Baga 1 18 - Katɔti Ɔku Kedee

Elia Ku Baal Kenye Bediene

¹ Na uwi gyɔlɔɔ ɔdi kama na lɛkwa lɛtɛdi na kɔka uwi ɔmmɔ kemmo ni, Unwoti ɔ́su Elia ɔnini, “Teesie na etédie lɛlɔ atina Ɔga Ahab. Na ndubɔya na ɔnantu ɔna.”

² Ɔmmɔ ɔsu Elia lɛnɔ ɔ́ta ka utédie lɛlɔ ɔtina Ɔga Ahab. Kɔka kɔmmɔ kenye kebo ɔkplu geen na Samaria,

³ na Ahab ɔ́tala ka bátalɔ Obadia ɔni mɔɔnu nwuna ɔga kaduli lɛlɔ teete-nwu beboku. Na Obadia ɔdi ukyuli ɔni mɔɔbu Katɔti geen.

⁴ Uwi ɔni na Isebel ɔ́kya útaadu Unwoti kenye bediene ni, Obadia úti kenye bediene bammɔ eti anyɔ útábɛla atabi libu bonwu inyɔ bɔdi kemmo. Na úle-ma ɔ́kya mmɔ liti liti na uute-ma adila ku ntu na mmɔ.

⁵ Mmɔ ni, Ɔga Ahab ɔ́su Obadia ɔnini, “Ya na busie na butávi bɔwia livo lɛdi na abiɔ kɔtu ku awɛ ammɔ kemmo bɔnu. Ɔƒɛni kalɛ bɔdubɔkɛ kesii kani na livo lɛdi lɛ́kwɛ linye na bɔkɛ bute bula bapɔnkɔ ku bula bebuo ala betine na belie ngba kalɛ na buládu bula bebuo bammɔ badi.”

⁶ Na bénu kalɔ na bánu kesii kani na ɔdi ka ɔdi biala ɔsia.

⁷ Uwi ɔni na Obadia úsela ni, kɔnakunwi kani na ɔ́siaku Elia. Na ka ɔ́nu Elia ɔ́ti ɔsu ni, úbo kalɔ úte-nwu na úye-nwu ɔnini, “Ati awɔ geen mɛni?”

⁸ Amu na Elia údie kenye ɔnini, “Ɛɛn, ami mmɔ! Teesie na atásu ƒula ati ka nkya mɛni.”

⁹ Mmɔ na Obadia údie kenye ɔnini, “Bi likpidi na lɛ́bla na eeti ami, ƒula kabla ɔblane, ete Ahab na ɔdu?

¹⁰ Na mɔɔsu-ɔ ka ni, uwi ɔni na ƒula Unwoti Katɔti uli ngba mɛni ni, ɔma biala uuubo iye ɔga biala uuubo ɔni na mina ati útatala ukyuli ɔdi útakya ka buye ƒula lɛlɔ. Na ɔma biala iye ɔga biala ɔni masu ka eeebo mmɔ ni, ɔɔyá na beesé kenye ka báwia-a na bátanu-ɔ.

¹¹ Na ɔƒɛni aasu-mi aani ntásu mina ati nnii, ‘Elia ɔkya mɛni.’

¹² Nsu lɛɛɛgyi kesii kani na Unwoti Kɔyu kɔdubuti-ɔ kusienku si lɛ́tɔlɔ-ɔ kudɔ mɛni. Na si lísie ńtásu Ahab na úbo na útanu-ɔ ni, ɔdubo-mi bɔdu. Nsu ami ƒula kabla ɔblane líse kalɔ mɔɔkpá Unwoti mina lɛkloƒu uwi.

¹³ Mina ati, étenu tɔ lɛla lɛni lɛ́bla uwi ɔni na Isebel ɔ́kya útaadu Unwoti kenye bediene? Líti Unwoti kenye bediene eti anyɔ ńtábɛla atabi libu bonwu inyɔ bɔdi kemmo. Na lɛ́kya-ma liti liti na ubu biala kemmo, na muute-ma adila ku ntu.

