Si bekyuli ama bánya bálɛɛ kukpi lɛlɛɛ linwi lɛmɛni ni, ɔ́sa. Bɔta bɔsɔ buuubo-ma lɛlɔ wetédu ka kayaa muedi kayii kákya.

¹³ “Anwuɔsu ni, O Unwoti, bɛla-mi kya kaƒiɔtɔ kemmo na ese uwi ɔni na adubɔsɔ enyimo-mi si ƒula kɔnyi kɔ́yɔ-ɔ.

¹⁴ Bulie na bekyuli badubɔsɔ benwini bebelie ngba sɔsɔ? Ndubunye nteebo abi na linye kabla kamɛni lɛlɔ ƒaa wetédu uwi ɔni na adubɔvumana-mi.

¹⁵ Unwoti, ngyi ka adubo-mi bɔwia aani ƒula ubi. Adubɔkpali-mi, na lɛtuna-a.

¹⁶ Na uwi ɔmmɔ ni, ngyi ka adubo-mi lɛlɔ bɔnu, na asɔ alasia mina alaekpidi anu.

¹⁷ Adubuti ala ebi mina ekpidi na etile-nya kenye. Na adubuti mina bɔƒiɔ akya koƒo kemmo na enyimi-mu kenye.

¹⁸ “Nsu kalɛ na abi ku atakpɛ muedi aakunku na aayii udu na ana kenyekɔ,

¹⁹ na ntu bɔɔyu teewi lɛtabi lɛlɔ na lɛɛtu ubu, na ntu bɔmmɔ buukú kalɔ ni, lɛni geen na eete kuƒi ka ukyuli lɛnunsia ƒui lɛɛyii udu!

²⁰ Ƒula ɔyikun ɔɔdi-nwu lɛlɔ na nwuna enu aaƒɛ. Aayá na nwuna udu ɔɔvumana na ɔɔtɔlɔ-ɔ kudɔ.

²¹ Na ulélie taanu si anyi buni na nwuna bebi baaƒɔ́ iye kɔƒa na baadi.

²² Anwu ɔlati lɛbibo ku kɔnyana kɔni na uuwulo kani na ɔgyi, na lɛla bamba lɛsɔ lɛɛɛkɛ-nwu.”