Baga 2 3 - Katɔti Ɔku Kedee

Kekpo Kálɛ Israelƒuɔ Ku Moabƒuɔ Ntɛ

¹ Na lɛkwa leevu-maanedi kemmo uwi ɔni na Ɔga Yehosaƒat ɔɔdi lɛga na Yuda kalɔ lɛlɔ ni, na Ahab ubidi Yehoram úbenwini ɔga na Israel. Na úlie Samaria ɔ́di lɛga lɛmmɔ akwa leevu-anyɔ.

² Ɔ́bla likpidi na Unwoti anumi. Nsu nwuna likyulikpi lítedu ɔti iye uni Isebel lɛdi. Na Baal baƒiɔ bani ƒui na ɔti ɔ́tu ɔ́lɛ ni, ɔ́ya na bábwɛ-ma.

³ Nsu ɔ́siaku Nebat ubidi Yerobeam ɔbladu ukpidi kama kalɛ na útiku Israelƒuɔ útákya likpidi kemmo na útenwini na ɔbladu ɔmmɔ kama ɔsu.

⁴ Ɔƒɛni Mesa ɔni mɔɔdi lɛga na Moab kalɔ lɛlɔ ni, ɔɔtumini baƒonu kaduɛ ɔni na lɛkwa biala ni, uute Israelƒuɔ ɔga baƒonu bakɔdi mpim eti anyɔ (100,000). Na ɔsɔ ute-nwu baƒonu linwini lɛni békulo básiku baƒonu bagyani mpim eti anyɔ (100,000) lɛlɔ.

⁵ Nsu uwi ɔni na Ɔga Ahab úkpi ni, Moabƒuɔ ɔga ɔmɛni ɔ́ta únye Israelƒuɔ lɛlɔ.

⁶ Ɔmmɔ ɔsu Ɔga Yehoram ɔ́ta ɔ́si Samaria na útálɔ Israelƒuɔ ƒui ɔ́sala.

⁷ Na ɔ́sɔ úti kenye kamɛni lɛnɔ úmene Yehosaƒat ɔni mɔɔdi lɛga na Yuda ɔnini, “Moabƒuɔ ɔga ɔ́ta únye-mi lɛlɔ, anwuɔsu muuye-ɔ si adububo na ebebunku-mi na butékpoku Moabƒuɔ?” Amu na Ɔga Yehosaƒat lɛnɔ údie kenye ɔnini, “Ɛɛn, bɔdubusie! Ɔsika ami ndi awɔ na mina bekyuli badi ƒula bekyuli. Na mina bapɔnkɔ lɛnɔ badi ƒula bapɔnkɔ.”

⁸ Mmɔ na úye Ɔga Yehoram ɔnini, “Ulu ɔmani lɛlɔ na bɔdubɔsia na butékpoku-ma?” Na Ɔga Yehoram údie kenye ɔnini, “Bɔdubɔsia ketele kalɔ kakwiidi ulu ɔni ntɛ úsie Edom mmɔ.”

⁹ Ɔmmɔ ɔsu Ɔga Yehoram ku Yudaƒuɔ ɔga ku Edomƒuɔ ɔga báyu ulu. Na ka bésie bávi laa emeyi maatɛ ni, bana ntu bɔnidi búbasa. Na ntu biala buuubo na ama iye bana bebuo bani.

¹⁰ Amu na Ɔga Yehoram údie lɛdi momoomo ɔsu ɔnini, “Bi na ɔdi! Buti na Unwoti úti bula baga ɛtɛ bamɛni ɔ́sala úboku mɛni ɔnii uuti-bu ubakya Moabƒuɔ ɔga enu kemmo?”

¹¹ Amu na Ɔga Yehosaƒat úye ɔnini, “Kenye udiene ɔdi ɔkya mɛni na bɔsia-nwu lɛlɔ buye Unwoti lɛla lɛdi bunu?” Amu na Ɔga Yehoram bekpone unwi údie kenye ɔnini, “Saƒat ubidi Elisa ɔkya mɛni, na anwu nátaabla lɛla biala teete Elia.”

¹² Mmɔ na Ɔga Yehosaƒat ɔ́su ɔnini, “Elisa ɔdi kenye udiene ɔbuni.” Ɔmmɔ ɔsu bana baga ɛtɛ bammɔ ƒui báni béde Elisa.

¹³ Amu na Elisa úye Israelƒuɔ ɔga ɔnini, “Bi na ami ku awɔ bubo bute lɛlɔ? Teesie na atánu kenye bediene bani na ƒ'ɔti ku ƒ'ini bátaanu mmɔ.” Amu na Israel ɔga údie kenye ɔnini, “Oowo! Unwoti néti bula baga ɛtɛ bamɛni ɔ́sala kalɛ na uti-bu ɔkya Moabƒuɔ ɔga enu kemmo.”