¹⁴ Na ɔƒɛni na aasu-mi anii nteesie mina ati kudɔ na ntásu-nwu nnii, ‘Elia ɔkya mɛni.’ Geen ni, ɔdubo-mi bɔdu!”

¹⁵ Amu na Elia ɔ́su-nwu ɔnini, “Ɔni na Unwoti ɔni ntulo ƒui uli ngba mɛni na nwuna kabla na mɔɔbla ni, ndubudie lɛlɔ lɛtina Ɔga Ahab ɔmwi kadi.”

Elia Úsie Karmel Kɔbi Lili

¹⁶ Anwuɔsu Obadia útásiaku Ɔga Ahab na ɔ́su-nwu ka ɔ́nu Elia. Na Ahab lɛnɔ útásiaku Elia.

¹⁷ Uwi ɔni na Ahab ɔ́nu Elia ni, ɔ́su-nwu ɔnini, “Awɔ Elia mmɔ? Awɔ nákya Israel ƒui lɛsɛ mmɔ?”

¹⁸ Amu na Elia údie kenye ɔnini, “Ńtakya lɛsɛ lɛdi na Israel. Nsu awɔ ku ƒ'ɔti kaduli na ɔ́si. Ɔsika bíni Unwoti ɔda bubo na bísie bɛ́siaku Baal kama.

¹⁹ Ɔƒɛni kɔ lɛsa na alɔ Israelƒuɔ ƒui ku Baal kenye bediene eti yaalenwi bammɔ ku Asera kenye bediene eti maane bani na ama ku Isebel baadi na likpo linwi mmɔ na babasiaku-mi na Karmel Kɔbi lɛlɔ.”

²⁰ Ɔmmɔ ɔsu Ahab ɔ́kɔ lɛsa na Israel ƒui na ɔ́ya na bekyuli bammɔ ku Baal kenye bediene bátása lisu na Karmel Kɔbi lɛlɔ.

²¹ Amu na Elia úsie ɔ́vi bekyuli bammɔ akɔ na uuyé-ma ɔnini, “Uwi ɛlɛ geen na bɛdubulie bitaabla kasusu kunyɔ kunyɔ bitálɛ? Si Unwoti ndi Katɔti ni, bɛsiaku-nwu kama. Na si Baal lɛnɔ ndi bina Katɔti ni, na bɛsiaku-nwu kama.” Nsu bekyuli bammɔ bétedie kenye kadi.

²² Amu na Elia ɔ́su-ma ɔnini, “Ami kani ndi Unwoti kenye udiene ɔni nébu. Nsu Baal ubo kenye bediene eti yaalenwi (450).

²³ Bɛwia ɔmantɛ bakɔ inyɔ bite-bu. Na baƒuna unwi bete lɛlɔ na bekulo lɛna lɛmmɔ eku eku basia ekyweni lɛlɔ. Nsu batatu ogya batakya. Na ami lɛnɔ ndubɔdu akɔ unwi na likulo-nwu lɛsia ekyweni lɛlɔ, nsu lɛɛɛdubo ogya bɔtu bɔkya-nwu.

²⁴ Ɔmmɔ kama na bɛkpali bina Katɔti, na ami lɛnɔ lɛkpali Unwoti. Na ati ɔni nátuna ku ogya bɔda ni, anwu ndi Katɔti geen.” Amu na bekyuli bammɔ ƒui básu banini, “Lɛla lɛni na ásu mɛni lɛdia geen.”

²⁵ Amu na Elia ɔ́su Baal kenye bediene bammɔ ɔnini, “Bɛƒuna ɔmantɛ bakɔ ku ekyweni esu ammɔ akɔ unwi ɔni na bɛɛyɔ́, ɔsika bimomo. Na bɛkpali bina ati bɛnii ogya uduo-nwu kemmo. Nsu ukyuli biala utatu ogya utakya.”

