Amos 9 - Katɔti Ɔku Kedee

Kalɛ Na Unwoti Ɔɔtɛ Litemi

¹ Lɛ́nu ka Unwoti unye lɛkpabi lɛmmɔ kudɔ na ɔ́su ɔnini, “Kunku akpa enengudi ammɔ momoomo útédu ka ɔtɔ ɔmmɔ ɔ́kunku útálɛ kowodu kalɔ ƒui. Na lɛsa limodi lɛmmɔ ligyingya na lɛta lɛmmɔ lɛƒɛ libayu bekyuli bammɔ lɛlɔ. Na si badi bébu ni, ndubo-ma bɔdu ku kuwii. Na ina ukyuli unwi muedi ulébu na ɔdi lɛnɔ ulakana bukeli.

² Si béku ubu na béduo bésie kalɔ kemmo ƒui dɛ muedi ni, ndubɔnu-ma lidie lɛsiku mmɔ. Na si bɔkɔ na bákɔ bésie katɔ katɔ kakaaka lɛnɔ ni, mina kɔnu kɔda-ma na mmɔ lɛnɔ na liboku-ma kalɔ.

³ Si ina Karmel Kɔbi lili na bésie bátábɛ muedi ni, ndubo-ma bɔwia bɔnu na liƒie-ma. Si béduo ɛpu kalɔ ƒui lɛnɔ ni, ndubo liƒu kebweyi kammɔ ɔda bubo na ɔdu-ma na mmɔ.

⁴ Si bana bekisine nábɔku-ma bátákya kaƒɔ ɔgyu dɛ muedi ni, ndubɔya na kuwii kɔtu-ma kɔdu na mmɔ. Mina anumi adubɔlɛ-ma lɛlɔ geen ute likpidi lɛni ndubɔlɛku-ma, na ɔɔɔdi lɛbuni lɛdi munu munu.”

⁵ Unwoti Katɔti Ɔyikune Ƒui ndi anwu ɔni na si útuku kalɔ kammɔ ni, kaayɛɛlɛ, na bekyuli bani na beli-ka kemmo ƒui beewulo kɔnyana. Na kalɔ kammɔ kaata taawɔ aani kalɛ na Nil Ketu keeƒuƒuo taakɔ taayu.

⁶ Unwoti ɔmmɔ nátu nwuna lɛgadi kesii ɔ́kya katɔ kakaaka ƒui, na kana ɔka ndi kalɔ kamɛni lɛlɔ. Na ɔɔyá na ntu bɔɔsí ɛpu kemmo teebewi kalɔ lɛlɔ. Anwu ndi Unwoti.

⁷ “Israelƒuɔ, ami ndi Unwoti Katɔti, na buse na Kusiƒuɔ bese bete-mi aani bina kalɛ. Ɔsika kalɛ na lɛ́kpanku-mii lɛ́siku Egyipte kalɔ lɛlɔ ni, lɛni kani na lɛ́kpanku Ƒilistiƒuɔ lɛ́siku Kaƒtor. Na lɛ́kpanku Siriaƒuɔ lɛ́siku Kir.

⁸ Ami ɔlati néti mina anumi lɛ́nu ekpidi ani udu na amii kadi kamɛni bekyuli bɛɛbla. Anwuɔsu na ndubo bina ƒui udu bɔyila na kalɔ kammɔ ƒui lɛlɔ, na kebu Yakob kaba kemmo bebi ɛlɛɛ badi kani. Ami Unwoti násu!

⁹ “Ndubo ɔda bubo na bekyuli begyingya-mii bakya kayawi aani kalɛ na baatanyi ɔlaaƒɔ teedie atago, na atago ebi ammɔ ina unwi uleduo ɔlaaƒɔ ɔbuni ɔmmɔ kemmo.

¹⁰ Bina badi bɛdi bekyuli bekpidi geen, na bɛɛsu bɛnii, ‘Ɔgbankpi ɔdi ɔɔɔdubo-bu bɔsiaku.’ Nsu bina ƒui bɛdubo bukpi na kuwii kenye.

Unwoti Ɔdubɔsɔku Israel Unyene Nwuna Kenyekɔ

¹¹ “Nwuna kama ni, ndubɔsɔ libo na mbasɔku Dawid lɛga kadikɔ lise na lɛklibi ala ani néebie mmɔ, na asɔ atɛ kaduɛ.

¹² Mmɔ na Edom bekyuli bani nébu ku kadi ƒui bekyuli bani na lɛ́lɔ aani mina badi badubɔwia-mi kama ulu. Lɛni na Unwoti ɔni mɔɔbla ala amɛni ƒui ɔ́su úse.

¹³ “Bɛdubo edula bɔƒɛ ɔni na bilakana-nya ƒui bɔlɛku buboku ɔma asa na wasɔ wedu edula ɔkyawi. Egyiibi pii adububu-mii ɔ́si edula ɔƒɛwi útédu edula ɔƒɛwi bamba. Na adingyii ani mɔɔnwu uwi ndi uwi mmɔ adubɔƒɔ abi ammɔ lɛlɔ ƒui.

¹⁴ Ndubɔya na ala asɔ adianku Israel. Na bɛsɔku bina lɛma bɛtu na bilie-ni kemmo. Na bɛdubɔkɛ ntɛ buni bɔni bɔsiku bina adingyii mmo egyiibi ani muudie-mii ntɛ kemmo. Na bɛdi amii alati adingyii ebi ani na bɛ́tuma.

¹⁵ Ndubɔya na bidie lidu bisie ɔgyu aani kugyii kalɛ na bina kalɔ kani kemmo na bilie, na ɔdi ɔsɔ ulágyu-mii uledie bina kenyekɔ. Ami Unwoti Katɔti násu!”