Amos 7 - Katɔti Ɔku Kedee

Unwoti Údie Baalɔlɔ Ku Ogya Ku Kabuli Kadi Ɔ́tina-mi

¹ Unwoti Katɔti údie ɔ́tina-mi na kɔyu kemmo ka ɔdubuti baalɔlɔ umene na bebile edula ammɔ ƒui si uwi ɔni na báƒɛ ɔga ɔmmɔ ɔdi béte-nwu báwɔlɔ, na livo lɛwɔdi lɛ́sɔ líse kalɔ lɛɛlɛ́.

² Na uwi ɔni na nnye mɔɔnu na baalɔlɔ bammɔ bádi lɛla biala bédie báwɔlɔ ni, lívele-nwu nnini, “Unwoti Ɔyikune Ƒui, nu-ma kɔnyana na eti akyiɛ-ma! Dɛ na Yakob kaba kemmo bebi badubɔbla asa na belie ngba? Bana ɛlɛɛ kani badi na beeebo ɔyikun ɔdi!”

³ Na lɛla lɛmɛni líkpoku Unwoti ɔlati, anwuɔsu enu áƒɛ-nwu ka ɔbla lɛla lɛni na ɔ́su. Na ɔnini, “Nsɔ lɛɛɛdubo bɔya na ubo-nwu kemmo lɛni.”

⁴ Unwoti Katɔti údie ɔ́tina-mi na kɔyu kemmo ka ɔdubɔya na ogya bonwu ɔdi ubo na ubakyula ɛpu ɔmmɔ na ɔkyula kalɔ kammɔ ƒui.

⁵ Mmɔ na lívele-nwu nnini, “Unwoti Ɔyikune Ƒui, tabla kalɛ na ásu! Dɛ na Yakob kaba kemmo bebi badubɔbla asa na belie ngba? Bana ɛlɛɛ kani na badi na beeebo ɔyikun.”

⁶ Na lɛla lɛmɛni líkpoku Unwoti ɔlati, anwuɔsu enu áƒɛ-nwu ka ɔbla lɛla lɛni na ɔ́su. Na ɔnini, “Nsɔ lɛɛɛdubo bɔya na anwu lɛnɔ ubo-nwu kemmo lɛni.”

⁷ Unwoti údie lɛla bamba ɔ́tina na kɔyu kemmo. Na lɛ́nu ka unye kowodu kɔdi kudɔ na ɔda kabuli kadi kɔnu kani mɔɔtina kowodu bunye.

⁸ Ɔ́kpali-mi úye ɔnini, “Amos, bi na aanu?” Amu na lídie kenye nnini, “Kabuli kani mɔɔtina kowodu bunye.” Mmɔ na ɔ́su-mi ɔnini, “Kabuli kamɛni na líti mɔɔkɔ́ku mina kadi bekyuli Israelƒuɔ taatina ka baaakɛ ligeen, mmomu bese aani kowodu kɔni nábu na nsɔ lɛɛɛdubo-ma buti bɔkyiɛ.

⁹ Na ndubɔbwɛ Isak kaba kemmo bebi baƒiɔ kɔkpakɔ kɔmmɔ ƒui na lɛbwɛ Israelƒuɔ kɔkpakɔ kedee kɔmmɔ ƒui. Na lɛbwɛ Ɔga Yeroboam lɛga kadikɔ kammɔ.”

Amos Ku Amasia Lɛlɔ Litemi

¹⁰ Mmɔ na Amasia ɔni ndi ɔkpane unengudi na Betel ɔ́tala na bátásu Yeroboam, Israelƒuɔ ɔga, ɔnini, “Amos unye ɔɔví-ɔ kalɔ momoomo ɔni na ɔɔɔdia na awɔ ɔlati ƒula kalɔ kemmo na Israel kalɔ lɛlɔ. Na mɔɔnu ka ɔmmɔ ɔdubo kalɔ kammɔ ƒui bubile na bekyuli bammɔ lɛnɔ balakana-nwu lɛlɔ bɔta búnye na beni lɛla lɛni na ɔɔsu.

¹¹ Na nwuna kenye ndi ɔnini, ‘Badubo Ɔga Yeroboam bɔdu na beƒie kalɔ kammɔ bekyuli batɔlɔku besienku kaƒɔ na kekpo kemmo.’ ”

¹² Kama ni, ɔkpane unengudi Amasia ɔmɛni úbasu-mi ɔnini, “Amos, ti ala na avi alɛ mɛni! Na eteesie Yuda kalɔ lɛlɔ na atátaabla ƒula kenye budie kabla na mmɔ na akɛ ƒula lɛdila.

¹³ Sɔ tasu ƒula kenye kadi na mɛni, ɔsika mɛni kadi kakpakɔ ute ɔga ku nwuna lɛga kadikɔ bekyuli bammɔ ƒui.”

¹⁴ Amu na lídie kenye nnini, “Lɛɛɛdi Katɔti Kenye Udiene ɔni mɔɔbla kabla taaƒɔ egulabi adi. Baƒonu ɔdane na ndi na mɔɔnu adingyii lɛnɔ lɛlɔ.

¹⁵ Nsu Unwoti nábakpanku-mi na bebuo lɛlɔ kanukɔ mmɔ, na ɔ́su-mi ɔnini, ‘Sie na atásu mina kadi bekyuli Israelƒuɔ mina kenye.’

¹⁶ “Na ɔƒaani ni, nu lɛla lɛni na Unwoti ɔɔsu ina ka awɔ eebó-mi ɔda anii nda kenye budi nya na lɛda Unwoti litemi bɔsu taadɔnku Israelƒuɔ lɛya.

¹⁷ “Unwoti ɔnini, ‘Ƒ'ulekudi ɔdubo ɔsɔnɔdine ɔyalɛ ubendi bunwini na ɔma unengudi ɔmɛni kemmo. Na ƒula bebi bananabi ku belekubi ƒui kuwii kenye na badubo bɔtɛ. Bekyuli badubo kalɔ kani ndi awɔ ɔlati kadi mɛni bɔkɔku na bele-ka bete lɛlɔ. Na kaƒɔ, na kadi bamba kalɔ lɛlɔ na adubo bukpi. Na kekpo kadubo Israelƒuɔ bukpo na beƒie-ma batɔlɔku bana lɛma ƒui.’ ”