Ala Kalɔ Buse 23 - Katɔti Ɔku Kedee

Sara Úkpi Na Báva-nwu

¹ Sara úlie ngba na ɔ́ƒɔ akwa eti anyɔ ku aavlanyɔ-maatɛ.

² Na úkpi na Kiriat-Arba, ɔni lɛnɔ basɔ baalɔ Hebron, na Kanaan kalɔ lɛlɔ. Mmɔ na Abraham útéwulo-nwu.

³ Ɔmmɔ kama ni, Abraham ɔ́tɔlɔ kesii kani na ulekudi ɔtɛ mmɔ na útátɛmiku Hetiƒuɔ. Na ɔ́su-ma ɔnini,

⁴ “Kadi bamba ukyuli na ndi. Na ndi ɔƒɔ na bina akɔ. Mɔɔyɔ́ ka bibo kabuli kalɔ kadi bite-mi na liye na bina kudɔ mɛni, na liti linwini bekyuli kavakɔ kalɛ na lɛkana na lɛva mina uleku.”

⁵ Mmɔ na Hetiƒuɔ bammɔ bédie kenye na básu Abraham banini,

⁶ “Ati, kywɛ-bu atu, ɔgadine ɔni na áƒɔ lɛnyi geen na adi na bula akɔ. Anwuɔsu ti ƒula ukpine táva kɔƒiɔtɔ kɔbuni kɔni na béku bése mmɔ akɔ unwi kemmo. Bula akɔ ɔdi biala uléni ka ava ƒula ukpine na nwuna kaƒiɔtɔ kadi kemmo.”

⁷ Amu na Abraham ɔ́ta na úboku lili kalɔ na Hetiƒuɔ bammɔ ƒui anumi.

⁸ Na ɔ́su-ma ɔnini, “Si bínu kalɔ ka lɛva mina ukpine ni, amu bɛkywɛ-mi atu na bivele Soha ubidi Eƒron bite-mi.

⁹ Na uti Makpela lɛtakpɛ ubu ɔni ndi anwu Eƒron ɔdi na ɔkya nwuna kalɔ kawɔlɔkɔ mmɔ uye ute-mi. Bɛsu-nwu na uye-ka ute-mi na kuye kɔni na ɔ́manku kenye. Na liti mmɔ linwini bekyuli kavakɔ.”

¹⁰ Amu na Eƒron, Hitini ɔmmɔ údie kenye na ɔma ɔmmɔ ɔba kenye kesii kani na bása beli mmɔ, na ɔ́su Abraham ɔnini,

¹¹ “Ati, neeeye-ka neeete-ɔ! Líti kalɔ kammɔ líte-ɔ ƒaa ku lɛtakpɛ ubu ɔni nkya kalɔ kammɔ kemmo na bekyuli bamɛni ƒui anumi kalɛ na ava ƒula ukpine.”

¹² Mmɔ ni, Abraham ɔ́sɔ úboku lili kalɔ na bekyuli bammɔ ƒui anumi.

¹³ Na ɔ́su Eƒron na bana ƒui anumi ɔnini, “Kywɛ-mi atu. Si adubo bɔtunaku-mi ni, ndubɔƒɔ kalɔ kammɔ ƒui kayu. Anwuɔsu nuku-mi kalɔ na aƒɔ sika ɔƒualadi ɔmmɔ na ɔdia na lɛva mina ukpine na mmɔ.”

¹⁴ Amu na Eƒron ɔ́su Abraham ɔnini,

¹⁵ “Ati, kalɔ kammɔ kadubɔƒɔ aani sika ɔƒualadi ebi antabi akyami atɛ bɔkɔku unu. Nsu ni, bi na ɔmmɔ ɔdi na ami ku-ɔ ntɛ? Sie na atáva ƒula ukpine.”

¹⁶ Mmɔ ni, Abraham ɔ́kɔku sika ɔƒualadi bɔkɔku bɔmmɔ kenye úte Eƒron aani kalɛ na anwu ɔlati ɔ́su na kadi ƒui anumi ɔni ndi antabi akyami atɛ unu bɔkɔku aani kalɛ na uwi ɔmmɔ beyedine baakɔ́ku ala kalɛ.

¹⁷ Anwuɔsu Eƒron kalɔ kani kemmo na Makpela lɛtakpɛ ubu ɔmmɔ ɔkya na kede Mamre ni, kalɔ kammɔ ku egyii ani ƒui nkya kalɔ kammɔ kemmo útédu kana lɛmii ƒui ni, bávumana-ka ɔlati na bénweni ɔku básia-ka lɛlɔ.

¹⁸ Na kalɔ kammɔ ƒui kénwini Abraham kadi na ɔdi-nwu kese na kadi ƒui bani nébo ɔma ɔmmɔ ɔba kenye mmɔ ƒui anumi.

¹⁹ Na ɔmmɔ kama ni, Abraham útáva ulekudi na Makpela lɛtakpɛ ubu na kalɔ kammɔ kemmo. Na kalɔ kammɔ kedenku Mamre na Hebron na Kanaan kalɔ kemmo.

²⁰ Ɔmmɔ ɔsu ni, Hetiƒuɔ bénweni ɔku bávumana kalɔ kammɔ ɔlati béte Abraham, na mmɔ únwini bekyuli kavakɔ.