Ala Kalɔ Buse 13 - Katɔti Ɔku Kedee

Abram Ku Lot Begyingyaku Lɛlɔ

¹ Ɔmmɔ kama ni, Abram ɔ́tɔlɔ Egyipte úti ɔ́kɔ úsie kesii kani baalɔ Negev. Na útiku ulekudi ku ala ani ƒui na ubo. Na Lot lɛnɔ ɔ́siaku-nwu.

² Abram úbenwini ɔlakɛne na bebuo bani na ubo ku sika ugyiedi ku ɔƒualadi ɔsu.

³ Ka ɔ́si Negev mmɔ ni, úsie ɔ́vi ekpo ekpo laa na úbedu lɛma lɛni ndi Betel ku Ai. Lɛma lɛmɛni ntɛ na ɔ́ka nwuna kevo bɔtu.

⁴ Na mmɔ na ɔ́ka lɛkpabi bɔtu bute Katɔti. Mmɔ na Abram útaakpali Katɔti lɛnyi teemwi-nwu.

⁵ Uwi ɔmmɔ kemmo ni, Lot ɔni lɛnɔ nkɛ ɔsiaku Abram ni, anwu lɛnɔ ubo bebuo lidu lidu na bemomo geen na ɔ́tu nvo pii lɛnɔ.

⁶ Ɔmmɔ ɔsu ni, kalɔ kammɔ kétedu-ma ka bélie básala. Ɔsika bana ala ani na bebo emomo. Anwuɔsu na bátakana mmɔ buduku.

⁷ Ɔmɛni úbaya na kadɔ keduo Abram bebuo lɛlɔ banune ku Lot bebuo lɛlɔ banune ntɛ. Na uwi ɔmmɔ kemmo lɛnɔ ni, Kanaanƒuɔ ku Perisiƒuɔ bakya kalɔ kammɔ kemmo.

⁸ Na ɔmmɔ ɔsu ni, Abram ɔ́su Lot ɔnini, “Taya na kadɔ kakya ami ku-ɔ ntɛ iye ƒula bebuo lɛlɔ banune ku ami badi ntɛ. Ɔsika banwani na bɔdi.

⁹ Aanu ka kalɔ kamɛni ƒui kewi ƒula anumi. Ya na bugyingyaku lɛlɔ. Na si awɔ ésie kɔdianu ni, na ami nteesie kɔmiinu.”

¹⁰ Amu na ka Lot ɔ́kɔliku anumi na ɔ́nu ɔ́mana ni, ɔ́nu ka Yordan kalɔ kani nwi késela ƒui ni, ntu bɔkya-ka kemmo geen. Na kese aani Katɔti kemo kani na ɔ́bla na Eden. Na kese aani Egyipte kalɔ kani nwi késie ɔma ɔni ndi Soar kakɛ. Na uwi ɔni na ɔɔnu ala amɛni ƒui lɛni ni, ɔdi uwi ɔni na Katɔti útakyula tɔ Sodom ku Gomora kalɔ.

¹¹ Ɔmmɔ ɔsu kalɔ kani nwi késie Yordan kakɛ mmɔ na Lot ɔ́ƒuna. Na ɔ́yu ulu úsie ɔƒɛ katukɔ. Mmɔ nkyuli inyɔ bamɛni bégyingyaku lɛlɔ.

¹² Abram úlie Kanaan kalɔ lɛlɔ. Na Lot ɔ́tu nwuna nvo na kalɔ ƒiaa ntɛ kesii kani nde Sodom.

¹³ Na uwi ɔmmɔ kemmo ni, Sodom bekyuli bebo kuli ɔkplu na bátaabla alaekpidi lidu lidu taaƒiɔ Katɔti.

¹⁴ Ɔmmɔ ɔsu ni, uwi ɔni na Lot ɔ́mami Abram lɛlɔ ni, Katɔti ɔ́su Abram ɔnini, “Talaku ƒula anumi na anu asi kesii kani na enye na anu esie katɔ kakɛ ku kada kakɛ. Na anu esie ɔƒɛ katukɔ ku ɔƒɛ kanukɔ.

¹⁵ Na kalɔ kani ƒui na aanu ka kewi mmɔ ni, aka na ndubuti lite-ɔ ku ƒula bawɔ uwi ƒui.

¹⁶ Na ndubɔya na ƒula bawɔ bemomo aani kɔnwinimi. Na si ukyuli ɔdi ɔ́kana na ɔka kɔnwinimi kɔmmɔ ni, ɔdubɔkana na ɔka ƒula bawɔ lɛnɔ.

¹⁷ Sie na atáka amana kalɔ kammɔ ƒui linene ku bɔbɛbɛ, ɔsika aka na liti muute-ɔ.”

¹⁸ Anwuɔsu Abram ɔ́ta mmɔ ku nwuna ala ƒui na úsie kesii kani na Mamre egyii enengudi enye na Hebron kalɔ lɛlɔ. Na mmɔ na ɔ́tu lɛkpabi úte Katɔti.