Israelƒuɔ Bɔlɛ 21 - Katɔti Ɔku Kedee

¹ “Na ɔda bubo bɔmɛni na ɔlɛka eti ete Israelƒuɔ.

Hebrini Kabla Ɔblane

² “Si ukyuli ɔdi ɔ́ƒɔ Hebrini ɔdi ɔkpa ka utaabla kabla teete-nwu ni, ɔkpa ukyuli ɔmmɔ ɔlɛka ɔkya-nwu kudɔ akwa aku kani. Na si údu lɛkwa maatɛdi lɛlɔ ni, ɔlɛka udie-nwu ulu, na utaƒɔ-nwu lɛla biala.

³ Si uwi údu ka edie ukyuli ɔmmɔ ulu na uuubo uleku ni, nyonu-nwu na ɔtɔlɔ anwu lɛti. Nsu si ɔdanku uleku ni, na anyonu anwu ku ulekudi na batɔlɔ.

⁴ Na si nwuna unwoti náwia uleku úte-nwu, na anwu ku-nwu báwɔ bebi ni, na uleku ɔmmɔ ku nwuna bebi badi unwoti ɔmmɔ badi.

⁵ “Nsu si ukyuli uyedi ɔmmɔ ɔ́su ɔnini, ‘Mɔɔyɔ́ mina unwoti ku mina uleku ku bebi bammɔ ɔsu naaayɔ ka lɛtɔlɔ’ ni,

⁶ na nwuna unwoti ɔkpanku-nwu usienku Katɔti kakpakɔ na Katɔti anumi, na ɔya na uténye kakpakɔ kammɔ kayakun iye nwuna kayakun ugyii lɛlɔ na baƒuaala-nwu kɔtu. Na ɔ́si ɔmmɔ kama ɔdubɔbla ukyuli ɔni ndubutaabla kabla teete-ɔ nwuna akwa ƒui.

⁷ “Na si ukyuli ɔdi úti ubidi ulekubi úye ni, anwu uuubo kuƒi ka ɔkɛ bɔnwuna aani kalɛ na baanyonu banana.

⁸ Na si béye uleku ɔdi béte ɔnana ɔdi na ɔnana ɔmmɔ ɔɔyɔ́ ka uti-nwu, nsu uleku ɔmmɔ útenu kalɔ ni, na ɔlɛka unwoti ɔmmɔ ɔsɔku uleku ɔmmɔ uye ute ɔti. Nsu utalɛka unwoti ɔmmɔ uye uleku ɔmmɔ ute ɔƒɔ ɔdi. Ɔsika ɔbla uleku ɔmmɔ kalala.

⁹ Na si ɔnana ɔdi úye ulekubi ɔdi úte ubidi ɔnanabi ni, ɔlɛka ɔda ulekubi ɔmmɔ aani ubidi ulekudi kalɛ.

¹⁰ Na si ɔnana úti uleku unyɔdi ni, utalɛka uni ulekudi udeedi, mmomu ɔlɛka uteete-nwu adila ku adala na uteesie-nwu kudɔ ɔnana ku uleku kalɛ.

¹¹ Na si ulete-nwu alakpa atɛ amɛni ni, uleku ɔmmɔ ɔkana na ɔtɔlɔ na ɔnana ɔmmɔ uuubo kuƒi ka ɔƒɔ uleku ɔmmɔ lɛla lɛdi.

Ɔda Bubo Na Likyulikpi Ala Bɔbla Lɛlɔ

¹² “Na si ukyuli ɔdi úbo nwuna ukyulikpana ɔ́du ni, anwu lɛnɔ ɔlɛka badu-nwu.

¹³ Nsu si útati asa na ɔ́du-nwu, na Katɔti bɔyɔ na bɔdi ni, ubo kuƒi ka ukeli usie kesii kani ndubo-mii bɔtina. Na si úkeli úsie mmɔ ni, batadu-nwu.

¹⁴ Nsu si kɔnyi ɔsu na úbo nwuna ɔkpana ɔ́du ni, ɔlɛka badu ukyuli ɔmmɔ lɛnɔ ina úkeli útátamiku mina lɛkpabi.

¹⁵ “Na ukyuli biala maƒiɛmi uni iye ɔti lɛla lɛdi ni, ɔlɛka badu-nwu.

¹⁶ “Na si bina akɔ ɔdi úƒie ukyuli ɔdi ka uti-nwu utéye iye uti-nwu ɔbla nwuna kabla ɔblane ni, ɔlɛka badu-nwu si béƒie-nwu.

¹⁷ “Ukyuli ɔni mewida ɔti iye uni ɔlɛka badu-nwu.

¹⁸ “Bɛya bɔsu bɔnii nkyuli inyɔ beekpó na unwi úbeyi ɔkpanadi ɔvu iye ɔ́gyu lɛtabi ɔƒiɛmi-nwu na útekpi. Si ɔ́ƒɔ ɔlɛ na ɔkya ɔtɔ

¹⁹ na kama ɔ́ta úsie ɔ́vi kaduli ɔ́mana ni, ɔkpanadi ɔmmɔ kayu kani ndi ka ɔƒɔ lɛla biala na ɔlɛne ɔmmɔ ɔ́yila wetédu ka lɛlɔ lɛ́yu-nwu ɔkplu.