²⁶ Anwuɔsu bédie akɔ ɔni béti béte-ma na básala ekyweni, na béti lɛna lɛni békulo mmɔ básia-nwu lɛlɔ. Ɔmmɔ kama ka báwɔlɔ ni, bákpali Baal básiku ɔtanta laa bétédu ɔƒiiwi. Na kenye bediene bammɔ baasu banii, “Baal, nu-bu bɔkpali nii!” Na baava takpali-nwu. Nsu lɛla biala lítalɛ. Na bétenu kenye budie bɔdi lɛnɔ. Na baƒiɔ bakpane bammɔ baatɔ́ taamana bana lɛkpabi lɛni bátu bálɛ mmɔ.

²⁷ Amu ka udu ɔƒiiwi lɛbo ni, Elia úse kalɔ uubo-ma kenye ɔnini, “Bitaakpali-nwu momoomo, ngyi ka ɔkya uuti kasusu kadi. Ɔsika unwoti na ɔdi. Iye kɔnu kɔda-nwu kpakplaa. Iye úsie ulu ɔdi iye ngyi ka ɔtɛ ɔlɛɛ na ɔlɛka bagyila-nwu.”

²⁸ Anwuɔsu báva bákpali-nwu momoomo na báda atula ku lɛkɛɛ beekúlo lɛlɔ útédu ka ubugya muedi ɔɔlɛ́, ɔsika lɛni na baayɔ́.

²⁹ Ɔƒɛ ɔmmɔ úulii, nsu bátada bɔkpali bɔmmɔ bátaya útédu ka useyi akpala uwi údu. Nsu lɛla biala lítalɛ. Na lɛla biala lɛnɔ lítakpete-ma.

³⁰ Amu na Elia ɔ́su bekyuli bammɔ ƒui ɔnini, “Bina ƒui bibo mɛni!” Amu bana ƒui bébo-nwu kudɔ mmɔ. Na ɔ́sɔku Unwoti lɛkpabi lɛni mɔɔyɔ́ ligyingya mmɔ ɔ́klibi.

³¹ Amu na Elia úti atabi leevu-anyɔ. Na lɛtabi biala linye lite Israel kaba kenwi na bebi bani na Yakob ɔ́wɔ kenye. Anwu ndi ukyuli ɔni lɛlɔ na Unwoti ɔ́su kenye kamɛni ɔnii, “Ƒula lɛnyi ndi Israel.”

³² Na úti atabi ammɔ ɔ́tu lɛkpabi na Unwoti lɛnyi kemmo na úku ubu ɔ́mana lɛkpabi lɛmmɔ kalɛ na ntu alɔkumbui anyɔ eduo ubu ɔmmɔ kemmo.

³³ Na úti ekyweni ammɔ ɔ́tɛ ɔ́sia lɛkpabi lɛmmɔ lɛlɔ. Na ɔ́du ɔmantɛ akɔ ɔmmɔ na úkulo-nwu eku eku ɔ́sia ekyweni ammɔ lɛlɔ. Na ɔ́su bekyuli bammɔ ɔnini, “Biti alɔkumbui ene na bidu ntu biyile-nya kemmo. Na biti biwi lɛna ku ekyweni ammɔ lɛlɔ.” Na ama lɛnɔ bábla lɛni.

³⁴ Amu na Elia ɔ́sɔ ɔ́su-ma ɔnini, “Bɛ́sɔ bisie kunyɔdi bibewi!” Na ama lɛnɔ básɔ bábla lɛni. Amu na ɔ́sɔ ɔ́su-ma ɔnini, “Bɛsɔ bisie kɔtɛdi.” Na ama lɛnɔ bábla lɛni.

³⁵ Na ntu bɔmmɔ bɔ́gba bɔ́vi lɛkpabi lɛmmɔ lɛlɔ ƒui. Na ntu bɔmmɔ búyi ubu ɔni na úku ɔmana mmɔ kemmo.

³⁶ Ka useyi akpala bɔbla uwi údu ni, Kenye Udiene Elia ɔ́lɛ úsie úténye anumi. Amu na ɔ́kpali Katɔti ɔnini, “O Unwoti ɔni ndi Abraham ku Isak ku Israel Katɔti! Ya na bekyuli bamɛni banu bati ɔmwi ka ni, awɔ ndi Israel Katɔti. Na ami lɛnɔ ndi ƒula kabla ɔblane. Na ala ani lɛ́bla mɛni ni, ƒula ɔda bubo kenye na lɛ́bla-nya.

