Etemila 5 - Katɔti Ɔku Kedee

Sia Lɛlɔ Anu Kaduɛ Na Katɔti Kakpakɔ

¹ Ti lɛlɔ bɔda si éduo Katɔti kakpakɔ. Na esie atábla kpoo na ese atu enu ala na tababla asu ka atábla akpala aani ɔdɔlɔdi kalɛ na alati anii adaku Katɔti bɔƒiɔ.

² Da ƒula kenye na ati bɔtɛmi na Katɔti anumi. Na tese-nwu kenye kadi asa na abla kasusu asiku lɛla lɛmmɔ lɛlɔ. Ɔsika katɔ na Katɔti ulie na awɔ akya kalɔ mɛni anwuɔsu na akɔsi bɔtɛmi.

³ Si lɛla lɛdi lɛkya-a kasusu uwi ndi uwi ni, eeti-ni teegye kɔna. Lɛni kani na si ɔdɔlɔdi ɔɔtɛmi uwi ndi uwi na ɔɔƒiɔ́.

⁴ Si ánu ka ése Katɔti kenye kadi ni, taya na uwi utu-ka lɛlɔ. Babla na abla linyese lɛmmɔ lɛlɔ ete-nwu, ɔsika kaƒɔ kalayɔ-nwu na kɔdɔlɔ ala bɔbla lɛlɔ.

⁵ Ɔdia si étese Katɔti kenye kadi utulo ka ese-nwu kenye na aladi-ka lɛlɔ.

⁶ Taya na ƒula kenye keti-ɔ katákya likpidi kemmo. Na tasu ukyuli ɔni mɔɔnu lɛkpa lɛmmɔ lɛlɔ anii kenye kani na ése ni, ɔɔɔdi litemi geen na ada na bɔsu kani na ásu. Ɔsika Katɔti ɔkana na ubile ƒula kabla ƒui na kayii udu. Anwuɔsu tabla lɛla lɛni makya-nwu kɔnyi.

⁷ Taayia Katɔti ku ɔbu na tataabla kasusu na ala ani na étulo-ɔ lɛlɔ si ɔɔɔdi lɛni ni, adɔlɔtɛ kani na adubo butaatɛmi.

⁸ Si ánu ka baanya bekyuli bani na bese kpɛtɛ taakya na ƒula kalɔ lɛlɔ, na ala tabla ulu lɛlɔ búti ala bɔbla siin kenye ni, utabla-a dɛye dɛye, ɔsika bekyuli bani nkya lɛlɔ badine kalɔ ni, ɔlɛka benu bana batɔnkune litemi.

⁹ Na ka ɔga ndi ukyuli ɔni na utulo ƒui na kalɔ kammɔ lɛlɔ ɔsu ni, kalɔ kammɔ kuyii kɔni na báda béte bekyuli na baaƒɔ ni, anwu ndubɔdi kenengudikɔ.

¹⁰ Ukyuli ɔni mbo egulabi ku akɛla bɔyɔ ni, sika ulemo-nwu na akɛla lɛnɔ alabɔ-nwu. Nsu ɔmɛni ƒui use aani kalɛ na baabi taasiaku ɔƒɛƒɛɛ.

¹¹ Si akɛla eemomo ukyuli ni, lɛni kani na badine lɛnɔ beemomo. Na akɛla ammɔ elebunku-ɔ úti útulo ka enye aanu na bekyuli badi-nya bete-ɔ.

¹² Ukyuli bamba kabla ɔblane ni, lɛlɛɛ lɛɛyu-nwu ina útakɛ lɛla bonwu lɛdi útadi. Nsu ɔlakɛne ala pii ani na ubo ɔsu ni, lɛlɛɛ línwini-nwu etila.

¹³ Lɛ́ɛnu likyulikpi ala enengudi geen na kalɔ kamɛni lɛlɔ ɔni na akɛla ani na ɔlakɛne ɔ́tɛ úse lɛlɔ énwini-nwu ɔgbankpi.

¹⁴ Na lɛ́nu kalɛ na akɛla ammɔ udu lɛnɔ aayii ɔkɛnku lilikpi lɛla lɛni nálɛ ɔsu. Na si ukyuli ɔmmɔ ubo ubi ɔnanabi ni, na lɛla biala lɛ́sɔ lítebu liiise-nwu.

¹⁵ Kasɔngya na ukyuli ɔɔlɛ́ taasi uni kaƒɔ kemmo. Na kalɛ na ɔkɛ úbo ni, lɛni kani na ɔdubɔsɔ unwini ɔtɔlɔ. Na ɔɔɔdubo lɛla lɛdi buti bɔda bɔtɔlɔku.

¹⁶ Ɔmɛni ɔdi kɔnyana litemi lɛni naaadia bɔnu na ɔdi ɔƒɛƒɛɛ bɔbi taasiaku.

¹⁷ Na nwuna ngba emeyi ƒui ni, ulátuna bulie taadi nwaa ku ebiti mmomu úmii na nwuna kayi ku kasusu kemmo ku ɔdu kati kati.

¹⁸ Lɛla lɛni kani na mɔɔnu ka ukyuli ɔlɛka ɔbla ndi ka bɔdi adila na bɔni lɛnɔ na ebiti ataada-bu na bula kabla lɛlɔ. Ɔmmɔ kani ndi lɛla lɛni na Katɔti ɔɔwia ka butaabla.

¹⁹ Ɔƒɛni si ukyuli ɔdi ubo lɛlakɛ na limomo-nwu, na ɔɔdi na ɔɔní taakɛ lɛlɔyɔ ni, unye nwuna kabla lɛlɔ ku ebiti, ɔsika Katɔti néte-nwu-ni.

²⁰ Na Katɔti ɔmmɔ ɔdubɔda-nwu na nwuna kayi kayɔ ɔni na ulenye uléteekpoku lɛlɔ kasusu na nwuna ngba emeyi lɛlɔ.