Baga 1 17 - Katɔti Ɔku Kedee

Baasɛ Béte Elia Adila Na Ɔ́di

¹ Amu na kenye udiene ɔni baalɔ Elia na ɔ́si Tisbi na Gilead kalɛkɛ kemmo úsie útásu Ɔga Ahab ɔnini, “Mɔɔsu-ɔ na Unwoti Israel Katɔti ɔni kabla na mɔɔbla na uli ngba lɛnyi kemmo ka ni, na akwa alɛɛ adi kemmo ni, amii iye ɔnantu ɔsɔ ulana ulewi kalɔ si ɔɔɔdi ami násɔ lɛ́su nnii ɔna.”

² Amu na Unwoti ɔ́su Elia ɔnini,

³ “Tɔlɔ kesii kani na enye mɛni na eteesie ɔƒɛ katukɔ kakɛ na atábɛ na Kerit Kɔwɛ kemmo na Yordan kudɔ.

⁴ Ketu kani nkya mmɔ kadubuteete-ɔ ntu na ataani. Na líbo ɔda líte baasɛ batondi badi ka beteeti adila teeboku-ɔ.”

⁵ Amu na Elia únu ɔda ɔni na Unwoti úbo-nwu mmɔ, na úsie útélie Kerit Kɔwɛ kemmo mmɔ na Yordan Ketu ɔƒɛ katukɔ kakɛ.

⁶ Na baasɛ bammɔ beeboku-nwu adila ku lɛna lɛdigye ku useyi uwi na ɔɔní ketu kani na kakya mmɔ ntu.

Ukpinele Ɔdi Ɔ́kya Sareƒat

⁷ Ketu kammɔ kábakwii na uwi klukui ɔdi kama, ɔsika ɔnantu ulána.

⁸ Amu na Unwoti ɔ́su Elia ɔnini,

⁹ “Teesie ɔma ɔni baalɔ Sareƒat na ude Sidon na etélie mmɔ. Ɔsika líbo ɔda líte ukpinele ɔdi nli mmɔ ka uteete-ɔ adila.”

¹⁰ Ɔmmɔ ɔsu Elia ɔ́tɔlɔ úsie Sareƒat mmɔ. Na uwi ɔni na útédu ɔma ɔmmɔ kabanye ni, ɔ́nu ukpinele ɔdi ka ɔkya ɔɔyɔ́ ekyweni. Amu na ɔ́su-nwu ɔnini, “Buvele nda-a, te-mi ntu bɔdi na lɛni.”

¹¹ Uwi ɔni na ukpinele ɔmmɔ úsela utédu ntu bɔmmɔ ni, mmɔ na Elia ɔ́sɔ ɔ́kpali-nwu ɔ́su-nwu ɔnini, “Buvele nda-a, ti bodobodo ɔdi boku-mi o-o!”

¹² Mmɔ na uleku ɔmmɔ údie kenye ɔnini, “Na Unwoti Katɔti anumi ni, bodobodo ɔdi biala uuubo-mi. Lɛla lɛni mbo ndi ɔlaaƒɔ lɛkɔkɔ linwi lɛni nwi ɔɔƒɛɛ kemmo ku nnɔ blii bɔni nwi libui kemmo kani na mbo. Na líbo mbayɔ ekyweni adi kalɛ na lisie ɔma ntéti ɔmmɔ lɛnwa lite ami ku mina ubi. Na si bɔ́di bɔ́wɔlɔ ni, bɔsɔ bulie kɔka kɔmmɔ kemmo butaanu kukpi anumi.”

¹³ Amu na Elia údie kenye ɔnini, “Uleku, taya na ɔmɛni ukpoku-ɔ. Awɔ teesie tánwa kalɛ na ásu, nsu ka ɔdi bɔsala na anwa kanagyie blii kadi eboku-mi asa na anwa awɔ ku ƒ'ubidi ɔdi.

¹⁴ Ɔsika bɔsu na Unwoti ɔni ndi Israel Katɔti ɔɔsu ɔnii, ‘Ɔlaaƒɔ ɔni nwi ɔɔƒɛɛ ɔmmɔ kemmo iye nnɔ bɔni nwi libui kemmo mmɔ ni, bulása kudii utédu ka anwu Unwoti ɔ́ya na ɔnantu ɔ́sɔ ɔ́na.’ ”

¹⁵ Ɔmmɔ kama ukpinele ɔmmɔ útábla adila ammɔ aani kalɛ na Elia ɔ́su-nwu. Na ɔ́si ɔmmɔ lɛlɔ ni, Elia ku ukpinele ɔmmɔ ku ubidi ƒui baakɛ́ lɛla lɛdi taadi limeyi ndi limeyi.

¹⁶ Na aani kalɛ na Unwoti úse uleku ɔmmɔ kenye ɔ́siaku Elia lɛlɔ ni, ɔlaaƒɔ ɔni nwi ɔɔƒɛɛ ɔmmɔ kemmo iye nnɔ bɔni nwi libui lɛmmɔ kemmo bútasa kudii.

¹⁷ Uwi ɔdi kama ni, ukpinele ɔmmɔ ubidi ɔnanabi úbo uuƒi. Na ɔlɛ ɔmmɔ katɔ kani na ɔɔkɔ́ na ɔnamu ɔmmɔ úbekpi.

¹⁸ Amu na ukpinele ɔmmɔ ɔ́su Elia ɔnini, “Katɔti ukyuli, bi ɔsu na ábla-mi lɛni? Bubo na ébo mɛni ka abaya na linyimo mina likpidi na adu mina ubidi?”

¹⁹ Amu na Elia ɔ́su uleku ɔmmɔ ɔnini, “Ti ɔnamu ɔmmɔ te-mi!” Amu na ɔ́ƒɔ ɔnamu ɔmmɔ ɔ́lɛku uleku ɔmmɔ lɛkɔkɔ na úti-nwu úsienku ɔtɔ katɔ kesii kani na úduo. Na úti-nwu ɔ́va nwuna atɛla lɛlɔ.

²⁰ Amu na ɔ́kpali Katɔti ɔ́su ɔnini, “O mina Unwoti Katɔti, bi ɔsu na áya na ɔgbankpi ɔmɛni udu ɔ́lɛku ukpinele ɔni kudɔ na líbo nkya uwi ɔmɛni ƒui lɛni? Na áya na ubidi úkpi?”

²¹ Mmɔ na Elia únene lɛlɔ kɔtɛ úboku ɔnamu ɔmmɔ lɛlɔ na ɔ́kpali Katɔti ɔnini, “O mina Katɔti, sɔku ɔnamu ɔmɛni ngba kya-nwu kemmo.”

²² Amu na Unwoti únu Elia bɔkpali. Na ɔnamu ɔmmɔ úse kalɔ ɔɔnwuna na ɔ́sɔ ɔ́kɛ ngba.

²³ Amu na Elia ɔ́gyu ɔnamu ɔmmɔ na ɔ́yu úsie kalɔ. Na úsie útásu ɔnamu ɔmmɔ uni ɔnini, “Nu! Ƒ'ubidi uli ngba.”

²⁴ Amu na uleku ɔmmɔ údie kenye ɔnini, “Ɔƒɛni na lɛ́nu lɛ́ti ka Katɔti ukyuli na adi. Na Unwoti uutemi taasiaku-ɔ lɛlɔ.”