Baga 1 16 - Katɔti Ɔku Kedee

¹ Na uwi ɔmmɔ kemmo ni, Unwoti útemi úte Hanani ubidi Kenye Udiene Yehu ka útásu Ɔga Basa ɔnini,

² “Nka ukyuli keeke kani na adi. Na ami lɛ́bla-a ɔtɔnkune líte mina bekyuli Israelƒuɔ. Na ɔƒɛni ábla likpidi aani Yerobeam kalɛ. Na ákpanku mina bekyuli átákya likpidi kemmo. Na áya na bana likpidi lɛmmɔ lɛgyila mina kɔnyi.

³ Anwuɔsu, nu! Ndubo awɔ ku ƒula kaduli bekyuli ƒui bɔdu aani kalɛ lɛ́bla Yerobeam.

⁴ Na ƒula kaduli ukyuli biala mekpi na ɔma unengudi kemmo ni, bakpewɛ ndubo-nwu lɛna bɔkun. Na ɔdi biala na wekpi na alakpi akɔ ni, baasɛ ndubo-nwu lɛna bɔduli.”

⁵ Na ala bamba ani na Basa ɔ́bla ku nwuna kayi buse ala ani na ɔ́bla ni, bénweni-nya bákya Israelƒuɔ baga lɛlɔ kɔtɛ ɔku kemmo.

⁶ Basa úkpi na báva-nwu na Tirsa. Na ubidi Ela úti-nwu keliekɔ aani ɔga kalɛ.

⁷ Na kenye kani na Unwoti úti úte Hanani ubidi Kenye Udiene Yehu na Basa ku nwuna kaduli bekyuli lɛlɔ ni, ɔ́si likpidi lɛni na ɔ́bla na ɔ́gyila Unwoti kɔnyi na nwuna ablala ɔsu aani kalɛ kani na Yerobeam ɔ́bla, ku kalɛ na ɔ́du Yerobeam kaduli bekyuli ƒui ɔsu.

Ela Ɔ́di Lɛga Na Israel

⁸ Na lɛkwa aavlanyɔ-lɛkundi kemmo ka Ɔga Asa ɔɔdi lɛga na Yuda ni, Basa ubidi Ela úbenwini Israelƒuɔ ɔga. Na úlie Tirsa ɔ́di lɛga lɛmmɔ akwa anyɔ.

⁹ Na Simri ɔni na ɔdi ɔga ɔmmɔ bakutine benengu akɔ unwi na anwu mɔɔnu nwuna bapɔnkɔ kɛɛkɛ kakɛ kenwi ƒui lɛlɔ ni, ɔ́lɛ-nwu kama na údie kasusu kekpidi nwuna lɛlɔ. Limeyi lɛdi ni, Ɔga Ela ɔ́kya Tirsa na nwuna baga kesii lɛlɔ ɔnune Arsa kesii ɔɔní ntɛ na ɔdaku-mu bukpi.

¹⁰ Simri útéduo kaduli kammɔ kemmo na ɔ́du Ɔga Ela. Na úti-nwu keliekɔ aani ɔga kalɛ, na Ɔga Asa lɛga bɔdi lɛkwa aavlanyɔ-maatɛdi lɛlɔ.

¹¹ Amu na uwi ɔni kani na bése Simri liboku lɛlɔ na úse kalɔ ɔɔdi bekyuli bammɔ lɛlɔ ni, mmɔ kani na ɔ́du Basa kaduli bekyuli ƒui. Na útebu ɔnana ɔdi útakya kama na ɔdi nwuna lɛlɔ ukyuli iye nwuna bakpana muedi.

¹² Na ɔmɛni úbo úte lɛni ɔ́si lɛla lɛni na Unwoti ɔkɛnku Kenye Udiene Yehu lɛlɔ ɔ́su úse na Basa lɛlɔ ɔsu. Ɔmmɔ ɔsu Simri ɔ́du Basa kaduli bekyuli ƒui,

¹³ ɔ́si likpidi lɛni na Basa ku ubidi Ela bábla. Bákpanku Israelƒuɔ bátákya likpidi kemmo, na bágyila Unwoti Israel Katɔti kɔnyi ɔkɛnku bana baƒiɔ lidu bani na bánwi na bávɔ bése lɛlɔ na liiibo kɔsia ɔsu.

¹⁴ Na ala bamba ani lɛnɔ na Ela ɔ́bla na nwuna lɛga bɔdi uwi ni, bénweni-nya bákya Israelƒuɔ baga lɛlɔ kɔtɛ ɔku kemmo.

Simri Ɔ́di Lɛga Na Israel

¹⁵ Na lɛkwa aavlanyɔ-maatɛdi kemmo na Ɔga Asa lɛga bɔdi uwi na Yuda ni, Simri lɛnɔ ɔɔdi Israelƒuɔ lɛga na Tirsa emeyi maatɛ mmɔ. Na Israelƒuɔ bekpone bátáda keliekɔ na beli bede Gibeton ɔni na ɔdi Ƒilistiƒuɔ ɔma.

¹⁶ Na ka Israelƒuɔ bénu ka Simri ɔ́bla kasusu kekpidi na ɔga lɛlɔ na ɔ́du-nwu ni, limeyi lɛmmɔ kani na bekpone bammɔ ƒui bébo kudu na bana kakyakɔ mmɔ ka bana bekpone ɔtɔnkune ɔni baalɔ banii Omri únwini Israelƒuɔ ɔga.

¹⁷ Amu na Omri ku nwuna bekpone bátɔlɔ Gibeton. Na bátábɛ bámana Tirsa ɔma.

