Amos 8 - Katɔti Ɔku Kedee

Unwoti Údie Egyiibi Egyiedi Ku Kagyigyɛ Kadi Ɔ́tina-mi

¹ Unwoti údie lɛla bamba ɔ́tina-mi na kɔyu kemmo na lɛ́nu egyiibi egyiedi ani nánu ási kugyii lɛlɔ na ewi kagyigyɛ kemmo.

² Amu na úye-mi ɔnini, “Amos, bi na aanu?” Mmɔ na lídie kenye nnini, “Mɔɔnu kagyigyɛ ku egyiibi egyiedi ani nánu mmɔ.” Amu na ɔ́su-mi ɔnini, “Mina kadi bekyuli Israelƒuɔ bani nánu bási kugyii lɛlɔ kawɔlɔkɔ na kadi mmɔ. Nsɔ lɛɛɛdubo lɛla lɛdi buti bɔkyiɛ-ma.”

³ Na ɔ́sɔ ɔ́su-mi ɔnini, “Na limeyi lɛmmɔ lɛlɔ ni, lɛnu lɛni na beedie na kakpakɔ mmɔ ƒui lɛdubo bunwini keku ku kɔnyana buwulo sɔɔn na bekpine badubɔƒɔ kesi kesii. Anwuɔsu awɔ bile kenye na asɔ elie kpoo ataanu!”

Unwoti Ɔdubo Israelƒuɔ Kɔtu Bɔni Na Bana Ekpidi Pii Ɔsu

⁴ Ɔ́sɔ ɔ́su lɛnɔ ɔnini, “Amii bani mɔɔkɔ́ taanya bekyuli bani mɔɔyaki ala lili na bɛɛyila bawabane udu na kalɔ kammɔ kemmo ni, binu.

⁵ Biiye bɛnii, ‘Bi ɔsu na emeyi alasa bɔdi na buse kalɔ buteeye bula antabi, na lɛnwunameyi lɛnɔ lilavi pla na ɔdia na butaadi bula kakpa kuye? Ɔƒɛni na bɔɔwia ka butaadi kuye kɔmmɔ na bɔsia ala kuye kalɛ na ala ammɔ aƒɔ-bu kuye. Na bɔƒana akɔkula ammɔ lɛnɔ kalɛ na bɔnya-ma bɔkya na bɔkɛ kɔsia kaduɛ.

⁶ Na bɔsala antabi ammɔ ku ebiedi ƒui bɔkya buye. Na bani mɔɔyaki ala ku bawabane bani neeebo egulabi na baƒɔ bana kɔyu kɔni na bada ni, bɔdubɔƒɔ-ma buye na lɛgbanvuo kayu kenye na benwini-bu kabla bablane.’ ”

⁷ Unwoti úse kenye ɔkɛnku kalɛ na Israelƒuɔ baabu-nwu kenye ɔnini, “Lɛɛɛdubo ala ani udu na bábla mɛni bɔyiƒala.

⁸ Ndubo bɔya na kayawi kemodi kammɔ katɔ kpakpaakpa na bekyuli bani mebu melie-ka kemmo bewulo kɔnyana na bataata teebo aani kalɛ na Nil Ketu keeƒuƒuo taakɔ taasɔ taayu.

⁹ “Na limeyi lɛdubo lɛni na ndubɔya na ɔƒɛ ɔda bukeye ɔya ɔƒiiwi ketee na kalɔ kammɔ kabla suu.

¹⁰ Na bina emeyi buni ani na bɛɛdi ƒui ndubɔya na enwini keku ku kɔnyana buwulo sɔɔn. Na bina adala adubunwini adikpi ekuku na bikpeyi eli bɛkɛ bitaavi. Na ɔdubɔbla aani si ubi unwi pɛ ɔni na ukyuli ɔdi ubo náyii-nwu na uuwulo. Na limeyi limodi lɛmmɔ lɛdubɔbla ɔdu kati kati sɔɔn limeyi.”

¹¹ Unwoti ɔnini, “Emeyi adubo ani na kɔka kpakplaa geen kɔdubo na kalɔ kammɔ lɛlɔ ƒui. Nsu ɔɔɔdi adila iye ntu kɔka. Mmomu mina litemi bunu kɔka, ɔsika bɛdubɔwia kpakplaa ka binu kenye kadi bɛsiku-mi kudɔ, nsu bilénu lɛla lɛdi.

¹² Bɛdubo bɔka bɔmana bɛnii bɛɛwia-mi kenye kadi binu ɔ́si katɔ útédu ɔƒɛ katukɔ na ɔsɔ ɔsi kada kakɛ útédu ɔƒɛ kanukɔ, nsu ukpludi na bɛkɛ bɛɛkɔ́ taayu na bilanu lɛla lɛdi.

¹³ Na bakloƒu ku begblebi bayikune muedi badubo bubuli si uwi ɔmmɔ údu na kɔka kɔmmɔ ɔsu.

¹⁴ Na bani mɔɔbla kɔƒa ala taakpali Samaria baƒiɔ, bani nkya Dan ku Beer-Seba teese kenye ni, badubo bubuli ɔni na basɔ balakana bɔta lɛnɔ.”