Hiob 10 - Katɔti Ɔku Kedee

Hiob Ngba Bútu-nwu Lɛlɔ

¹ “Unwoti, lɛ́ɛnɔ ku mina ngba ɔƒɛni amu. Anwuɔsu na mɔɔkpali-ɔ taasiku mina kayi kemmo ƒui, ɔsika lɛ́yila lɛnunsia biala.

² Katɔti, buvele, tadu-mi kɔtɔ. Mmomu su-mi lɛla lɛni na lɛ́bla-a na eedie-mi bɔƒiɔ.

³ Bɔyɔ na ɔɔyɔ́-ɔ kaƒɔ kalɛ na ala étulo ami ƒula ukyuli ɔni nsiaku-ɔ mɛni, na aatuna ku balalane kɔkwɛ kɔni na baakya ku bana ablala?

⁴ Kalɛ na abu bekyuli bayawine bɔɔnu ala ni, lɛni kani na awɔ lɛnɔ aanu-nya?

⁵ Buse na ƒula ngba buse aani ukyuli ɔyawine bɔdi kalɛ?

⁶ Na bi ɔsu na use-mi aani enye eenweni mina alaekpidi teese atɔ asia lɛni, na ƒula anu asia mina bɔƒiɔ biala lɛlɔ lɛni?

⁷ Agyi ka ńtaƒiɔ-ɔ, na ukyuli ɔdi lɛnɔ uuubo na wakana-mi budie bɔsiku ƒula enu kemmo.

⁸ “Awɔ ɔlati néti ƒula enu ávɔ-mi. Bunwini na adubo bunwini na ayila-mi ngba ɔƒɛni?

⁹ Kali nu ka awɔ návɔ-mi aani kalɛ na beeti lɛvɔti taavɔ lɛla lɛdi. Na butu na adubɔsɔ etu-mi abwɛ na linwini lɛti?

¹⁰ Kalɛ na baasála ɔlaaƒɔ ku ntu na uunwíni kana ni, lɛni na ɔkɛnku mina ɔti lɛlɔ na ávɔ-mi ákya mina uni kaƒɔ kemmo.

¹¹ Awɔ návɔ-mi ekubi ku kɔbuli, na éte-mi ɔlɔna ku ɔku ɔni mma-mi lɛlɔ.

¹² Éte-mi ngba, na lɛƒɔndia lɛni na aabla-mi uwi ndi uwi lilávumana. Na aanu-mi lɛlɔ na aagyumana-mi kɔyu.

¹³ “Nsu ábɛla ala ani mɔɔlɛ́ku-mi mɛni ákya ƒula lili kemmo na lɛɛɛgyi.

¹⁴ Si lɛ́bla lɛla lɛdi lɛ́ƒiɔ-ɔ ni, agyi ana ƒui, na aaadubo-mi atu budie lɛni, mmomu adubɔni-mi kɔtu.

¹⁵ Si lɛ́ƒiɔ-ɔ ni, bɔbuɛ na beete-mi. Na ina ńtaƒiɔ-ɔ muedi ni, uládia na lɛkɔliku mina lili katɔ na ala ani mɔɔlɛ́ku-mi kɔƒa ɔsu. Na ɔlɛ bunu bɔ́ƒɔ-mi lɛlɔ kemmo ƒui.

¹⁶ Na uwi biala na lɛ́bla kasusu nnii mɔɔtalaku lɛlɔ blii ni, na eebó-mi taava kalɔ ku ƒula ɔyikun ala bɔbla aani kalɛ na gyata ɔɔtú ebuo teeƒie.

¹⁷ Enye aadá-mi kenye uwi ndi uwi, na eedie-mi bɔƒiɔ. Katɔ kani na ƒula kɔnyi kɔɔkɔ́ na mina lɛlɔ. Na ƒula bekpone beenye taasiaku-mi aani kalɛ na ketu keeti ukyuli, na keebó-nwu teenwini.

¹⁸ “O Katɔti, bi ɔsu geen na áya na báwɔ-mi, na átaya na likpi asa na ukyuli ɔdi uti nwuna lɛnumi muedi ɔnu-mi?

¹⁹ Nka kawɔkɔ mmɔ kani na aya na bagyu-mi batákya kaƒiɔtɔ na ukyuli ɔdi uláti ɔnii lɛ́kya dii.

²⁰ Emeyi alɛɛ nébu-mi, anwuɔsu ya na lɛkɛ bɔnwuna na ebiti blii adi ada-mi,

²¹ asa na linwini nteesie kasuudikɔ kesii kani na nsɔ lɛɛɛdubo bɔsɔ bunwini bubo kama.

²² Mmɔ kese aani usien lɛdibantɛ. Na si ina bi ogya na bátu muedi ni, ulékeye na anu lɛla ati. Kekuma ala bɔbla ku liƒu kani nkya mmɔ.”