Israelƒuɔ Bɔlɛ 9 - Katɔti Ɔku Kedee

Egyipteƒuɔ Bebuo Ƒui Békpi

¹ Amu na Unwoti ɔ́su Mose ɔnini, “Sie na atásu Ƒarao anini, ‘Lɛni na Unwoti ɔni ndi Hebriƒuɔ Katɔti ɔɔsu, “Te kuƒi na mina bekyuli batɔlɔ na besie batákpa-mi.”

² Na si éni na étedie-ma ulu na batɔlɔ na ámu akya aaƒɔ́-ma taakya mɛni ni,

³ ndubɔya na ɔlɛ ukpidi ɔdi uduo bina bebuo akɔ na ɔdu bina baƒlumu ku ɔmantɛ bakɔ ku bapɔnkɔ ku baƒonu ku bese ƒui.

⁴ Nsu Israelƒuɔ bebuo ama ni, ami Unwoti ndubɔya na bana akɔ ɔdi ulekpi, na kavumana kakya Egyipteƒuɔ ku Israelƒuɔ ntɛ.’ ”

⁵ Amu na Unwoti úse limeyi ɔnii, “Kɔnaadi ami Unwoti ndubo ɔmɛni bɔbla na kalɔ kamɛni kemmo.”

⁶ Na sɔsɔ ni, ka kadi kégye ni, Unwoti ɔ́ya na bebuo bammɔ ƒui békpi. Nsu Israelƒuɔ ebuo biala útekpi kalɛ kani na ɔ́su úse.

⁷ Ƒarao ɔ́tala bekyuli ɔnii betéye benu si Israelni ɔdi ebuo úkpi. Na bébete-nwu bɔti ka ina Israelni ebuo unwi útekpi. Nsu ɔmɛni kama ƒui Ƒarao ɔmu ɔɔyu kayi ɔkplu. Na útete Israelƒuɔ kuƒi na batɔlɔ.

Eƒula Ékpoku Egyipteƒuɔ

⁸ Amu na Unwoti ɔ́su Mose ku Aaron ɔnini, “Bidie ntɔ bɔdi na asi kemmo kɔnu lɛkɔkɔ keyile. Na Mose uƒwi ntɔ bɔmmɔ ɔkya kayaa na Ƒarao anumi.

⁹ Na ɔdubunwini aani ɔtumu na ɔƒɔ Egyipte kalɔ kayaa ƒui. Na ɔtumu ɔmmɔ ɔdububoku eƒula na aƒɔ bekyuli ku bebuo ƒui lɛlɔ na kalɔ kammɔ kemmo.”

¹⁰ Anwuɔsu Mose ku Aaron bétédie ntɔ bɔmmɔ básiku asi kemmo na beténye Ƒarao anumi. Mmɔ na Mose úƒwi ntɔ bɔmmɔ ɔ́kya kayaa na bekyuli bammɔ ku bebuo ƒui lɛlɔ lɛ́ƒɔ eƒula kede kede.

¹¹ Ƒarao bevone básɔ bátakana na benye Mose anumi na eƒula ani náƒɔ-ma lɛlɔ mmɔ ku Egyipteƒuɔ bakladi ƒui lɛlɔ ɔsu.

¹² Nsu Unwoti ɔ́ya na Ƒarao ɔ́yu kayi ɔkplu na útenu Mose ku Aaron litemi kalɛ kani na Unwoti ɔ́su Mose úse.

Etubankɛ Ána Ási Kayaa

¹³ Amu na Unwoti ɔ́su Mose ɔnini, “Kɔnaadi lɛdigye ni, sie na atásiaku Ƒarao na asu-nwu anini, ‘Unwoti ɔni ndi Hebriƒuɔ Katɔti ɔnii, Die mina kadi bekyuli ulu na batɔlɔ na besie batákpa-mi,

¹⁴ si ɔɔɔdi lɛni ni, ɔƒɛni na ndubɔya na ɔgbankpi ɔmmɔ ubasiaku-mii kpakplaa ku ogya awɔ ku ƒula benengu ku kadi bekyuli ƒui, na mmɔ na adubo bɔnu bɔti ka Unwoti ɔdi uuubo aani ami kalɛ na kalɔ kamɛni ƒui lɛlɔ.

¹⁵ “ ‘Ɔsika úti úbalɛ ɔƒaani ni, lɛkana na nka lidie kɔnu na lɛya na ɔgbankpi ubo bina ƒui bammɔ lɛlɔ na lɛyila-mii udu lidie kalɔ kammɔ lɛlɔ ƒui.

¹⁶ Nsu kasusu kamɛni geen ɔsu na líse-ɔ lɛga kalɛ na lɛtina-a mina ɔyikun na bebo-mi lɛnyi kudu bete kayawi bekyuli ƒui.

¹⁷ Nsu ámu énye áda mina bekyuli na anii elete-ma kuƒi na batɔlɔ.

