Israelƒuɔ Bɔlɛ 5 - Katɔti Ɔku Kedee

Mose Ku Aaron Bésie Ƒarao Kesii

¹ Amu na Mose ku Aaron bésie Ƒarao kudɔ na básu-nwu banini, “Unwoti ɔni ndi Israelƒuɔ Katɔti ɔnini, ‘Te mina bekyuli kuƒi na beteesie ketele kemmo na batádi limeyi bete-mi.’ ”

² Amu na Ƒarao úye-ma ɔnini, “Ɔma ndi Unwoti ɔmmɔ na ɔlɛka linu-nwu litemi na lite kuƒi na Israelƒuɔ batɔlɔ? Lɛɛɛgyi Unwoti ɔmmɔ, na lɛɛɛdubo bɔya na batɔlɔ.”

³ Amu na Mose ku Aaron bédie kenye banini, “Hebriƒuɔ Katɔti nédie lɛlɔ ɔ́tina-bu. Na ɔƒaani ni, te-bu kuƒi na buti emeyi atɛ busie ketele kemmo na butábla akpala bute bula Unwoti Katɔti. Na si bútabla akpala ammɔ ni, ɔdubɔya na ɔlɛ ubo-bu lɛlɔ na bukpi iye ɔdubɔya na kekpo kadi kebo-bu lɛlɔ na badu-bu kede kede.”

⁴ Amu na Egyipteƒuɔ ɔga úye Mose ku Aaron ɔnini, “Bi ɔsu na bɛɛyɔ́ ka bekyuli bammɔ bada kabla bɔbla baya? Binwini bitátaabla bina kabla pla!”

⁵ Na ɔ́su-ma ɔnini, “Amii ɔlati bɛɛnu ka bimomo bitulo Egyipteƒuɔ, bi ɔsu na ɔƒɛni na bɛɛsu-ma na bada kabla bɔbla baya?”

⁶ Limeyi lɛmmɔ kani ni, Egyipteƒuɔ ɔga úbo bekyuli bani mɔɔnu Israelƒuɔ kabla bablane lɛlɔ ku bana benengu ɔda ɔnii,

⁷ “Bɛda keti kani na kabla bablane bammɔ baasála ku lɛti lɛmmɔ bute bɛya na ama alati beteekulo alakpi ammɔ.

⁸ Nsu bitaya na baƒana bana atimbɔ bumomo bɔni na beekúlo kuuku mmɔ. Israelƒuɔ bamɛni bébo kɔkɔsɔ, anwuɔsu na benye-mi lɛlɔ banii nte-ma kuƒi na beteesie batábla akpala bete bana Katɔti.

⁹ Anwuɔsu bɛya na benye kabla kammɔ lɛlɔ kpakplaa bebu na bada atu bedie bana ɔkɔ etemila ammɔ bene lɛlɔ.”

¹⁰ Amu na lɛlɔ banune bamɛni ku bana batɔnkune bésie bátásu Israelƒuɔ ka Ɔga Ƒarao ɔnii, “Nsɔ lɛɛɛdubo-mii keti kani biiti teekulo atimbɔ mmɔ bɔwia bute.

¹¹ Amii alati bisie bitáwia ala ammɔ. Na kesii kani na bɛdubo ala ammɔ bɔkɛ ɔkya bina kudɔ. Nsu atimbɔ bumomo bɔni na biikúlo limeyi ɔɔɔdi ka ɔƒana munu munu.”

¹² Anwuɔsu Israelƒuɔ bákɛ Egyipte kalɔ kesi biala baawia alakpi lidu lidu lɛni beti bekulo atimbɔ ammɔ.

¹³ Na lɛlɔ banune bammɔ beenye kabla bablane bammɔ lɛlɔ taasu-ma banini, “Bikulo atimbɔ bumomo bɔni na bɔɔwia aani kudeedi kalɛ!”

¹⁴ Nsu kawɔlɔkɔ ka bánu ka atimbɔ ammɔ étedu kudeedi adi ni, lɛlɔ banune bammɔ béye-ma banini, “Bi? Bukulo na bítakana atimbɔ bumomo bɔni na bɔɔwia bukulo?” Na bébo-ma kugyiimi kaduɛ.

¹⁵ Ɔmɛni ɔsu Israelƒuɔ kabla bablane batɔnkune bésie Ɔga Ƒarao kudɔ na bétéye-nwu banini, “Bi ɔsu na aaní-bu kɔtu lɛni?

¹⁶ Bétete abu ƒula kabla bablane keti kani na bukulo atimbɔ, nsu benye-bu lɛlɔ banini, ‘Bikulo atimbɔ ammɔ!’ Na beebó-bu, nsu bana kudɔ na ɔ́si.”

¹⁷ Amu na Ƒarao údie kenye ɔnini, “Bakɔsɔne na bɛdi, anwuɔsu na bɛɛbla kɔkɔsɔ ala! Na bɛɛsu taasia kama bɛnii, ‘Bɛya na busie butábla akpala bute Unwoti.’

¹⁸ Binwini kɔnakunwi biteesie bitátaabla bina kabla. Na mɔɔsu-mii nnii, ukyuli biala ɔɔɔdubo-mii keti kadi bute, nsu ɔlɛka bikulo atimbɔ bumomo bɔni kani na básu-mii kudeedi.”

¹⁹ Mmɔ na Israelƒuɔ kabla bablane batɔnkune bammɔ bánu báti ka béduo ɔgbankpi kemmo na uwi ɔni na básu-ma banini, “Útalɛ ka bɛƒana atimbɔ ammɔ bumomo bɔni na biikúlo limeyi ndi limeyi mmɔ.”

²⁰ Uwi ɔni bási baalɛ́ Ƒarao kudɔ ni, básiaku Mose ku Aaron na ulu lɛlɔ ka benye bágya-ma.

²¹ Mmɔ na batɔnkune bammɔ básu-ma banini, “Unwoti ɔdubɔtɛku-mii litemi! Amii néti-bu bínwini bekyuli bani muuƒí Ƒarao ku nwuna benengu livo yayaaya, na utulo ka bɛ́kya-ma kewii kɔnu ka badu-bu muedi.”

Mose Ɔ́kpali Unwoti

²² Amu na Mose únwini úsie útákpali Unwoti na úye-nwu ɔnini, “O Unwoti, bi ɔsu na éti lɛbibo éboku ƒula bekyuli lɛlɔ lɛni? Ɔmɛni ɔsu na átala-mi?

²³ Ɔ́si uwi ɔni na lísie Ƒarao kudɔ ńtátɛmiku-nwu na ƒula lɛnyi kemmo ni, lɛbibo kani na uuti taasia bekyuli bamɛni lɛlɔ na étedie-ma ɔdi lɛlɔ.”