¹⁴ Amu na Elisa údie kenye ɔnini, “Na Unwoti Ɔyikune Ƒui ɔni na mɔɔkpá na uli ngba mɛni anumi ni, si ɔɔɔdi Yudaƒuɔ Ɔga Yehosaƒat na mɔɔbu ɔsu, nka lɛɛɛdubo-ɔ bɔkpete utédu ku ka mɔɔnu-ɔ lɛti muedi.

¹⁵ Ɔƒɛni ni, bɛwia ɔbentaa ɔgyane ɔdi bite-mi.” Uwi ɔni na ɔgyane ɔmmɔ úse kalɔ ɔɔgyá nwuna ɔbentaa ni, mmɔ kani na Unwoti Kɔyu kúbaƒɔ Elisa lɛlɔ kemmo.

¹⁶ Na úse kalɔ ɔɔsu ɔnini, “Lɛni na Unwoti ɔɔsu ɔnini, ‘Biku libu bɛkya kɔwɛ kɔmɛni kemmo ƒui.’

¹⁷ Na ɔnini, ‘Bɛɛɛdubo ɔƒɛƒɛɛ iye ɔnantu ɔdi bɔnu, nsu ntu bɔdubo kɔwɛ kɔmmɔ kemmo ƒui bɔƒɔ, na amii ku bina bebuo lidu ƒui bɛkɛ ntu bɛni.’

¹⁸ Ɔmɛni bɔbla bɔdi lɛla lɛni nse kpɛtɛ kpɛtɛ na Unwoti anumi. Na lɛnɔ ni, ɔdubɔya na bɛdi Moabƒuɔ lɛlɔ.

¹⁹ Na bɛdubɔdi lɛma linengudi lɛni mɔɔdia bɔnu na bátu awodu bámana-ni mmɔ lɛlɔ, na bɛda bana adingyii abuni ammɔ ƒui biwi kalɔ, na baya bana abiɔ ƒui ada ntu bɔyu aya, na bala atabi beyile bana kɔlɔ kɔni mɔɔdia edula mmɔ ƒui kemmo.”

²⁰ Ka kadi kégye ni, na uwi ɔni na baabla ɔtanta akpala údu ni, ka bánu na ntu bɔ́bwɛ bɔlɛ Edom kakɛ na búbeyi kalɔ kammɔ ƒui lɛlɔ.

²¹ Ɔƒɛni ni, Moabƒuɔ bénu ka baga bani bakya amadɔ mmɔ bébo ka bebekpoku-ma. Ɔmmɔ ɔsu báya na ɔnana biala na ɔdi ɔnamu iye unengu na wakana kekpo busie úténye bana kalɔ ɔmii lɛlɔ.

²² Na ka Moabƒuɔ báta kadi kegye ɔtanta tutuutu ni, na ɔƒɛ uukeye teewi ntu bɔmmɔ anumi. Na kesii kani na benye baanu-mu teemene ɔsu ni, na ntu bɔmmɔ bugyie aani ubugya.

²³ Mmɔ na Moabƒuɔ básu kɔnakunwi banini, “Ubugya ɔdi! Use aani ka baga bammɔ békpoku lɛlɔ na bádu lɛlɔ. Anwuɔsu bɛya na busie bana keliekɔ na butábuma bana ala!”

²⁴ Nsu uwi ɔni na Moabƒuɔ bébeduo Israelƒuɔ kakyakɔ ni, Israelƒuɔ báta na békpoku-ma útédu ka Moabƒuɔ bammɔ békeli na Israelƒuɔ bábi básiaku-ma na bádu-ma.

²⁵ Na bátábwɛ bana lɛma linengudi lɛmmɔ báyila-ni udu ƒui. Na bana mmo bɔbuni bɔni na bése ni, Israelni biala úƒwimi lɛtabi útáva-ka kemmo útédu ka atabi aƒɔ mmo bɔmmɔ ƒui lɛlɔ. Na béyile abiɔ biala na áda bɔyu áya. Na báda egyii abuni biala béwi kalɔ. Na ɔma ɔni baalɔ Kir-Haraset kani nébu. Na banana bani nda bana ekpola báka bámana ɔma ɔmmɔ na békpoku-ma.

²⁶ Uwi ɔni na Moabƒuɔ ɔga ɔ́nu ɔ́ti ka badaku-ma lɛlɔ bɔdi ni, útiku nwuna bekpone eti leevu-ene (7,000) bani nda atula ka batáwia kuƒi beduo Edomƒuɔ ɔga kudɔ. Nsu útatɛ.

²⁷ Ɔmmɔ kama ɔga ɔmmɔ úti ubidi ɔnanabi udeedi ɔni nka melie-nwu kenye ute na béti-nwu bábla akpala na ɔma unengudi awodu lɛlɔ. Lɛla lɛni na Israelƒuɔ bammɔ bánu mmɔ lɛ́bla-ma kalɛ kadi, anwuɔsu bénwini bésie bana kalɔ lɛlɔ.