¹⁸ Anwuɔsu kɔnaadi ɔƒɛni kalɛ ni, ndubɔya na etubankɛ ku ɔƒɛƒɛɛ kpakplaa ɔni udu nétebo tɔ na Egyipte kalɔ lɛlɔ ubekpo.

¹⁹ Ɔmɛni ɔsu bo ƒula bekyuli ƒui ɔda na beti bana lɛla biala ku bana bebuo bani nkya alakpi akɔ bakya ɔtɔ. Ɔsika etubankɛ adubo bɔna na ukyuli iye ebuo biala makya alakpi akɔ ɔdubo bukpi.’ ”

²⁰ Na Unwoti ɔda bubo bɔmɛni bɔ́da Ƒarao benengu bammɔ badi liƒu. Anwuɔsu béti bana bekyuli bani mɔɔbla kabla teete-ma ku bana bebuo bátákya ɔtɔ kemmo.

²¹ Nsu bakladi ama bátakpete Unwoti ɔda bubo bɔmmɔ, mmomu bányonu bana bekyuli bani mɔɔbla kabla teete-ma ku bana bebuo bényene alakpi akɔ.

²² Amu na Unwoti ɔ́su Mose ɔnini, “Kɔliku ƒula ugyii ɔni na ada mmɔ tina katɔ, kalɛ na lɛya na etubankɛ ana ewi bekyuli ku bebuo ku edula ani ƒui nnye Egyipte mmɔ lɛlɔ.”

²³ Anwuɔsu ka Mose ɔ́kɔliku ugyii ɔmmɔ ɔ́tina katɔ ni, Unwoti ɔ́ya na katɔ keedu taasia kama na etubankɛ lɛnɔ aana na kayaa kaabwɛ ogya teewi kalɔ lɛlɔ. Na Unwoti ɔ́ya na amɛni ƒui álɛ na Egyipte kalɔ lɛlɔ mmɔ.

²⁴ Etubankɛ ammɔ ána lɛni na katɔ kaabwɛ ogya taasia kama ɔni na ɔmɛni udu útalɛ lɛni kudii na Egyipte kalɔ lɛlɔ.

²⁵ Na etubankɛ ɔmmɔ ébile bekyuli ku bebuo bani nkya alakpi akɔ. Na ɔ́ƒɛ egyii ku edula ani ƒui nnye mmɔ.

²⁶ Na Gosen kalɔ lɛlɔ kesii kani na Israelƒuɔ belie aka etubankɛ ammɔ átana.

²⁷ Amu na Ƒarao ɔ́tala na bálɔ Mose ku Aaron béte-nwu. Na ɔ́su-ma ɔnini, “Ɔƒaani lɛ́nu lɛ́ti ka lɛ́ƒiɔ geen na líte Unwoti ubo ka ami ku mina bekyuli ɔdi ɔɔɔdia.

²⁸ Anwuɔsu kpali Unwoti na evele-nwu ete-bu, ɔsika etubankɛ ku katɔ budu ɔgbankpi ɔmɛni údu-bu ɔkwɛ. Ndubudie-mii ulu ɔƒɛni amu, ɔsika ɔ́sɔ útalɛka bɛsɔ bɛkya mɛni lɛnɔ.”

²⁹ Amu na Mose ɔ́su Ƒarao ɔnini, “Si lɛ́nya lɛ́lɛ ɔma ubendi ɔmɛni kemmo ni, ndubɔkɔliku enu katɔ na livele Unwoti na etubankɛ ku katɔ budu bɔmmɔ ƒui kenye kawɔ, na anu ati ka Unwoti nédie kayawi na anwu mbo-ka.

³⁰ Nsu mɔɔnu taati ka awɔ ku ƒula benengu bammɔ biláyia Unwoti Katɔti.”

³¹ Etubankɛ ammɔ ébile anta edula udu ani náakya ebi mmɔ ƒui.

³² Nsu ani mɔɔkpɛ kama aani kakpa ku ana udu kani nébu na étebie.

³³ Amu ka Mose ɔ́nya ɔ́tɔlɔ Ƒarao kaduli na ɔ́lɛ ɔma ubendi ɔmmɔ kemmo kani na ɔ́talaku enu katɔ na ɔ́kpali Unwoti na úvele-nwu. Na mmɔ kani na etubankɛ atakpɛ bonwu ammɔ ƒui ku ɔƒɛƒɛɛ ku katɔ budu bɔmmɔ kenye káyɔ.

³⁴ Nsu ka Ƒarao ɔ́nya ɔ́nu ka lɛla biala lɛ́sɔ lɛ́bla buɛɛ ni, anwu ku nwuna benengu bammɔ básɔ báyu kayi ɔkplu.

³⁵ Na lɛni kani na ɔdanku kayi ɔkplu ɔmmɔ na ulédie Israelƒuɔ ulu na batɔlɔ kalɛ kani na Unwoti ɔ́su úse.