Baga 1 21 - Katɔti Ɔku Kedee

Nabot Ɔ́bla Kevoma Kemo

¹ Uwi ɔdi kama ni, ɔnana ɔdi baalɔ-nwu banii Nabot na ɔ́si Yesreel ubo kevoma kemo kadi. Na kemo kamɛni kede Ɔga Ahab kaduli na Yesreel mmɔ.

² Limeyi lɛdi ni, Ahab ɔ́su Nabot ɔnini, “Kalɛ na ƒula kevoma kemo kamɛni kede mina kaduli ɔsu ni, ti-ka te-mi na liti-ka lɛbla kevoma evete kemo. Na ndubute-ɔ kalɔ bamba iye si aayɔ́ ni, ndubɔƒɔ-ɔ kayu kani námanku.”

³ Amu na Nabot údie kenye ɔnini, “Mina bati kuuku kalɔ kadi. Na ɔmwi kebenwini mina kadikɔ. Na Unwoti úbo-mi ɔda ka nteti-ka netete-ɔ.”

⁴ Amu na Ahab únwini úsie kaduli ɔni na úƒu na úti kɔnyi ɔ́si lɛla lɛni na Nabot ɔ́su-nwu mmɔ ɔsu. Ɔsika ɔ́su-nwu ka. “Lɛɛɛdubo-ɔ mina bati kuuku kalɔ buti bute.” Na úsie ɔ́tɛ bana atɛla lɛlɔ na únwini anumi ɔ́tina kowodu na úni ka ɔdi muedi.

⁵ Amu na ulekudi Isebel úbo na úye-nwu ɔnini, “Bi muukpóku-ɔ lɛni na éni anii aladi muedi?”

⁶ Amu na údie ulekudi kenye ɔnini, “Lɛ́su Nabot ɔni ndi Yesreelni ka uti nwuna kevoma kemo kalɔ kammɔ ute-mi na lite-nwu kalɔ kabambadi. Nsu ɔ́su-mi ɔnini, ‘Lɛɛɛdubo-ka buti bute-ɔ.’ ”

⁷ Amu na Isebel ɔ́su ɔgyani ɔnini, “Lɛni na ɔlɛka awɔ Israelƒuɔ ɔga abla ala avinku? Ta na adi na akɛ ebiti. Na ndubɔƒɔ Yesreelni Nabot kalɔ kammɔ lite-ɔ.”

⁸ Ɔmmɔ ɔsu Isebel úti Ahab lɛnyi na únweni lɛku na úti-ni úmene benengu ku bakutine bani nási Nabot ɔma Yesreel.

⁹ Na lɛku lɛmmɔ kemmo ni, únweni ɔnini, “Bidie limeyi bise bite kenye bunyimi, na bɛsala bekyuli bammɔ ƒui lisu. Na bɛwia keliekɔ kani náƒɔ kuye bite Nabot.

¹⁰ Na bɛwia banana inyɔ bani mbo likyulikpi na bada-nwu kenye ka ɔ́kya uuwida Katɔti ku Israelƒuɔ ɔga. Na ɔmmɔ kama na bɛkpanku-nwu bɛlɛku ɔma ɔmmɔ kemmo na bibo-nwu atabi bɛdu.”

¹¹ Anwuɔsu benengu ku bakutine bani nási Yerseel mmɔ bábla kalɛ na Isebel úbo-ma ɔda mmɔ.

¹² Na bése kenye bunyimi limeyi lɛmmɔ, na básala bekyuli bammɔ lisu, na béte Nabot keliekɔ kani náƒɔ kuye.

¹³ Ɔmmɔ kama báwia nkyuli inyɔ bani mbo likyulikpi na bénye bekyuli akɔ mmɔ na báda Nabot kenye banini, “Nabot ɔkya uuwida Katɔti ku Israelƒuɔ ɔga.” Ɔmmɔ ɔsu bákpanku-nwu bálɛku ɔma ɔmmɔ kemmo na bébo-nwu atabi bádu.

¹⁴ Na béti kenye bémene Isebel banii, “Bébo Nabot bádu.”