¹⁸ Uwi ɔni na Simri ɔ́nu ka báka ɔma unengudi ɔmmɔ bákya ni, úkeli úsie ɔga kaduli na útéduo ɔtɔ kagyumanakɔ kpakplaa kammɔ kemmo na ɔ́tu ogya ɔ́mana lɛlɔ. Na ɔ́du lɛlɔ ɔ́kya ogya ɔmmɔ kemmo.

¹⁹ Ɔmɛni ɔ́lɛ lɛni ɔ́si likpidi lɛni na ɔ́bla na Unwoti anumi ɔsu aani kalɛ na Yerobeam ɔni nélie liboku lɛlɔ ɔ́bla asa na úbo. Ɔ́bla ala ani na átayɔ Unwoti kaƒɔ ɔ́si nwuna likpidi ku kalɛ na ɔ́tɔlɔ Israelƒuɔ útákya likpidi kemmo ɔsu.

²⁰ Na ala bamba ani na Simri ɔ́bla ku kalɛ na ɔ́ta únye ɔga lɛlɔ na ɔ́bla ala ɔ́vinku ni, bénweni-nya bákya Israelƒuɔ baga lɛlɔ kɔtɛ ɔku kemmo.

Omri Ɔ́di Lɛga Na Israel

²¹ Na uwi ɔmmɔ kemmo ni, Israelƒuɔ béle lɛlɔ kemmo inyɔ. Na kakɛ benye bete ka beti Ginat ubidi Tibni bese lɛga. Na badi lɛnɔ benye bete Omri.

²² Na kawɔlɔkɔ ƒui ni, bekyuli bani nnye Omri kama nádi lɛlɔ.

²³ Ɔmmɔ ɔsu na lɛkwa avlaatɛ-linwidi ka Asa ɔɔdi Yudaƒuɔ lɛga ni, Omri úbenwini Israelƒuɔ ɔga. Na ɔ́di lɛga lɛmmɔ akwa leevu-anyɔ. Na akwa aku edeedi ni, Tirsa ɔma na úlie.

²⁴ Ɔmmɔ kama ni, Omri úye kalɔ kadi na Samaria Kɔbi lɛlɔ. Na úye kalɔ kammɔ sika ɔƒualadi antabi akyami avlaatɛ unu ɔ́siku ɔnana ɔdi baalɔ-nwu Semer kudɔ. Na Omri ɔ́da ɔma unengudi ɔdi na kɔbi kɔmmɔ eli. Na úti kalɔ kammɔ ɔlati udeedi lɛnyi lɛni ndi Semer ɔ́sia ɔma ɔmmɔ na baalɔ mmɔ Samaria.

²⁵ Nsu Omri ɔ́bla likpidi na Unwoti anumi. Na nwuna likpidi lítulo bani nádi lɛga bábavi ƒui.

²⁶ Na anwu lɛnɔ ɔ́sia Nebat ubidi Yerobeam ulu lɛlɔ. Na ɔ́kya Unwoti ɔni ndi Israelƒuɔ Katɔti kɔnyi ɔkɛnku likpidi lɛni na ɔ́bla ku ala ani na ɔ́tɔnku Israelƒuɔ na bábla na bágyila Unwoti Israel Katɔti kɔnyi ɔkɛnku bana baƒiɔ bani neeebo kɔsia kɔdi ablala ɔsu.

²⁷ Na ala bamba ani na Ɔga Omri ɔ́bla ku ala ani nálɛ-nya kemmo ni, bénweni-nya bákya Israelƒuɔ baga lɛlɔ kɔtɛ ɔku kemmo.

²⁸ Omri úbekpi na báva-nwu na Samaria, na ubidi Ahab úti-nwu keliekɔ aani ɔga kalɛ.

Ahab Ɔ́di Lɛga Na Israel

²⁹ Na lɛkwa avlaatɛ-maanedi kemmo ka Asa ɔɔdi lɛga na Yuda ni, Omri ubidi Ahab úbenwini Israelƒuɔ ɔga. Na ɔ́di lɛga lɛmmɔ na Samaria akwa aavlanyɔ-inyɔ.

³⁰ Na ɔ́bla likpidi na Unwoti anumi útulo baga bani ƒui nélie.

³¹ Ɔ́sia Yerobeam ekpidi ani na ɔ́bla kama na ammɔ lɛti átabɔ-nwu. Mmomu úsie útéti Sidomƒuɔ Ɔga Etbaal ubidi ulekubi ɔni baalɔ banii Isebel ɔ́bla ulekudi, na úse kalɔ ɔɔkpá Baal baƒiɔ na ɔɔbla-ma kabla.

³² Na ɔ́tu lɛkpabi úte baƒiɔ bammɔ ku kakpakɔ na Samaria mmɔ.

³³ Na ɔ́lɛ ɔƒiɔgyii úte Asera baƒiɔ. Na ɔ́bla ala ani na ányi anyi geen etulo baga bani ƒui nádi lɛga na Israel úti ɔ́gyila Unwoti Israel Katɔti kɔnyi.

³⁴ Ahab lɛga bɔdi uwi ni, Hiel ɔni nási Betel ɔ́sɔku Yeriko ɔ́tu. Na nwuna bɔtu kemmo uwi ɔni na ɔɔkya ɔma ɔmmɔ ɔka kalɔ ni, Hiel úti ubidi unengudi Abiram ɔ́kpa. Na úti ubidi Segub lɛnɔ ɔ́kpa uwi ɔni na ɔɔkya awodu ammɔ kɔyakun. Na ala amɛni ƒui ébo éte lɛni ɔkɛnku Unwoti kenye kani na ɔ́su ɔ́siaku Nun ubidi Yosua lɛlɔ úse ɔsu.