³⁷ Anwuɔsu ni, O Unwoti! Die-mi kenye! Unwoti, die-mi kenye! Kalɛ na bekyuli bamɛni banu bati ka ni, awɔ O Unwoti ndi Katɔti. Na eti atina ka ni, ásɔku-ma kayi eeboku ƒula kudɔ ɔkɛnku ɔmɛni lɛlɔ.”

³⁸ Amu na kɔnakunwi ni, Unwoti ogya ɔ́si katɔ na úbakyula akpala ammɔ ku ekyweni ammɔ ku atabi ammɔ ku lɛti lɛni nwi mmɔ. Na ogya ɔmmɔ ɔ́ta útéduo ntu bɔni béku ubu na buwi-nwu kemmo mmɔ na ɔ́da na ɔkyula-mu ƒui kede kede.

³⁹ Amu ka bekyuli bammɔ ƒui bánu ɔmɛni ni, báyu bátɛ kalɔ na baava momoomo na baasu banini, “Unwoti ndi Katɔti! Unwoti ndi Katɔti!”

⁴⁰ Amu na Elia úbo bekyuli bammɔ ɔda ɔnini, “Biƒie Baal kenye bediene bammɔ ƒui, na bitaya na ɔdi biala ukeli.” Amu na béƒie-ma na Elia ɔ́ya béti-ma bésienku Kison Kɔwɛ kemmo na bádu bana ƒui na mmɔ.

⁴¹ Ɔmmɔ kama ni, Elia ɔ́su Ahab ɔnini, “Teesie kaduli na atáwia lɛla lɛdi adi na ani. Ɔsika muunú kɔku ka ɔnantu bonwu ɔdi ɔdubo bɔna.”

⁴² Ɔmmɔ ɔsu Ahab ɔ́tɔlɔ úsie kaduli na útáwia lɛla lɛdi ɔ́di na ɔ́ni. Nsu Elia ɔ́kɔ úsie Karmel Kɔbi lili. Na mmɔ ni, Elia úbo kalɔ na úti nwuna kuli ɔ́kya nwuna lɛgba akɔ.

⁴³ Na ɔ́su nwuna kabla ɔblane ɔnini, “Teesie na ataanu ɛpu kakɛ.” Amu na kabla ɔblane ɔmmɔ lɛnɔ úsie útánu na úbasu-nwu ɔnini, “Ka lísie ni, ńtánu lɛla lɛdi.” Na maatɛ sɔɔn na Elia ɔ́su nwuna kabla ɔblane ɔmmɔ ɔnini, “Sɔ nwini sie mmɔ.”

⁴⁴ Na maatɛdi lɛlɔ ni, úbasu Elia ɔnini, “Lɛ́nu liƒlukutu bli suɛ lɛdi ka lɛ́si lɛɛlɛ́ ɛpu kemmo aani ukyuli kɔnu kalɛ.” Amu na Elia úbo nwuna kabla ɔblane ɔda ɔnini, “Keli na atásu Ɔga Ahab na uti nwuna ɔpɔnkɔ kɛɛkɛ na ukeli uteesie kaduli kalɛ na ɔnantu uláda-nwu ulakya ulu lɛlɔ.”

⁴⁵ Na uwi klukui kama ni, ɔnantu ɔ́nwu na ɔ́ya kalɔ ƒui kábla suu, na ɔƒɛƒɛɛ úse kalɔ uukpó. Na ɔnantu bonwu úse kalɔ ɔɔna. Na Ahab úti nwuna ɔpɔnkɔ kɛɛkɛ na úkeli úsela Yesreel.

⁴⁶ Na Unwoti ɔyikun úbo Elia lɛlɔ na údie nwuna awu na úti ɔ́sabla kavobi. Na úkeli usi útávi Ahab na útéduo Yesreel.