²⁰ “Na si ɔdi úti ugyii na ɔ́ƒiɛmi nwuna kabla ɔblane ɔnanabi iye ulekubi na úkpi kɔnakunwi ni, ɔlɛka bani ukyuli ɔmmɔ kɔtu.

²¹ Nsu si ukyuli uyedi ɔmmɔ útekpi limeyi lɛmmɔ iye kadi kegye ni, utalɛka bani unwoti ɔmmɔ kɔtu. Ɔsika unwoti ɔmmɔ mbo-nwu.

²² “Si bekyuli badi beekpó na bétédi ɔƒɔndane ɔdi báƒiɛmi na úbile kaƒɔ, nsu útaƒɔ ɔlɛ kpakplaa bamba ɔdi ni, ɔdi ka ukyuli ɔmmɔ ɔƒɔ ɔƒɔndane ɔmmɔ ɔgyani kayu kani na ɔ́kya na litemi batɛne básia kɔnu.

²³ Nsu si ɔlɛ ɔni na uleku ɔmmɔ ɔ́ƒɔ ubo ɔkplu ni, ɔdi ka ukyuli ɔmmɔ kɔtu bɔni bɔyu ɔkplu lɛni kani, ngba na ngba kenye,

²⁴ lɛnumi na lɛnumi kenye, kenye lɛnyi na lɛnyi kenye, kɔnu na kɔnu kenye ɔgba na ɔgba kenye.

²⁵ Na si bɔkyula bɔdi ni, na bakyula anwu lɛnɔ. Si ɔlɛ na ɔ́ƒɔ ni, na baya anwu lɛnɔ ɔƒɔ ɔlɛ ɔmmɔ. Na si bɔvumi bɔdi ni, na bavumi anwu lɛnɔ.

²⁶ “Ɔƒɛni si ɔnana ɔdi úbo nwuna kabla ɔblane ɔnanabi iye ulekubi na ɔ́bwɛ-nwu lɛnumi ni, ɔlɛka udie kabla ɔblane ɔmmɔ ulu na ɔtɔlɔ ƒaa aani likpidi lɛni na ɔ́bla-nwu ku nwuna buye lili kayu bɔƒɔ.

²⁷ Na si úbo-nwu na nwuna lɛnyi lɛ́kpa ni, ɔlɛka udie-nwu ulu na ɔtɔlɔ ƒaa na lɛnyi lɛni na ɔ́kpa-nwu mmɔ ɔsu na unwini likpidi lɛni na ɔ́bla-nwu ku nwuna buye lili kayu bɔƒɔ.

²⁸ “Si ɔmantɛ akɔ ɔdi ɔ́wɔ ukyuli ese ɔ́du ni, ɔlɛka bebo-nwu atabi badu na ɔdi utakun-nwu lɛna lɛmmɔ. Na ukyuli ɔni ebuo na ɔdi ni, utalɛka bani-nwu kɔtu kɔdi.

²⁹ Nsu si ebuo ɔmmɔ ɔɔyɔ́ bekyuli ese bɔwɔ lɛni na béte nwuna ɔlati bɔti na útakya-nwu ɔbuli útada kesii kadi na útádu ukyuli ɔdi ni, ɔdi ka bebo ebuo ɔmmɔ atabi badu na badu ɔlati lɛnɔ.

³⁰ Na mmomu si kayu na bákya-nwu ka ɔƒɔ ni, ɔkana na ɔƒɔ kayu kammɔ na uti udie nwuna ngba.

³¹ “Ɔda bubo bɔmɛni bɔdanku si ebuo ɔmmɔ úbo ubi ɔnanabi iye ulekubi ɔ́du.

³² Na si ɔ́du kabla ɔblane ɔnanabi iye ulekubi ni, ɔlɛka ɔlati ɔƒɔ kayu sika ɔƒualadi antabi lɛkyami linwi unu ute kabla ɔblane ɔmmɔ ɔlati, na bebo ebuo ɔmmɔ atabi badu.

³³ “Ɔƒɛni si ukyuli ɔdi úku ubu na útebi-nwu ala na ɔdi ebuo útánu-nwu kemmo ni,

³⁴ ukyuli ɔmmɔ ɔdi ka ɔƒɔ ebuo ɔmmɔ kayu ute ɔlati, na ebuo ukpine ɔmmɔ unwini ubu ɔlati ɔdi.

³⁵ “Si ukyuli ɔdi ebuo ɔ́du ɔkpanadi ɔdi ni, beti ebuo ɔni nádu unyɔdi mmɔ béye na beti egulabi ammɔ ku ebuo ɔni nékpi mmɔ bele likeke bete bebuo bammɔ balati inyɔ bammɔ.

³⁶ Nsu si bánu báti ka lɛni na ebuo ɔmmɔ ɔɔbi taasiaku bebuo bamba taawɔ-ma taadu, nsu ɔlati útakya-nwu lɛyu ni, ɔdi ka ɔlati ɔmmɔ ɔƒɔ kayu kammɔ, ebuo na ebuo kenye, na ɔni nékpi mmɔ unwini kayu ɔƒɔne ɔmmɔ ɔdi.”