¹⁵ Uwi ɔni kani na kenye kammɔ kédu Isebel kudɔ kani na útásu Ahab ɔnini, “Nabot úkpi, anwuɔsu ta na etéti kevoma kalɔ kemo kammɔ.”

¹⁶ Amu na Ahab ɔ́ta kɔnakunwi ka utéti kalɔ kammɔ.

¹⁷ Ɔmmɔ kama Unwoti ɔ́su Kenye Udiene Elia ɔni na ɔ́si Tisbi ɔnini,

¹⁸ “Ta na atásiaku Israelƒuɔ Ɔga Ahab ɔni mɔɔdi Samaria lɛlɔ. Ɔkya Nabot kevoma kemo kalɔ lɛlɔ ka utéti-ka ɔbla nwuna kadi.

¹⁹ Na asu-nwu anini, ‘Lɛni na Unwoti ɔɔsu. Ɔɔɔdi bɔdu na ádu ukyuli na ékpeli nwuna kadikɔ aaƒɔ́?’ Ɔmmɔ kama na asu-nwu anii, ‘Lɛni na Unwoti ɔɔsu. Kesii kani na bakpɛwe báyalɛ Nabot ubugya ni, mmɔ kani badubo awɔ lɛnɔ ƒula ɔdi geen bɔyalɛ!’ ”

²⁰ Amu na Ahab ɔ́su Elia ɔnini, “Bi? Bɔnu na awɔ mina ukisine ánu-mi?” Amu na Elia údie kenye ɔnini, “Lɛ́nu-ɔ, ɔsika éti lɛlɔ éye éte likpidi na Unwoti anumi.

²¹ Na anwu mɔɔsu-ɔ ɔnii, ‘Ndubo ɔgbankpi buti buboku-ɔ lɛlɔ. Na lɛyila Ahab lɛnyi ku ƒula kaba bekyuli ƒui udu útédu ɔnanabi ukplodi lɛlɔ, ina kabla ɔblane na ɔdi iye uli ute lɛlɔ na badi awɔ badi na Israel kalɔ ƒui.

²² Na lɛni na ndubɔbla ƒula kaduli aani kalɛ lɛ́bla Nebat ubidi Yerobeam ku Ahia ubidi Basa kadi. Ɔsika ákya-mi kɔnyi na áya na Israelƒuɔ lɛnɔ bábla likpidi.’

²³ “Na Isebel anwu ni, lɛni na Unwoti ɔɔsu ɔnii, ‘Bakpɛwe ndubo-nwu lɛna bɔduli na Yesreel awodu lɛlɔ.’

²⁴ “Na bakpɛwe badubɔkun Ahab lɛna na ɔma unengudi, na kayaa baasɛ badubɔduli bani nékpi na alakpi akɔ lɛna.”

²⁵ Na ukyuli ɔdi biala útelie kudii aani Ahab ɔni na úti lɛlɔ úye úte likpidi na Unwoti anumi aani kalɛ na uleku Isebel ɔ́bla.

²⁶ Na nwuna ekpidi ani na ɔ́bla ni, kenye káyu ɔkplu geen na adanku lɛƒiɔkpa aani kalɛ na Amoriƒuɔ bábla kalɛ. Na ama na Unwoti ɔ́bɔku ɔ́lɛku kalɔ kammɔ lɛlɔ na Israelƒuɔ anumi.

²⁷ Amu uwi ɔni na Ahab únu Elia etemila ammɔ ɔ́wɔlɔ ni, ɔ́ni nwuna awu ɔni na ɔkya ɔ́buɛ na úti kekwa kɔdi ɔ́da lɛlɔ na úlie kɔka na ɔkɛ ɔɔví ku kɔnyana.

²⁸ Amu na Unwoti ɔ́su Elia ɔnini,

²⁹ “Ánu áti kalɛ na Ahab úboku lɛlɔ kalɔ na mina anumi? Ɔ́si lɛla lɛni na ɔ́bla mɛni ɔsu ni, lɛɛɛdubo ɔgbankpi ɔdi buti buboku-nwu lɛlɔ na nwuna ngba uwi. Mmomu ndubɔya na ɔgbankpi ɔmmɔ ɔlɛ nwuna kaduli na ubidi uwi.”