Ala Kalɔ Buse 9 - Katɔti Ɔku Kedee

Katɔti Únyimi Lɛla Lɛdi Ku Noa

¹ Amu na Katɔti úte Noa ku nwuna bebi kusɛ kusɛ na ɔ́su-ma ɔnini, “Bɛwɔ na bimomo na bɛƒɔ kalɔ lɛlɔ ƒui.

² Na beƒiebuo bani nkya kalɔ lɛlɔ ƒui ku baasɛ bani mɔɔví kayaa ku bebweyi bani mɔɔví kalɔ lɛlɔ ku kɔbɛ kɔni nkya ɛpu kemmo ƒui ni, líti-ma lɛ́kya-mi enu kemmo ka bɛdi-ma lɛlɔ.

³ Na beƒiebuo ku baasɛ ku bebweyi bamɛni ƒui badubo-mii bɔyia. Na lɛla biala lɛni mbo ngba na liisié taavi linwini adila lite-mii. Kalɛ na líti lɛku kemmo evete lidu lidu líte-mii nnii bɛdi ni, lɛni kani na líti lɛla biala muute-mii ɔƒɛni.

⁴ “Nsu bitakun ebuo ɔni bélii-nwu limɔ bádu na ubugya ɔmu ɔkya-nwu kemmo.

⁵ Ɔsika lídie ukyuli na mina udu kenye na ebuo iye ukyuli ɔni ndubo ukyuli ubugya kalɔ buwi ni, ami Katɔti ndubo-nwu kɔtu bɔni. Na ukyuli biala ɔni mewi ukyulikpana ubugya kalɔ ni, ami Katɔti ndubo-nwu kukpi kɔtɔ bɔdu.

⁶ “Ukyuli biala ɔni mewi nwuna ɔkpana ubugya kalɔ ni, anwu lɛnɔ ukyuli ndubo-nwu ubugya kalɔ buwi. Ɔsika Katɔti udu kenye na Katɔti údie ukyuli.

⁷ Na amii ni, bɛwɔ na bimomo biyile kalɔ kammɔ ƒui lɛlɔ.”

⁸ Ɔmmɔ kama ni, Katɔti ɔ́su Noa ku nwuna bebi ɔnini,

⁹ “Ɔƒaani ni, línyimi lɛla lɛdi ku-mii ku bina bawɔ bani masia-mii kama.

¹⁰ Na linyese lɛmɛni lɛdanku baasɛ ku ɔmantɛ bebuo ku beƒiebuo bani nákya-a kudɔ na bálɛ ɔkɔlɔ bonwu ɔmmɔ kemmo.

¹¹ Na lise mina bunyimi líse ka nsɔ lɛɛɛdubo lɛla lɛdi biala ngba udu bɔyila ku ntu. Na ɔnantu ɔsɔ ulana ulaƒɔ kayawi ƒui na wayila-ka udu lɛnɔ.”

¹² Amu na Katɔti ɔ́sɔ ɔ́su ɔnini, “Ndubɔbla lɛla lɛni madi bunyimi bɔmɛni lɛlɔ, na ani ndubɔkya ami ku-mii ntɛ ku kebweyi biala na kákya-a kudɔ. Na ɔmɛni ndubɔbla likposela wete kaba bekyuli bani ƒui mebo lɛnɔ.

¹³ Lɛ́ya na kɔdigbo kɔdubɔlɛ kayaa kemmo, na aku ndi likposela lɛni nkya ami ku kayawi bekyuli ƒui ntɛ.

¹⁴ Na uwi biala na ulɔyɔ iye liƒlukutu lɛ́sia kayaa na kɔdigbo kɔ́lɛ-nwu kemmo ni,

¹⁵ ndubo bunyimo mina lɛla lɛni na línyimiku-mii ku kayawi bebweyi lidu ƒui ka ntu bɔsɔ buleyi buláƒɔ kayawi ƒui na bɔyila kayawi ala ammɔ udu.

¹⁶ Na uwi biala na kɔdigbo kɔ́lɛ na kayaa ni, ndubo bunyimo lɛla lɛni na ami Katɔti línyimi ku lɛla biala nli ngba.”

¹⁷ Anwuɔsu Katɔti ɔ́su Noa ɔnini, “Lɛla lɛmɛni ndi likposela ute mina bunyimi bɔni na línyimi ku lɛla biala mbo ngba na kayawi kamɛni lɛlɔ.”

Noa Ku Nwuna Bebi

¹⁸ Na uwi ɔmmɔ ni, Noa bebi bammɔ anyi ndi Sem ku Ham ku Yaƒet na ama ku-nwu nálɛ ɔkɔlɔ bonwu ɔmmɔ kemmo. Na Ham náwɔ Kanaan.

¹⁹ Noa bebi ɛtɛ bani na ubo ndi bani anyi na bɔ́lɔ mɛni. Na ama náwɔ bebi na báƒɔ kalɔ lɛlɔ ekpo ƒui.

²⁰ Na uwi ɔmmɔ ni, Noa úse kalɔ ɔɔƒɔ kemo na ɔ́bla adingyii kemo kadi.

²¹ Amu ka ɔ́ni egyiibi ani na úti ɔ́bla ntɛ mmɔ ni, ntɛ bɔmmɔ bɔ́da-nwu na bɔ́ya-nwu na ɔ́tɛ ɔ́lɛɛ na údie lɛlɔ kasɔngya na nwuna kevo kemmo.

²² Na uwi ɔmmɔ lɛlɔ ni, Ham ɔni náwɔ Kanaan úbo úbanu ka ɔti Noa ɔtɛ kasɔngya. Amu na útásu nwuna banwani bananabi inyɔ bakladi.

²³ Nsu Sem ku Yaƒet ama béti awu gyɔlɔɔ ɔdi na bakɛ kama kama béti bétébi-nwu lɛlɔ. Na bénwini bana anumi bésienku kesii bamba kalɛ na balanu bana ɔti kasɔngya.

²⁴ Ɔmmɔ kama ka Noa ɔ́ta kalɛɛkɔ ni, básu-nwu lɛla lɛni na Ham ɔni ndi nwuna kawɔkpulo ɔ́bla.

²⁵ Amu na úwida Kanaan ɔnini, “Adubɔnuku-ni! Aaadubo kenyekɔ kadi bɔkɛ adubo bunwini ƒula banwani ƒui kabla ɔblane ukplodi.”

²⁶ Ɔmmɔ kama ni, ɔ́su ɔnini, “Bimwi Unwoti ɔni ndi Sem Katɔti. Na ɔya na Kanaan unwini Sem kabla ɔblane.

²⁷ Na ɔya na Yaƒet kalɔ lɛmii lisie kama libu. Na ɔya na Yaƒet bawɔ bawɔ ku Sem bawɔ bawɔ badi bete lɛlɔ. Na Kanaan unwini Yaƒet kabla ɔblane.”

²⁸ Na ɔnantu ɔmmɔ kama ni, Noa ɔ́sɔ úlie ngba akwa eti maatɛ (350).

²⁹ Anwuɔsu akwa ani ƒui na Noa ɔ́ƒɔ asa na úkpi ndi akwa eti leevu-yaalenwi (950).