Etemila 8 - Katɔti Ɔku Kedee

¹ Ɔma mbo lɛlati lɛni na ɔkana lɛla biala kalɔ budie? Lɛnunda lɛɛbla ukyuli anumi nwaa na anumi aaƒɛnimi-nwu.

² Si énye Katɔti anumi ése kenye ka adubɔdi ɔga ɔda bubo lɛlɔ ni, amu mɔɔsu-ɔ kpakplaa nnii di ƒula linyese lɛmmɔ lɛlɔ.

³ Tababla na akyaku ɔga unyeƒi si ɔ́ɔlɛ nwuna lɛla lɛdi ugyii iye ata enye-nwu lɛlɔ.

⁴ Ɔga litemi lɛdi ɔda bubo na ɔdi ɔɔɔdubo bɔta kalɛ kalɛ na uye-nwu ɔnii bi ɔsu na ɔɔbla lɛla lɛdi na ulu ɔdi lɛlɔ.

⁵ Si aabu ɔga ni, eleduo ɔgbankpi kemmo. Anwuɔsu sia anu na ati lɛla lɛni na abla ku uwi ɔni na abla-ni.

⁶ Ngba bulie bubo ukyuli ɔkplu geen nsu lɛla biala bɔbla bubo kalɛ na abla-ni asiaku ku uwi ku kesii kani na babla-ni,

⁷ ina ka ukyuli ɔdi ɔɔɔgyi lɛla lɛni mebo uwi ɔni ndubo.

⁸ Ukyuli ɔdi ulakana ɔƒɛƒɛɛ ulu bɔtina iye ɔti nwuna likpimeyi. Na kama busie lɛnɔ buuubo si kekpo kálɛ. Lɛni kani na ɔdi ulakana na wabɛ na nwuna likpidi lɛni na ɔ́bla kama.

⁹ Lɛ́nu ɔmɛni ƒui lɛ́ti na líti-nwu kasusu kpakplaa na ala ani mɔɔlɛ́ kayawi kamɛni kemmo lɛlɔ. Dɛ na ɔ́bla na ukyuli ɔdi anwu ɔɔkɛ́ ɔyikun ɔdi utulo bakladi na anu ka ɔɔbla kalala?

¹⁰ Lɛnɔ ni, lɛ́nu kalɛ na baavá bekyuli bekpidi ku ɔbu, nsu Katɔti bekyuli bávi bálɛ ɔma kedee ɔmmɔ kemmo na báyiƒala-ma. Na ɔmɛni lɛnɔ uuubo kalɔ bunu bɔdi.

¹¹ Si bɔ́nu kalɛ na bekyuli bekpidi benye baabla likyulikpi ala taasia kama na balakɛ lɛtuni lɛdi ni, na ɔɔbla-bu aani abu lɛnɔ buse kalɔ buteelie ngba bɔmmɔ udu.

¹² Bɔɔnu kalɛ na bekyuli bekpidi bani muulie taabla ekpidi liti liti taasia kama beelie ngba na uwi uutu ina ka nka básu banii bekyuli bani mɔɔsiaku Katɔti kama siin na baabu-nwu na ala adubo bɔtɛku.

¹³ Na ɔɔɔdi bani muuní-nwu na baabla ekpidi na ala adubo bɔtɛku.

¹⁴ Lɛla bamba lɛnɔ lɛkya lɛni neeebo kalɔ budie bɔdi. Bekyuli babuni na baabla kalala aani bekyuli bekpidi. Na bekpidi mmomu na baatu lili aani bekyuli babuni.

¹⁵ Anwuɔsu na mɔɔtí nwaa ka lɛla bamba lɛdi liiibo liiite ukyuli na ɔbla utulo ka ɔdi adila na ɔni na ebiti ada-nwu asa na ɔkana kayawi kemmo bɔsia bɔlɛ aani lɛla lɛni na Katɔti úte-bu.

¹⁶ Mɔɔtɛ usien ku ɔƒɛ lɛlɛɛ talɛɛ talɛɛ na muuti kasusu taasiku ala ani ƒui mɔɔlɛ́ na kalɔ kamɛni kemmo lɛlɔ.

¹⁷ Lɛ́nu ala ani ƒui na Katɔti ɔ́bla na lɛ́nu lɛ́ti ka ukyuli biala uuubo na wakana-nya kalɔ bunu iye ɔnu lɛla lɛni na ɔ́bla ɔti nwaa kudi kudii ina dɛ na ɔnii ɔ́da anu.